أفلا يتدبرون القرآن

١٢ : الجزء الثاني عشر ( هود )

#معاني_القرآن
#أقرأ_أفهم
#الجزء_الثاني_عشر

الجزء ال ١٢  بيتكلم عن ( سورة هود )

تعالوا نتعرف عن أهمّ هدايات هذا الجزء :

⭕️ هود هو نبي الله تعالى أرسله إلى قوم عاد في ( الأحقاف ) ودي منطقة تقع بين ( عُمان وحضرت موت ) .... وسميت السورة باسم هود لتكرار اسم سيدنا هود فيها ٥ مرات

١- سورة هود نزلت على النبي صلى الله عليه وسلم في مكة في أكتر وقت فيه صعوبة وضيق واضطهاد وتعذيب وتنكيل بالمسلمين الضعفاء في مكة ... ويقال إنّ الكلام ده كان في السنة ١٠ من النّبوة ... ويُقال أيضاً إنّ دي نفس السنة الل هاجر فيها المسلمون إلى الحبشة ( الهجرة الثانية ) للهروب من شدة تعذيب كفار قريش لهم لإنّ الفترة دي كانت أشد فترات التعذيب والإيذاء

٢- علشان تفهم سورة هود بتتكلم عن إيه وأحداثها ماشية ازاي .... لازم تبص الأول على الآية الل قبل الأخيرة في السورة رقم ١٢٠
( وكلاً نقصّ عليك من أنباء الرسل ما نثبّت به فؤادك ) ....وبعدين ترجع تقرأ السورة من أولها

٣- سورة هود وما فيها من قصص وأحداث ....نزلت على النبي صلى الله عليه في أكتر وقت حرج  وفيه تعذيب ...والناس من شدة التعذيب والتنكيل ضاقت عليهم مكة بما رحُبت... نزلت علشان تثبت النبي وتهوّن على المسلمين شوية الل هما عايشينه وترفع الضغط من عليهم وتثبتهم وتصبرهم

٤- استعمل ربنا في سورة هود اسلوب ( الترهيب والتخويف ) بإخباره لنا كيف أهلك ودمّر وأباد القُرى التي كذب واستهزئ قومها برسلهم ...لعلها تكون إشارة لقريش فينتهوا عن الل بيعملوه في المسلمين وينصاعوا للنبي محمد صلى الله عليه وسلم

٥- سورة هود حكت لنا ٧ قصص من قصص الأنبياء مع أقوامهم .... فيه قصص اتعرضت لنا في الأجزاء السابقة وفيه قصص أول مرة بنقرأ عنها .... وكل القصص مع تكرارها لازم هتلاقي حاجة جديدة فيها وحدث جديد فيها ماتذكرش قبل كده

٦- أول قصة في السورة قصة سيدنا نوح مع قومه ودعوته لهم وحوار صنع السفينة واستهزاء وسخرية قومه منه وهو بيصنع السفينة وكيف دمرهم الله ....قصة سيدنا نوح ذُكرت هنا بالتفصيل وأطول سرد للقصة

٧- بعد كده قصة سيدنا هود مع قوم عاد .... وبعد كده قصة سيدنا صالح والدابة مع قوم ثمود وكيف أهلكهم الله

٨- بعد كده قصة الملائكة الل زاروا سيدنا إبراهيم على هيئة رجال وبشروه هو وزوجته سارة إنهم هيخلفوا ( إسحاق ومن وراءه يعقوب )

٩- بعد كده هما هما نفس الملائكة دول كانوا في الأصل مرسلين من ربنا لإهلاك قوم لوط .... وكلنا عارفين سبب إهلاك قوم لوط إنهم كانوا يأتون الرجال ( اللواط ) ....حتى لما الملائكة دول دخلوا على سيدنا لوط في بيته ...وقومه عرفوا إنه هو عنده ضيوف خدوا بعضهم وراحوا لسيدنا لوط في بيته يعملوا معاهم الفاحشة ... فسيدنا لوط قالهم ( لا تخزوني في ضيفي أليس منكم رجل رشيد ) .... إلى نهاية قصتهم وإزاي هلكوا

١٠ - بعد كده قصة سيدنا شُعيب مع قوم مدين .... وبعدين آخر قصة في السورة مرور سريع على قصة سيدنا موسى مع فرعون

١١- زي ما قلنا إن ربنا حكى للنبي محمد القصص دي  علشان يثبته على الل هو فيه ... ويكون إنذار شديد اللهجة لقريش إنهم يرتدعوا أو تذكير بمصيرهم الأسود الل مستنيهم زي ما حصل لأسلافهم في القصص الل فوق

١٢- وزي ما قلنا إن ربنا استخدم في هذه السورة إسلوب الترهيب والتخويف في أحداثها كلها ....فهتلاقوا مرور سريع على أهوال يوم القيامة في قول الله ( ذلك يوم مجموع له الناس وذلك يوم مشهود ... الخ الآيات ) الآية ١٠٣

١٣- سورة هود ذُكر فيها موضوع الإستغفار وفضله وبشريات الل بيداوم عليه بحق ( ٤ مرات ) ... ومع كل مرة إنفراجة مختلفة عن الل قبلها .... المداومة على الإستغفار مخرج حقيقي وانشراح حسي ومعنوي في شخصيتك

١٤ - في آية في آخر السورة هتعدوا عليها بتقول : ( وَأَقِمِ الصَّلَاةَ طَرَفَيِ النَّهَارِ وَزُلَفًا مِّنَ اللَّيْلِ ۚ إِنَّ الْحَسَنَاتِ يُذْهِبْنَ السَّيِّئَاتِ ۚ ذَٰلِكَ ذِكْرَىٰ لِلذَّاكِرِينَ )

⭕️ سبب نزول الآية دي إن واحد راح للنبي صلى الله عليه وسلم وقاله أني أصبت امرأة لا تحل لي ... فعلت معها كل شئ إلا الجماع ... فاقض في ما شئت ( يعني احكم عليا ) ... فلم يرد عليه النبي صلى الله عليه وسلم ... فقال له عُمر ابن الخطاب لقد سترك الله لو سترت نفسك...فانصرف الرجل حزينا .... وهو في الطريق ناداه رجل آخر وتلى عليه هذه الآية ( وكانت لسة نازلة ) ففرح واستبشر ... فقال رجل آخر للنبي صلى الله عليه وسلم هذه الآية لهذا الرجل فقط ؟ .... فقال النبي بل للناس كافة

فكانت قصة الرجل الذي أصاب المرأة دي سبب نزول هذه الآية

لعلها رسالة لي ولك ولكل مذنب ( إنّ الحسنات يذهبن السيئات )

عملت ذنب ؟ ... ماتقومش من مكان الذنب ده إلا لما تعمل طاعة فيه ولا تيأس من كثرة ذنوبك ما دمت متواجد على ردار التوبة

١٥ - بعد كده الجزء ١٢ بيخلص ببدايات سورة يوسف هنتكلم عنها في جزء بكرة إن شاء الله علشان ناخدها على بعضها

#amr_gamal