أفلا يتدبرون القرآن

٢٦ : الجزء السادس و العشرون ( من الاحقاف الي ق )

#معاني_القرآن
#أقرأ_أفهم_تدبر
#الجزء_السادس_والعشرون

سور ( الأحقاف ... محمد ... الفتح ... الحجرات .. ق )

⭕️ سورة الأحقاف :

١- سورة الأحقاف ممكن نسميها سورة ( الإنذار ) ... لفظة الإنذار ذُكرت فيها حوالي ٦ مرات

٢- فالسورة كانت بمثابة إنذار للمشركين والكفار من عواقب الطريق الل مصممين يمشوا فيه ... وهو ده محور السورة

٣- سورة الأحقاف بثّت لنا مشهدين للإبن البار بوالديه والإبن العاق بوالديه ... علشان نشوف بنفسنا عاقبة كل تصرف منهم

٤- واستكمالاً لمحور السورة وهو الإنذار ... فهتلاقوا السورة أنذرت قريش بمصيرهم عن طريق عرض قصة سيدنا هود مع قومه وكيف ربنا سلط عليهم العذاب

٥- والأحقاف دي قرية في اليمن وكانت مساكن قوم عاد وده المكان الل دعاهم فيه سيدنا هود ... وده سبب تسمية السورة

٦- وآخر صفحة في السورة ربنا عرض قصة النفر من الجنّ الل سمعوا القرآن من النّبي وءامنوا به واستجابوا ... وأسرعوا إلى قومهم يدعوهم للإسلام

———

⭕️ سورة محمد :

١- سورة محمد لها اسم تاني .. سورة القتال ... لأنّها بتحكي أحكام الجهاد والقتال والأسرى والغنائم

٢- سورة محمد بتقول للمسلمين لو دخلتوا قتال في سبيل كلمة الله ادخلوا بقلب جامد وماتخافوش ... انت بتحارب ومعاك الحق وربنا ناصرك ومؤيدك فهتخاف ليه ومن إيه

٣- في وقفة مهمة في السورة ... لفظ ( سيُحبط أعمالهم ) ذُكر في السورة حوالي ٣ مرات ... رسالة واضحة صريحة إنّ أي عمل بتتقرب به إلى الله مش متناسق ومش متناغم مع الوحي ومع قول الرسول صلى الله عليه وسلم يبقى قلته أحسن

٤- في السورة برده هتلاقوا وصف الجنّة ... اقرأوا الآيات دي بنفسية الل الدنيا تعباه ومش لاقي حظه فيها فخبط في الآيات دي تخفف عن همومه شوية وتقله الراحة هناك مش هنا

٥- برده السورة فضحت المنافقين شوية

⭕️ وبمناسبة فضيحة المنافقين حد فاكر السورة الكبيرة الل ركزت على المنافقين بس ؟؟ ... وكانت بتتكلم عن غزوة مهمة ؟ ... وروني شطارتكم في التعليقات

————-

⭕️ سورة الفتح :

١- سورة الفتح ياجماعة نزلت بعد صلح الحديبية .... ومن إسم السورة نفهم هدفها ... فالسورة اتكلمت عن تحقيق وعد الله لرسوله إنّه هيرجع مكة تاني منتصراً فاتحاً لها

٢- طول السورة بقى بتتكلم عن فتح مكة وأحداث وكواليس الفتح العظيم ده ... وبيعة الرضوان الل المسلمين فيها بايعوا رسولهم على دخول مكة معاه وفتحها

٣- وطبعاً طالما فيه حرب وقتال فلازم تلاقي فئة جبانة خوّافة بتقعد تتلكك علشان تهرب من الحرب ودول جماعة من الأعراب السورة فضحتهم برده

————

⭕️ سورة الحجرات :

١- سورة الحجرات دي أهل التفاسير سموها إسم تاني ... سموها سورة ( الأخلاق )

٢- السورة دي نزلت بعد عام الوفود سنة ٩ للهجرة ... كتر عدد المسلمين جداً وجاءت الوفود من كل مكان تبايع النبي وتدخل الإسلام ...وبالتالي اختلفت الطبائع والأخلاق والشخصيات والصفات ...فكان لازم سورة تنزل تنظّم الناس وتعمل هيكلة وقوانين عامة للآداب والإجتماعيات بين الناس

٣- فالسورة بطولها بتتكلم عن الأخلاقيات دي

( محدش يرفع صوته على النّبي - محدش ينادي على النّبي وهو في حجراته مع نسائه استنوا لما يخرجلكم - ماتحكمش على حد وانت مش معاك دليل قوي - أصلحوا بين المتخاصمين - محدش يسخر من حد ولا حد يلمز أو يهمز حد - محدش يغتاب حد ولا تتكلموا على بعض - ابتعدوا عن الظنون في الناس - محدش يتجسس على حد ... الخ )

———-

⭕️ سورة ق :

١- أظنّ محدش فينا مابيحبش سورة ق بالذات وكتير مننا حافظينها ومش محتاجة كلام أو توضيح

٢- سورة ق تقدر تسميها ( إيقاظ القلوب من ركدتها ) ... أي حد عنده مشكلة في قلبه أو غفلان ... أو سرحان .... يفتح سورة ق يقرأها بتدبر

٣- السورة بتتكلم عن ( سكرات الموت ... الحساب ... أهوال القيامة ... حوارك بينك وبين قرينك يوم القيامة ... كلام جهنم لربنا وهيا بتقول لربها هل من مزيد ... الخ )
الحمد لله

#هداية_آية
#Amr_Gamal