𝓝𝓮𝓹𝓱𝓲𝓵𝓲𝓶

Ep-10

Unicode,

"ဘာလဲ သော့ခတ်ထားတာလား အစောကြီးရှိသေးတာကို"

Nephilim အိမ်ကြီး​၏ တံခါးမကြီးက အရင်လို လွယ်လွယ်ကူကူ ပွင့်မသွားပဲရှိနေတာမို့ Jimin အလန့်တကြား ရေရွတ်လိုက်မိသည်။ ပတ်ဝန်းကျင်က မမှောင်သေးပေမဲ့ မလင်းနေတော့သည့် နွေဦးည​၏ ခုနှစ်နာရီဝန်းကျင်ခန့် ဖြစ်သည်။ ခါတိုင်း Jimin Club မှာ part time လုပ်ပြီး ပြန်လာရင်တောင် သော့မခတ်သေးသော အိမ်ကြီးက ဒီနေ့မှ ထူးထူးဆန်းဆန်း ခြံဝန်းကြီး အတွင်းထဲကနေ သော့ခတ်ထားလေသည်။

"ဒီ စိတ်ပုပ်တမန်တော်တစ်ပိုင်းကတော့ ဒါ တမင်လုပ်တာ အသိသာကြီး"

Jimin သံဝင်းတံခါးကြီးအား တဒုန်းဒုန်းထုလိုက် ခြေထောက်ဖြင့် ကန်လိုက် လုပ်နေပေမဲ့ အိမ်ကြီးကတော့ တိတ်ဆိတ်နေဆဲ။

"နည်းနည်းမှ သနားညှာတာမှု မရှိတဲ့လူပဲ ငါ မနက်က စိတ်လှုပ်ရှားခဲ့မိတာကို ပြန်ရုပ်သိမ်းတယ်"

ခပ်တိုးတိုးလေးသာ ဝန်ခံလိုက်ရင်း လုပ်ခဲ့ဖူးသလို ဝန်းနံရံ အမြင့်ကြီးဆီ အရှိန်ယူကာ ပြေးတက်လိုက်သည်။ ခြံဝန်းထဲ ရောက်တာနဲ့ အိမ်ကြီးဘေးလမ်းကြားဆီမှ ဖွင့်ထားတတ်သည့် ပြတင်းပေါက်ငယ်လေးကနေ ခွကာ အိမ်ထဲ ဝင်လိုက်​၏။

"အိမ်ရှင် ssi ကျွန်တော်ပြန်မလာသေးပဲ သော့ခတ်တာတော့ မလွန်လွန်ဘူးလား"

အိမ်ထဲမဝင်ခင် အရင်အော်လိုက်သည့် Jimin ​၏ စကားသံအတွက် မည်သည့်တုံ့ပြန်သံမှ ပြန်မကြားရပါ။ ရန်ထောင်ချင်စိတ်က လွှမ်းမိုးနေသည်မို့ မီးဖိုခန်းလေးဆီ ဦးတည်လိုက်ရင်း ပါးစပ်ကလည်း ခပ်တိုးတိုးလေး ကျိန်ဆဲလိုက်မိသေးသည်။ အသံကြားရဲ့သားနဲ့ တမင်ထွက်မလာတာကိုက အမြင်ကတ်စရာ။

အပီအုပ်မယ် တွေးထားပေမဲ့ လူရှင်းနေသည့် မီးဖိုချောင်လေးကြောင့် Jimin နှာခေါင်းရှုံ့ လိုက်မိ၏။ အပေါ်ထပ်ဆီပြေးကာ အခန်းတံခါးလေး တွန်းဖွင့်ဖို့ ကြိုးစားကြည့်လိုက်တော့လည်း Lock ချထားလေသည်။ ဒီလောက် တိတ်ဆိတ်နေပုံအရဆိုရင်တော့ အိမ်မှာမရှိတာ သေချာသလောက်ဖြစ်သည်။

"ဒီရက်ပိုင်း အိမ်ကို မကပ်နေတာပဲ၊ ဘာတွေများ အလုပ်ရှုပ်နေလို့လဲ"