ငြိမ်သက်တိတ်ဆိတ်နေသောအတွင်းခန်းမဆောင်ထဲ၌ ဟန်ရှင်းသည်ဧကရာဇ်ရွှင်၏ပုံတူပန်းချီကိုမှီ၍တစ်ကိုယ်လုံးကိုဘောလုံးလိုကွေးထားလျက်ရှိသည်။သူစိန်ခေါ်မှုပေါင်းများစွာကိုရော,
အသက်အန္တရာယ်ရှိနိုင်သည့်အတွေ့အကြုံပေါင်းများစွာကိုပါဖြတ်ကျော်လာခဲ့ပြီးပြီဆိုသော်ငြား ဒီတစ်ကြိမ်တော့သူလုပ်နိုင်တော့မည်မဟုတ်ပေ။
အချိန်များဖြည်းညင်းစွာကုန်ဆုံးသွားပြီးသူလဲအိပ်မောကျသွားခဲ့သည်။
သူ့အိပ်မက်ထဲမှာတော့သူဟာမိဘလဲမရှိ၊သူငယ်ချင်းလဲမရှိ၊ဆွေမျိုးလဲမရှိ...သူတစ်ယောက်တည်းတစ်ကောင်ကြွက်သာဖြစ်သည်။ရုတ်တရက်တစ်ယောက်ယောက်ကသူ့ကိုလှုပ်နှိုးလိုက်သည်။ရီဝေဝေနှင့်ပင်သူမျက်တောင်ခတ်လိုက်မိသည်။မော့ကြည့်လိုက်ပေမယ့်သူ့စိတ်ကဝိုးတိုးဝါးတားဖြစ်နေသေးတာကြောင့်
ဘယ်သူမှန်းမမှတ်မိပေ။အထိန်းတော်ရှို့သည်အနေရခက်နေသောအကြည့်မျိုးနှင့်သူ့ရှေ့မှာဒူးထောက်နေသည်။စကားမပြောရသေးခင်မှာတင် သူမမျက်လုံးများမှာရဲတွတ်နေသည်။သူမ၏စိုးရိမ်စိတ်အပြည့်နှင့်မျက်နှာထားကိုငေးကြည့်ရင်း
သူနှုတ်ခမ်းကိုက်လိုက်မိသည်။သူ့မျက်လုံးများမှာပူတက်လာပြီးမြင်ကွင်းမှာဝေဝါးလာသည်။
အထိန်းတော်ရှို့သည် တုန်ယင်နေသောလက်အစုံနှင့်သူ့ခေါင်းဘေးတစ်ဖက်ကိုလှမ်းကိုင်လိုက်သည်။
"ဒီနေ့လိုနေ့မျိုးကိုကျွန်တော်မျိုးမစောင့်မျှော်နေခဲ့တာကြာပါပြီ.."
"အထိန်းတော်ရှို့"
သူ့ဒူးပေါ်ခေါင်းမှေးတင်လိုက်သည်။မနည်းအားတင်းပြုံးလိုက်ပြီးသူမမျက်နှာကိုအသာလေးလှမ်းကြည့်လိုက်သည်။
"အမြဲတမ်းသိနေခဲ့တာဟုတ်တယ်မလား"အမျိုးသမီးကြီးသည်နှုတ်ခမ်းကိုတင်းတင်းစေ့လိုက်ပြီးမျက်ရည်များရစ်ဝိုင်းလာသည်။
"မြို့စားမင်းနဲ့မြို့စားကတော်..နောက်ဆုံးတော့စိတ်ချလက်ချအနားယူနိုင်ပါပြီ"
မျက်ရည်တွေကသူ့ပါးပြင်တစ်လျှောက်စီးကျလာသည်။သူမကညင်သာစွာလက်လှမ်းလိုက်ပြီးမျက်ရည်တွေသုတ်ပေးလာသည်။
"မင်းကငယ်ငယ်လေးထဲကငိုရတာအရမ်းကြိုက်တယ်..ဘုရင်ဖြစ်ရင်တောင်ဒီလိုမျိုးဆက်ငိုနေအုံးမှာလား"
ဟန်ရှင်းကခနဲ့တဲ့တဲ့သာရယ်လိုက်မိသည်။
"အဒေါ်တို့အားလုံးကကျွန်တော့ကိုဘာလို့ဒီလိုတွေလုပ်နေကြတာလဲ"
သူမငြိမ်သက်နေစဉ်အတွင်း မျက်ရည်စက်များမှာပြောင်လက်ချောမွေ့နေသောကြွေပြားများပေါ်သို့ရိုက်ခတ်ကုန်ကြသည်။
"ဒါကမင်းရဲ့ကံကြမ္မာပဲလေကွယ်.."
