السيره النبويه

١٧ : الجزء السابع عشر

1️⃣7️⃣
#السيره_النبويه ١٧

بص إحنا خلينا نتعامل بالمَثَل اللي بيقول " صباح الخير يا جاري ، إنت في حالك وأنا في حالي " ،،
أمين !؟

لأ مش أمين !!

-----------------------

بعد ما خلص حصار ثلاث سنين علي المسلمين والنبي ﷺ ،،
مرض أبو طالب " عم النبي ﷺ " في السنة العاشرة من البعثة ..

الناس كلها توقعت إن خلاص أبو طالب هيموت ،، لانه كان نايم في السرير مش بيتحرك ،،
وكمان كان كِبر في السن ،، وصل عمره لثمانين سنة ،،

فأهل قريش قالوا : لأ دة أبو طالب لو مات هنفضل طول حياتنا في مشاكل مع محمد بن عبدالله !!
ولو كملنا أذي فيه هو والمسلمين ، العرب هتاكل وشنا ، ويقولوا اه بقي ما صدقتوا أبو طالب مات اللي كان واقفلكم بيدافع عنه ،، وهتستفردوا به ، وكلكم عليه!!

طب وعلينا من دة كله بإيه !؟

إحنا نخلي أبو طالب يحللنا الموضوع دة قبل ما يموت ..

ف راح أبو جهل ،، وأبو سفيان ،، وأمية بن خلف ،، وعتبة بن ربيعة ومعاهم ناس تانية من كبار مكة لأبو طالب وهو نايم في سريره وقالوله :

يَا أَبَا طَالِبٍ، إنَّكَ مِنَّا حَيْثُ قَدْ عَلِمْتَ، وَقَدْ حَضَرَكَ مَا تَرَى، وَتَخَوَّفْنَا عَلَيْكَ، وَقَدْ عَلِمْتَ الَّذِي بَيْنَنَا وَبَيْنَ ابْنِ أَخِيكَ، فَادْعُهُ، فَخُذْ لَهُ مِنَّا، وَخُذْ لَنَا مِنْهُ، لِيَكُفَّ عَنَّا، وَنَكُفَّ عَنْهُ، وَلِيَدَعَنَا وَدِينَنَا، وَنَدَعَهُ وَدِينَهُ..

يا أبا طالب ..
طبعاً انت عارف انت إيه بالنسبالنا ،، وإنت شايف صحتك عاملة إزاي وحالتك إيه دلوقتي ،،
وطبعاً احنا خايفين عليك من الموت ،،
وإنت عارف إللي بيننا وبين ابن أخوك ،،
ياريت تبعت حد يجيبه ونشوف حل وسط بيننا ،،
احنا هنسيبه في حاله وهو يسيبنا في حالنا،
هو يخليه في دينه واحنا نخلينا في ديننا ،،

يعني كل واحد حر بقي ،، إحنا مش هنتكلم عن إسلامه ،،
بس برضو هو ملهوش دعوة بأي حاجة هيشوفها ،، ولا يأمر بالمعروف ولا ينهي عن المنكر ولا يدعو إلى الله ..

فبعت أبو طالب للنبي ﷺ ،،

فلما جه النبي ﷺ ،، أبو طالب قاله :
يا إبن أخي ،،
أشراف قومك اجتمعوا عشان يتفاوضوا معاك ، عشان تعيشوا مع بعض في سلام من غير أي خلافات ..

فالنبي ﷺ قاله :
طب إيه رأيك يا عمي أدعوهم لحاجة أحسن من كده؟!

ف أبو طالب قاله : إيه هي !؟
النبي ﷺ قال:
أدعوهم إنهم يقولوا كلمة واحدة بس ،، لو قالوها هيكونوا حكام لفارس والروم ..

فأبو جهل رد بسرعة و قال:
قولي إيه هي الكلمة دي واحنا هنقولهالك طبعاً ..

فالنبي ﷺ قال :
تقولوا لا إله إلا الله ..