السيره النبويه

١١ : الجزء الحادي عشر

1️⃣1️⃣
#السيره_النبويه ١١
لما تيجي تصحح لحد معلومة وتقوله على حكم شرعي بيقولك إيه !؟

= فين الدليل !؟

فلما تقوله الدليل كذا كذا ،، من الكتاب ،، أو من السنة ،، أو من الاتنين مع بعض " الكتاب والسنة " ،،

فيقولك لأ ،، المعني مش كدة !!
فتجيبله دليل تاني إن لأ المعني المقصود كدة ،،
يعمل ايييه بقي !؟

يقعد يجادل ،، ويجيب كلام من هنا ،، علي كلام من هنا ،،
ولأ هو المعني كدة وانت اللي غلط ومبتفهمش !!

كل دة ليه !؟
أولا : عشان الكلام الصحيح مش علي هواه ،،
وثانياً : مجرد جدال وخلاص ،، هو كدة خُلق ليعترض !!

و دة اللي حصل زمان مع الأنبياء لما جاءوا بالمعجزات ،،

سيدنا موسي مثلاً جاء بتسع معجزات إلى فرعون وقومه ومحدش منهم آمن ،،
مع إن هما اللي طلبوا المعجزات دي عشان يآمنوا به ،،
لكن هل هما آمنوا !؟ لأ
هو كان جدال وخلاص !!

عشان كدة النبي ﷺ ما استجبش لمطالب قريش لما طلبوا منه يشوفوا معجزات بعينهم ،، مع إن النبي ﷺ قالهم أنا أتيت بأعظم معجزة ،، وهو القرآن الكريم ..

فسيدنا جبريل عليه السلام ربنا بعثه للنبي ﷺ وقاله يختار ،، ان ربنا يعطيهم كل اللي طلبوه ،، بس لو كذبوا بعد ما يشوفوا المعجزات دي هيهلكوا ،، يا إما يصبر عليهم ،،

فالنبي ﷺ قال :
لأ هصبر عليهم ،،
لعل الله يخرج من ذريتهم من يؤمن بالله.❤️

فربنا أنزل قوله:
"وَمَا مَنَعَنَا أَن نُّرْسِلَ بِالْآيَاتِ إِلَّا أَن كَذَّبَ بِهَا الْأَوَّلُونَ ۚ"

لما المشركين شافوا إن النبي ﷺ مشي وسابهم ،، ومنفذلهمش أي معجزة من اللي طلبوها ،، فقالوا بس ،، هو هيضايق لما نسخر منه ونضايق فيه ويبعد بقي عن دعوة الناس للإسلام ،،
والناس ترجع تاني تعبد الأصنام !!

فبدأوا يسخروا ويؤذوا النبي ﷺ والمؤمنين ،،

كانوا كل ما يشوفوا النبي ﷺ يشتموه ويقولوا عليه لأي حد دة مجنون !!

"وَقَالُوا يَا أَيُّهَا الَّذِي نُزِّلَ عَلَيْهِ الذِّكْرُ إِنَّكَ لَمَجْنُونٌ"

ودة ساحر ،، دة كذاب ،، محدش يصدقه !!

"وَعَجِبُوا أَن جَاءَهُم مُّنذِرٌ مِّنْهُمْ ۖ وَقَالَ الْكَافِرُونَ هَٰذَا سَاحِرٌ كَذَّابٌ"

و إزاي يعني ربنا هيبعت رسول من البشر بيأكل ويمشي في الأسواق كدة زينا،،
الرسول دة بيكون من الملائكة مش بشر..

"وَقَالُوا مَالِ هَٰذَا الرَّسُولِ يَأْكُلُ الطَّعَامَ وَيَمْشِي فِي الْأَسْوَاقِ ۙ لَوْلَا أُنزِلَ إِلَيْهِ مَلَكٌ فَيَكُونَ مَعَهُ نَذِيرًا"