أفلا يتدبرون القرآن

١ : سوره البقره الجزء الاول

1️⃣
نبدأ شهر القرآن مع سوره البقره والجزء الأول حتى نفهم ما نقرأ... تابعونا يوميا ❤️
⭕️ معلومات سريعة عن سورة البقرة :

أسمائها : ( البقرة نسبة لقصة بقرة بني اسرائيل - الزهراء - سنام القرآن - فسطاط القرآن )

خصائصها : ( أول سورة نزلت في المدينة وكان نزولها على فترات مش مرة واحدة - أطول سورة في القرآن - احتوت على أعظم آية في القرآن وهي آية الكرسي - احتوت على أطول آية في القرآن وهي آية الدّين )

فضلها : ( قاهرة للشيطان ولا يستطيع التواجد في مكان تقرأ فيه سورة البقرة - قاهرة للسحرة والسحر - فيها اسم الله الأعظم - تأتي سورة البقرة كغمامة على رأس صاحبها يوم القيامة - الخ )

الجزء الأول بيحكي لنا عن أهم قضية في سورة البقرة ...بيتكلم عن فكرة الاستخلاف في الأرض ( الل هو انت بقيت مسؤل عن مكان ما ... بقيت مدير على مكان ما هتعمل إيه وهتدير إزاي ؟ ... هتنفذ التعليمات ولا هتخالف وتشتغل من دماغك)

وربنا عرض لنا ٣ نماذج علشان نشوف بنفسنا هما عملوا إيه في قضية ( الاستخلاف )

تعالوا نشوف ؟؟

الجزء الأول بيدور حول ٣ محاور رئيسية :

١- خدع ومكائد ومصائد الشيطان ( النموذج الأول آدم عليه السلام )

٢- جرائم بني إسرائيل ( النموذج التاني )

٣- عظمة ومكانة سيدنا إبراهيم عليه السلام ( النموذج التالت )

⭕️ المحور الأول : كلنا طبعاً عارفين قصة سيدنا آدم مع إبليس ... وازاي نجح الشيطان في إغواء آدم وحواء وإنه فضل وراهم لحد ما عصوا ربنا ونزلوا الأرض بعدما كانوا في الجنة ... القصة دي بتعلمنا شوية حاجات

١- علم الله عز وجل الأزلي فالله عز وجل يعلم الغيب ويعلم ما في الصدور

٢- قيمة المسلم وكرامته عند الله ليس في الشكل أو المكانة وإنما في إيمانه

٣- الشيطان هو العدو الأول لبني آدم

٤-عدم الاقتراب من باب الذنوب حتى لو كنت ظاهرياً تقدر على عدم الوقوع في الذنب ( محدش فينا كبير على الغلط )

٥-  إذا أذنب المسلم فلا بد وأن يسارع إلى التوبة والاستغفار... لو أذنبت ٧٠ مرة في اليوم تُب ٧٠ مرة في نفس اليوم

⭕️ المحور الثاني : هو أهم محور في الجزء الأول لإنّه واخد النصيب الأكبر من السرد وهو مصايب وخسة وجحود بني إسرائيل .... وكمان علشان لو فتّشنا في نفسنا ممكن نكتشف إننا بنعمل زيهم من غير ما نقصد... تعالوا الأول بأمثلة مختصرة نتعرف على السجال والحوار الل تمّ رصده في الجزء الأول عن طبيعة العلاقة بين ربنا وبني إسرائيل

- يابني إسرائيل اذكروا نعمتي عليكم ...
-  نجيناكم من ءال فرعون بعدما ساموكم سوء العذاب ...
- نجيناكم من الغرق ...
- عفونا عنكم بعدما عبدتم العجل ...
- ظللنا عليكم الغمام لتحميكم من حرّ الشمس ...
- أطعمناكم المنّ والسلوى ( أطيب الطعام والشراب ) ....
- أدخلناكم بيت المقدس وكلوا من حيث شئتم رغدا ...
- أصابكم العطش فقلنا لموسى اضرب بعصاك الحجر فانفجر الماء ...الخ

هما بقى عملوا ايه ؟

- عبدوا العجل وأشركوا بالله
- ياموسى لن نؤمن لك حتى نرى الله جهرة
- تحريف أوامر الله ( قيل لهم ادخلوا الباب سجدا فدخلوا على أدبارهم ... قيل لهم قولوا حطّة فقالوا حنطة أو حبّة )
- تولوا ونقضوا الميثاق والإتفاق مع ربهم
- جدال وتمادي وتعنّت وتعجيز في ذبح البقرة
- استبدال المنّ والسلوى بالعدس والبصل
- خدوا الدين على مزاجهم ( تؤمنون ببعض الكتاب وتكفرون ببعض )...الخ

السؤال الل المفروض نسأله لنفسنا

كم مرة فشلت في المسؤلية ؟
كم مرة عملت زي بني إسرائيل ؟
كم مرة ربنا أعطاك وأوسع عليك وقابلت العطاء بالمعاصي ؟
كم مرة أنقذك من كارثة محققة وبعدما وقفت على قدمك توليت ؟
كم مرة عاهدت الله بتوبة وأخذت على نفسك الميثاق ثم نقضت ؟
كم مرة وسّع الله في رزقك ولم تتصدق على فقرائه ؟
كم مرة استبدلت القرآن بالذي هو أدنى؟
كم مرة استبدلتي العفاف والحجاب بالذي هو أدنى ؟
كم مرة استبدلت الذي هو أدنى بالذي هو خير ؟
كمّ مرة خدت من الدين الل يوافق هواك ؟

⭕️⭕️ ربنا حذرك ما تعملش زيهم .. ماتتعاملش مع أوامر ربنا بطريقتهم .. خلي شعارك "سمعنا وأطعنا" مش زي ماقالوا "سمعنا وعصينا" .. لان العواقب وخيمة ربنا قال "وغضب الله عليهم ولعنهم"

ربنا أعطاك كل المقومات والأسباب الل تخليك تاخد القرار الصح فاستعملها علشان توصل..........
💢💢💢💢💢💢💢💢💢💢💢💢💢💢

#معاني_القرأن
#الجزء_الأول
#هداية_آية
#عمرو_جمال