သူ့ရဲ့ကံကြမ္မာ..သူ့ရဲ့ကံကြမ္မာ..အဟက်။ရုတ်တရက်သူ့နှလုံးသားတစ်ခုလုံးချောက်နက်နက်ထဲပြုတ်ကျသွားသလိုမျိုး သူ့တစ်ကိုယ်လုံးအားအင်တွေဆုတ်ယုတ်ကုန်လေသည်။
သူမသည်မျက်ရည်မတိတ်နိုင်သေး။
"သခင်လေးသာဘုရင်ဖြစ်မလာခဲ့ရင် သခင်လေးအဖေနဲ့အမေအတွက်ဘယ်သူကများတရားမျှတမှုရှာပေးနိုင်တော့မှာလဲ။မြို့စားကြီးကိုတစ်သက်လုံးအပြစ်သားအဖြစ်ရှိသွားစေချင်တာပါလား..ဒီလိုမှမဟုတ်ရင်
သခင်ကြီးကသူ့နာမည်ကိုသန့်စင်နိုင်မယ့်အခွင့်အရေးကနောက်ဘယ်ချိန်များမှပါလဲ"
သူ့မျက်လုံးတွေစူးအောင့်လာပြီးရင်ဘတ်တစ်ခုလုံးမှာခဲဆွဲခံထားရသလိုလေးလံလာပြီးအသက်ရှုပင်ကျပ်လာသည်။မျက်ရည်များရစ်သိုင်းလာသော်လည်းမငိုနိုင်တော့ပေ။
"သခင်လေးငယ်ငယ်လေးတုန်းက"
ဗလာသက်သက်နှင့်အတိတ်ကိုပြန်ပြောင်းအောက်မေ့နေသည်။
"သခင်လေးကပြိုင်ဘက်ကင်းအောင်နိုင်သူအဖြစ်လောကကြီးကိုစိုးမိုးနိုင်အုံးမှာဆိုပြီးတောင် သခင်နဲ့သခင်မကစနောက်ဖူးပါသေးတယ်..သခင်ကြီးရဲ့အကြီးမားဆုံးဆန္ဒကတော့တစ်လောကလုံးကသခင်လေးနာမည်ကိုသိနေတဲ့အထိ
အထွတ်အထိပ်အောင်မြင်မှုမျိုးရစေချင်တာပါ.."
မိုးကြိုးပစ်ခံလိုက်ရသလိုမျိုးသူစကားတစ်ခွန်းမျှပင်မပြောနိုင်တော့ပေ။
(၁၂)နှစ်တာမျှသူလျစ်လျူရှုရင်းနေထိုင်လာခဲ့သည်။သူ့မိဘတွေအကြောင်းကိုလျစ်လျူရှုရုံမျှမကဘဲ သူတို့ရဲ့လိုအင်ဆန္ဒတွေကိုပါမသိကျိုးကျွန်ပြုထားခဲ့မိသည်။
အထိန်းတော်ရှို့ကသူ့ကိုလက်မောင်းများကြားရစ်သိုင်းဖက်လိုက်ရင်း ပေါင်ခွင်ပေါ်တွင်ခေါင်းထား၍လှဲစေလိုက်သည်။
မျက်ရည်ဝဲလျက်ကပင်ပြုံးရင်းနှင့်သူမကခေါင်းငုံ့ကြည့်လာသည်။အလေ့ကျပေါက်လေ့ရှိသောချင်းပန်းရနံ့က သူမအင်္ကျီကနေတစ်ဆင့်လေမှာဝေ့ဝဲလာသည်။အမေနှင့်တစ်ပုံစံတည်းပါပင်။
"မင်းကငယ်ငယ်လေးကတည်းကဆော့ရတာအရမ်းကြိုက်တယ်..ဆော့လို့မော့လာတဲ့အခါမြို့စားသခင်မလေးရဲ့ပေါင်ပေါ်မှာသွားလှဲနေလိမ့်မယ်..သခင်မလေးကမင်းကြောင့်အလုပ်တွေပျက်ကုန်လို့ငြီးငြူနေပေမယ့် မျက်နှာမှာတော့ပျော်နေခဲ့တယ်..”
