#معاني_القرآن
#أقرأ_أفهم_تدبر
#الجزء_الخامس_عشر
الجزء ١٥ زي الجزء الل قبله يحوي على سورتين ( سورة الإسراء ) ... ( وسورة الكهف )
⭕️ نبدأ بسم الله مع سورة الإسراء :
١- سورة الإسراء سورة مكّية نزلت في مكة بعد معجزة الإسراء والمعراج .... نزلت عام الحزن ...السنة الل ماتت فيها زوجة النبي خديجة رضي الله عنها وعمه أبو طالب ... وكانت سبب المعجزة دي مواصلة تكذيب قريش للنبي صلى الله عليه وسلم وللإسلام... فأراهم الله معجزة تدل على القدرة الإعجازية له سبحانه ومع ذلك لم يؤمنوا
٢- هتلاقوا في الربع الأول من الجزء مرور على جزء من قصة بني إسرائيل وتشريد ربنا ليهم :
💐 ( ربنا كتب عليهم في التوراة إنّهم هيفسدوا في الأرض مرتين ... فلما ييجي معاد المرة الأولى ربنا هيسلط عليهم خلق ذو قوة وبطش شديد يسوموهم سوء العذاب .... ولما هيتوبوا عن الإفساد هترجع ليهم الغلبة من تاني .... وكعادة بني إسرائيل لازم يعودوا للانحطاط مجدداً فهيرجعوا للفساد والشرك والكفر من تاني ... وبالتالي ربنا هيسلط عليهم للمرة التانية أعدائهم يوروهم صنوف الذل ) وزي ما ربنا قال ( وإن عدتم عدنا )
٣- بعد كده في الربع الثاني والثالث هتلاقوا حزمة من الأوامر الربانية والأحكام الشرعية والآداب الاجتماعية ( ٢٠ وصية ) تخليك قادر تحفظ علاقتك من ربنا وعلاقتك مع الناس ( هتبدأ بالتوحيد ثم الإحسان لوالديك ....النهي عن سقط الحمل خوف الفقر ....النهي عن الزنا ومقدامته ..... وقولوا للناس حسنا ... ولا تقربوا مال اليتيم ....النهي عن التبذير .... الخ الأحكام ) ... ركّزوا في الربعين ده فيهم أوامر ونواهي وآداب مهمّة لو عاوزين القرآن يغيرنا فعلاً الآيات ( ٣٩:٢٣ )
٤- بعد كده معظم السورة هتلاقوها سجال بين مشركي مكة وبين النبي صلى الله عليه وسلم في مواضيع ( القرآن - البعث - الرسالة - التوحيد ) لإنّ المواضيع دي كانت أكتر مواضيع بتتكلم فيها قريش وبتعمل حولها شبهات وحوارات
٥- في سورة الإسراء ربنا بيبعتلك رسالة إنك لو بتدور على الإستقرار النفسي والمادي والمعنوي عليك بالقرآن ... ( إنّ هذا القرآن يهدي للتي هي أقوم ..... ولقد صرفنا في هذا القرآن ليذّكروا ..... ولقد صرفنا في هذا القرآن من كل مثل .... وننزل من القرآن ما هو شفاء ورحمة ) ....القرآن مش في رمضان بس
٦- برده سورة الإسراء بتوصف سلوك الإنسان إلا من رحم الله وقت الإبتلاء ووقت ما ربنا يرحمه ويعافيه منه ... ( وإذا مسكم الضر في البحر ضل من تدعون إلا إياه... فلما نجاكم إلى البر أعرضتم وكان الإنسان كفورا )
٧- بعد كده السورة هتمر على قصة سيدنا آدم مع إبليس .... وسيدنا موسى مع فرعون ( واتكلمنا عنهم كتير في الأجزاء السابقة )
💐 سورة الإسراء أول سور المُسبّحات ( السور التي بدأت بالتسبيح )
💐 سورة الإسراء أكثر سورة ذُكر فيها لفظ ( القرآن ) ١١ مرة
———
⭕️ سورة الكهف :
١- سورة الكهف معظمنا حافظها لإننا بنقرأها كل يوم جمعة
٢- سورة الكهف مش محتاجة شرح أو تبسيط هيا شارحة نفسها وآياتها مش محتاجة تفسير مش هتتعبوا فيها
٣- سورة الكهف بتحكي لنا ٤ قصص كلنا عارفينهم
💐 قصة أصحاب الكهف ...
💐 قصة صاحب الجنّتين....
💐 قصة سيدنا موسى مع الخضر ...
💐 قصة ذي القرنين ....
السورة ساردة القصص دي بشكل مبسط ويسير وغير مبهم ... وعلشان مانطولش البوست القصص دي متاحة على النت
٤- النبي صلى الله عليه وسلم قالنا ( من حفظ عشر آيات من أول سورة الكهف عُصم من الدجال )
💐 طب إيه علاقة الدجال بسورة الكهف ؟
ال ٤ قصص الل فوق دول كلهم عبارة عن فتن
١- فتنة الدين في قصة أصحاب الكهف هربوا بدينهم ....
٢- فتنة المال في قصة صاحب الجنّتين وكان رجل كافر وكان عنده حديقتين وأنهار وليلة كبيرة واتفتن واغتر وبقى يتكبر على الفقير المسلم الل معندوش حاجة الخ القصة .....
٣-فتنة العلم في قصة سيدنا موسى مع الخضر وإن سيدنا الخضر كان عارف ما لا يعرفه سيدنا موسى ....
٤- فتنة القوة في قصة ذي القرنين الملك العادل الل طاف الأرض كلها ينشر الحق والعدل
💐 فلما تيجي تتتبع قصة الدجال هتلاقيه هيفتن الناس بنفس الحاجات دي
١- هيأمرهم بالكفر وده حال الملك الظالم في قصة أصحاب الكهف ....
٢- هيكون عنده من خيرات الدنيا وده حال صاحب الجنتين .....
٣- هيكون عنده نفوذ وقوة زي ذو القرنين بس طبعاً ذو القرنين ملك عادل والدجال نعوذ بالله منه ....
٤- هيبهر الناس بمعلومات وأخبار محدش يعرفها غيره وده نفس قصة سيدنا موسى مع الخضر إنّه لقى شخص أعلم منه
وعلشان كده الل هيتدبر قصص سورة الكهف بعقله وقلبه وهيفهم السورة عاوزه منه إيه هيكون قادر على الوقوف أمام فتنة الدجال بإذن الله
وربنا ينجينا جميعاً من فتنة الدجال يارب
والحمد لله
#amr_gamal
أنت تقرأ
أفلا يتدبرون القرآن
Spiritualitéشرح مبسط لكل أجزاء القرآن الكريم❤️ #أفلا_يتدبرون_القرآن نبدأ شهر رمضان أو شهر القرأن بمعاني بسيطه يوميا..👌 كل يوم ينزل معاني جزء من القرآن بإذن الله... علشان مينفعش كل رمضان نقرأ المصحف ومش فاهمين حاجه..عايزين نجمع حسنات وخلاص.. 😏 ربنا قال أفلا ي...
