أفلا يتدبرون القرآن

٢٨ : الجزء الثامن و العشرون ( من المجادله الي التحريم )

#معاني_القرآن
#أقرأ_أفهم_تدبر
#الجزء_الثامن_والعشرين

( المجادلة - الحشر - الممتحنة - الصفّ - الجمعة - المنافقون - التغابن - الطلاق - التحريم )

⭕️ المجادلة :

سبب تسمية السورة بالإسم ده؟

👈 في صحابية إسمها خولة بنت ثعلبة أغضبت زوجها ( أوس بن الصامت ) في موقف معين فظاهر منها

وبعد مدة أراد أن يعاشرها فرفضت بسبب موضوع الظهار ده

فراحت للنبي صلى الله عليه وسلم تشتكي من زوجها إنّه ظاهر منها ...

يعني إيه ظاهر منها ؟

يعني قالها انتي عليا مثل أمي ...

الل هو لا طلقها ولا هيا مراته بالشكل ده ... أصبحت عليه حرام

وكانت متضايقة جدا واشتكت للرسول إنه بعد ما ضيع شبابها وفي الآخر يظاهر مني ؟ ده جزائي ؟

قالت (يا رسول الله، أَكَل شَبابي، ونثرتُ له بَطني، حتَّى إذا كبُرَتْ سِنِّي، وانقطع ولَدي، ظاهرَ منِّي، اللَّهمَّ إنِّي أشكو إليك )

فنزلت السورة إنّ ربنا سمع شكواها ونزل تحريم الظهار وكفّارته

ومن القصة دي السورة بتفهمنا إنّ ربنا بيعلم عننا أدق التفاصيل وأدق الخبايا فخد بالك ...

وكمان السورة حرّمت ( التناجي ) والتناجي ده الل هو تكونوا ٣ مثلا في مكان واحد فاتنين منكم ياخدوا بعض ويروحوا يتوشوشوا بعيد عن التالت ... فالتالت ده يفتكر إنكم بتتكلموا عليه ..

والسورة برده توعدت المنافقين الآية ١٤

⭕️ الحشر :

السورة بتتكلم عن غزوة بني النضير وطرد يهود بني النضير من المدينة ( قصة الغزوة طويلة مش هقدر أحكيها دلوقتي الل عاوز يستفيض عن الغزوة دي موجودة على النت ) ...والسورة بينت فضل المهاجرين والأنصار وجزائهم المنتظر.... وبرده فضحت المنافقين ... وآخر سورة الحشر آيات مزلزلة

⭕️ الممتحنة :

برده فيه قصة لسبب نزول السورة دي ...

سبب نزولها إنّ في صحابي اسمه ( حاطب ابن أبي بلتعة ) بعت للكفار في مكة يخبرهم إنّه محمد صلى الله عليه وسلم بيجهز لقتالكم وفتح مكّة... فربنا أخبر رسوله بالمؤامرة دي وبعت ٢ من الصحابة ( علي ابن أبي طالب - الزبير بن العوام ) يلحقوا الرسالة قبل ما توصل لقريش ... وكان حاطب بعت الرسالة دي مع امرأة توصلها لقريش فلحقاها على والزبير وخدوا منها الرسالة

بس طبعاً حاطب ابن أبي بلتعة مش منافق أو كان عاوز يضر المسلمين ... هو عمل التصرف لإنه أهله وعياله كانوا في مكة في حوزة المشركين فكان خايف عليهم فحب يعمل خدمة للمشركين علشان يضمنوا له حماية وإنقاذ أهله

وهمّ عمر ابن الخطاب أن يقتله ولكن الرسول منعه وقال لعمر لا تفعل ياعمر إنّه شهد بدر ولعل الله اطلع على أهل بدر فقال اعملوا ما شئتم فقد غفرت لكم

وتاب بعدها وربنا قبل توبته والنبي عفا عنه وربنا بعد الموقف ده أنزل السورة دي تحرم موالاة الكفار مجدداً أو التعاون معهم بأي شكل

وملخص السورة وهدفها عدم موالاة أعداء الله ولو بالكلمة ... والسورة وضعت قوانيين التعامل مع غير المسلمين المحاربين وغير المسلمين المُسالمين

⭕️ الصفّ :

بتتكلم سورة الصفّ عن قضيتين مهمين ( إنّه قولك ما يخالفش عملك ... وتحفيز المسلمين للجهاد في سبيل الله )

⭕️ الجُمعة :

سورة الجمعة بتتكلم عن ٣ حاجات ...

أول حاجة فضل ربنا على البشرية كلها أن بعث لنا سيدنا محمد يُخرجنا من الظلام إلى النور ...

تاني حاجة تهزيق اليهود الل حرفوا التوراة فربنا شبههم بالحمار ...

ثالث حاجه أحكام وفضل صلاة الجمعة

⭕️ المنافقون :

من إسمها مش محتاجة كلام أو توصيف ... سورة كلها فضح وتقريع وتوبيخ للمنافقين

⭕️ التغابن :

التغابن إسم من أسماء القيامة ...السورة بتتكلم في أول الآيات عن عظمة وإبداع ربنا في الكون ....إنكار المشركين لقضية البعث ... إهلاك الأمم السابقة الل كفروا زيهم ... وآخر السورة تحذير من خطورة الزوجات والأبناء إنهم يشغلونا عن الذكر والعبادة والطاعة

⭕️ الطلاق :

السورة بتتكلم عن تعظيم أمر الطلاق جداً ... وبتقول للناس تمهلوا في قرار الطلاق لإنه بيسبّب مصايب في المجتمع ...وبتتكلم عن أحكام الطلاق والعدة والسُكنة والنفقة وأجر المرضع الخ .... وربنا ذكر لفظ ( من يتق الله ) في السورة ٣ مرات .... إشارة إن موضوع الطلاق لو مفيش مفر منه يبقى الطرفين وهما بينهوا يتقوا الله في كل خطوة بيخطوها ومحدش يظلم حد

⭕️ التحريم :

ممكن نقول سبب نزول السورة هيا ( الغيرة ) ... قيل في إحدى التفاسير إن بعض زوجات النّبي غاروا من مارية القبطية... فالنبي صلى الله عليه وسلم حبّ يراضيها فبعد عن مارية شوية ...فنزلت أول آية من السورة ( لما تحرم ما أحل الله لك ) .... وكمان السورة بتحذر الزوجات من إفشاء الأسرار بين الزوج وزوجته... ( النبي صلى الله عليه وسلم قال لحفصة سرّ فقالته لعائشة فربنا أخبر النبي بذلك) ...وبقيت السورة حثّ الناس على التوبة والرجوع إلى الله ... وآخر السورة ربنا ضرب مثالين للزوجة الكافرة ( امرأت نوح وامرأت لوط ) ...ومثال للزوجة الصالحة ( امرأت فرعون )

والحمد لله

#هداية_آية
#Amr_Gamal