“မြို့စားကြီးကတော့မင်းကိုရေးတတ်ဖတ်တတ်ဖို့နဲ့ကိုယ်ခံပညာတွေသင်ပေးခဲ့တယ်..ဒါပေမဲ့မင်းကတော့အမြဲတမ်းပေါ့တိပေါ့ပျက်လုပ်နေခဲ့တာပဲ..မြို့စားကြီးကမင်းကိုအပြစ်ပေးဖို့ကြိုးစားပေမယ့် မင်းကသခင်မလေးနောက်ပြေးပုန်းတယ်လေ..မင်းအဖေခမျာစိတ်ပျက်သွားပေမယ့်ဘာမှလဲမတတ်နိုင်ရှာဘူး”
“နွေဦးရောက်ရင်တော့သူတို့ကမင်းကိုကျေးလက်ဒေသတွေဆီအလည်ခေါ်သွားလိမ့်မယ်”
“မင်းကနွေရာသီမှာလှေစီးရတာသဘောကျတယ်..အဲဒီအချိန်တိုင်းမင်းအဖေနဲ့အမေကညဥ့်နက်တဲ့အထိမင်းကိုအဖော်လုပ်ပေးလိမ့်မယ်..”
သူမနှုတ်ကထွက်လာတဲ့အတိတ်ရဲ့အပိုင်းအစများသည် သူ့ရဲ့အတိတ်ကိုရော၊အနက်ရှိုင်းဆုံးအမာရွတ်တွေကိုပါလှစ်ဟပြနေသည်။သွေးစွန်းသောအတိတ်ရဲ့နေ့ရက်များဟာသူ့ဆီတည့်တည့်ပျံသန်းလာနေသလိုပင်။
မျက်နှာကြက်ကိုငေးကြည့်နေရင်း မျက်တောင်တဖျတ်ဖျတ်ခတ်လိုက်သည်။
“ကျွန်တော်ဧကရာဇ်ဖြစ်လာဖို့ကအဲ့လောက်တောင်အရေးကြီးလား”
သူမကဟန်ရှင်းကျောကိုကြင်နာစွာပုတ်ပေးလာသည်။
“ကျွန်တော်မျိုးမပြောပြီးပါပေါ့ဘဲ..သခင်လေးဘုရင်ဖြစ်မှ သခင်ကြီးတို့ဂုဏ်သတင်းကိုပြန်အဖတ်ဆယ်နိုင်ပါလိမ့်မယ်..သခင်လေးဘုရင်ဖြစ်မှလောကကြီးကိုအထက်စီးကနေမိုးကြည့်နိုင်ပါလိမ့်မယ်..သခင်လေးဘုရင်ဖြစ်မှအရာအားလုံးကိုပြောင်းပြန်လှန်ပစ်ပြီးတိုင်းပြည်ကိုကယ်တင်နိုင်ပါလိမ့်မယ်..”
မျက်ရည်တွေကသူ့မြင်ကွင်းကိုတစ်ဖန်ဝေဝါးသွားစေပြန်သည်။
နောက်ဆုံးတော့သူသဘောပေါက်သွားခဲ့ပြီ။
သူ့ကံကြမ္မာကိုသူသည်ဘယ်တုန်းကမှမပိုင်ဆိုင်ခဲ့။ဘယ်တော့မှလဲပိုင်ဆိုင်နိုင်မည်မဟုတ်။
သူ့မိဘများကွယ်လွန်သွားပြီးနောက် သားဖြစ်သည့်သူ့ကိုနောက်ဆုံးမျှော်လင့်ချက်အနေနှင့်ချန်ထားရစ်ခဲ့ကြသည်။ယခုတိုင်းပြည်သည်သေမင်းနှုတ်ခမ်းဝကိုရောက်နေပြီး များမကြာခင်ကပ်ဘေးဆိုးကြီးကလည်းကျရောက်တော့မည်။သူကတော့အားလုံးအတွက်တာဝန်ထမ်းဆောင်ရတော့မည်။သူအပြစ်တင်ချင်းတင်..သူ့ကိုယ်ထဲမှာစီးဆင်းနေတဲ့တော်ဝင်သွေးကိုသာအပြစ်ဆိုရတော့မည်။သို့သော်လူတစ်ယောက်ကကိုယ်ကိုယ်တိုင်ရဲ့မွေးဖွားခြင်းကိုဘယ်လိုလုပ်များရွေးချယ်ခွင့်ရှိနိုင်မှာလဲ။
သူစိတ်ပျက်လက်ပျက်နှင့်အော်ရယ်လိုက်သည်။သူ့ရယ်သံကဟောခန်းမကြီးတစ်လျှောက်ပျံ့လွင့်သွားသည်။မျက်ရည်ထွက်သည်အထိသူရယ်နေမိသည်။တည်ထောင်သူဧကရာဇ်ရွှင်သည် သူ့ကိုစေ့စေ့စပ်စပ်ကြည့်ရှုနေသလိုပင်။
