أفلا يتدبرون القرآن

٥ : الجزء الخامس ( سوره النساء )

#معاني_القرآن
#أقرأ_أفهم
#الجزء_الخامس 

مازلنا في ( سورة النساء ) وقلنا أمس إنّ بدايات سورة النساء  اتكلمت عن حقوق ( النساء واليتامى والورثة ) ...لما نيجي ندخل الجزء الخامس هتلاقيه بيدور على ٣ مواضيع أساسية

١- المنافقين أيام النبي صلى الله عليه وسلم وصفاتهم وحكاويهم وحوارتهم والل عملوه 

٢- كيفية إدارة الأزمات الزوجية في البيوت أو بمعنى أسهل إزاي نتجاوز وقت الخلاف بين الزوجين بأقل الخسائر

٣- شوية أحكام وتشريعات زي ( المحافظة على الأمانات وعدم تضييعها ... أحكام الديّة ....صلاة الخوف ... الإحسان للجار ... الخ )

تعالوا نحكي شوية عن ذكر المنافقين في الجزء

⭕️ المنافقين على أيام النّبي صلى الله عليه وسلم كان عندهم من سواد القلب وخُبث النفس الل مخليهم مش عارفين هما عاوزين إيه وعاوزين يبقوا مع مين المهم يشبعوا رغباتهم وشهواتهم بمبدأ معاك معاك عليك عليك ( مصلحتي أولا ) ....يظهروا الإسلام بأفواههم ويقولوا احنا مع النّبي صلى الله عليه وسلم ومع المسلمين... وشوية إحنا مع الكافرين ضد النبي صلى الله عليه وسلم .....زي ما النّبي صلى الله عليه وصفهم ( مثل المنافق كمثل الشاة العائرة بين الغنمين ... تعير إلى هذه مرة ...وإلى هذه مرة ... لا تدري أيهما تتبع )

⭕️ شوف القرآن صور المشهد ده ازاي ( فإن كان لكم فتح من الله قالوا ألم نكن معكم ) احنا معاكوا يامسلمين طالما فيه مكاسب وغنايم وحاجات حلوة ....( وإن كان للكافرين نصيب قالوا ألم نستحوذ عليكم ونمعنكم من المؤمنين ) احنا وقفنا معاكوا ياكفّار اهو وأعنّاكم على المسلمين عاوزين نصيبنا بقى ....

⭕️ لدرجة إن المسلمين نفسهم تحيّروا زي ما ربنا قال ( فمالكم في المنافقين فئتين ) جماعة شايفين المنافقين مسلمين لما يظهرونه من الإسلام في الظاهر ...وجماعة شايفينهم كافرين لما يبطنونه من الكفر.....لحد ما ربنا حسم الموضوع وقال ( والله أركسهم بما كسبوا )....

⭕️ من شدة الطمس على فطرتهم والسواد الل في قلوبهم ربنا وصفهم وصف بليغ ( مذبذبين بين ذلك لا إلى هؤلاء ولا إلى هؤلاء ) ....يعني لا هو مسلم محترم ظاهرا كباطن ولا هو كافر أصلي معروف إنّه كافر وخلاص... مسلم باللسان وكافر بالقلب والإعتقاد.... وده أقبح من الكفر الصريح لذلك ربنا قال ( إنّ المنافقين في الدرك الأسفل من النار ) مش مجرد في النار وخلاص ده في قعرها

⭕️ بس لو قعدنا مع نفسنا في لحظات صدق ممكن نلاقينا بنطبق الآية ده بحذافيرها في حياتنا وعلاقتنا مع الناس ( مذبذبين بين ذلك لا إلى هؤلاء ولا إلى هؤلاء )

عارف الحق فين بس اختارت الحياد المذموم
عارف الطريق بس متردد تدخل
عارف فين الخلاص بس بتعاند
عارف الحلّ بس بتكابر

بلاش تعيش حياة المعذّبين لا راحة الجاهلين ولا نعيم العارفين ( يعني لا منك جاهل فنعذرك ونقول ما يعرفش ولا منك عملت بالل عرفته )

عرفت نفّذ
وصلت ادخل

بلاش تقف في النص لا منك طولت الل فوق ولا منك وصلت لل تحت

#Amr_Gamal