ထိုတုန်းကရှစ်နှစ်သားလေးသည်ဘဝကြီးသည်ဘာဆက်ဖြစ်မည်ကိုခန့်မှန်းလို့မရနိုင်သည်ကိုသိမှာမဟုတ်ခဲ့။သူ့ကံကြမ္မာကဆုံးဖြတ်ခံထားရပြီးသားဖြစ်နေသည်ကိုလည်းကောင်း၊ဘယ်လိုစမ်းသပ်ချက်၊စိန်ခေါ်မှုတွေကိုပဲကြုံရကြုံရနောက်ဆုံးတော့ထီးနန်းဆက်ခံရမှာကိုလည်းကောင်းကြိုသိမည်မဟုတ်ခဲ့။
‘ကောင်းကင်ထက်ကသက်တံ့၊အခန်းထဲကမွှေးရနံ့၊လေထဲကခရမ်းရောင်တိမ်တိုက်များ၊ပျံဝဲနေသောရွှေနဂါး’
သူ့တစ်ဘဝလုံးစာသည်ထိုစကားလုံးလေးအနည်းငယ်နှင့်ပင်သတ်မှတ်ခံထားရပြီးသားဖြစ်သည်။
နန်းတော်သည်ဤမျှလောက်အေးစက်မှန်း၊ဤမျှလောက်ခြိမ်းခြောက်ဖွယ်ယုတ်မာရက်စက်တတ်မှန်းဘယ်တုန်းကမှသူသတိမထားမိခဲ့။
မွမ်းမံခြယ်သထားသောရက်မများ၊တိုင်လုံးများ၊လှလှပပဆေးခြယ်ထားသောခေါင်မိုးနှင့်လွင့်ခါနေသောခန်းဆီးလိုက်ကာများကြား ယခင်ဧကရာဇ်တို့၏ဝိညာဥ်အပိုင်းအစများကိုမြင်ယောင်နေမိသည်။ဝိညာဥ်တို့မှာသူ့ကိုကြည့်ရှုအကဲခတ်ချင်ဇောနှင့် ပုံတူပန်းချီထဲမှတိုးထွက်ရန်အလျင်လိုနေကြဟန်ပင်။၎င်းတို့ဆက်ခံသူဘာကိုရွေးချယ်သွားမလဲဆိုတာကိုစောင့်ကြည့်ချင်နေကြဟန်ပင်။ကိုယ့်ကံကြမ္မာကိုယ်လက်ခံပြီးတိုင်းပြည်ကိုကယ်တင်မလား..ဒါမှမဟုတ်..ခေါင်းမာမာနဲ့ကိုယ်လွတ်ရုန်းဖို့ကိုရွေးချယ်မှာလား။
ဆရာလျောင်ကစာသင်တဲ့အခါ အမြဲတမ်းပြောဖူးတာရှိသည်။အောင်နိုင်သူကဘုရင်ဖြစ်လာပြီးရှုံးနိမ့်သူကတော့အပြစ်သားဖြစ်လာရသည်တဲ့။ဂုဏ်သရေရှိကြီးကျယ်မြင့်မြတ်လှပါသည်ဆိုသောတော်ဝင်မျိုးနွယ်များပင် မျက်စိတစ်မှိတ်အတွင်းပျောက်ကွယ်သွားနိုင်ပေသည်။
အကယ်၍သူသာခေါင်းမာမာနှင့်ဆက်လက်ငြင်းဆန်နေပြီးလက်မခံခဲ့ဘူးဆိုလျှင် ဧကရီမယ်မယ်သည်သူ့ရဲ့တည်ရှိမှုကိုသတိကြီးကြီးထားနေမှာဖြစ်ပြီးသူနန်းတော်ထဲကနေအသက်ရှင်လျက်မထွက်နိုင်အောင်လုပ်လိမ့်မည်။သူမလိုကောက်ကျစ်စဥ်းလဲသည့်မိန်းမမျိုးသည် ဒီလိုလုပ်ရပ်မျိုးလုပ်နိုင်လိမ့်မည်ဟုသူထင်သည်။
သူဖြည်းဖြည်းချင်းကိုယ်ကိုမတ်အောင်ပြင်ထိုင်လိုက်ပြီး ဧကရာဇ်ရွှင်၏ပုံတူပန်းချီကိုတိတ်တဆိတ်ငေးကြည့်နေလိုက်သည်။
လင်မျိုးနွယ်ရဲ့ဘိုးဘွားဘီဘင်တို့..,ဒါကကျွန်တော့ကိုပေးတဲ့အပြစ်ဒဏ်များလား။
ပုံတူရှေ့ရှိဖယောင်းတိုင်သည်လှုပ်ခတ်သွားပြီး မီးစများသည်ရှေ့သို့ဟုန်းခနဲတောက်လောင်ပြီးလျှင်ရုတ်တရက်ငြိမ်းသွားသည်။
ကောင်းကင်သည်ဖြူဖျော့စပြုလာပြီး ပြတင်းပေါက်များကြားမှတစ်ဆင့်မနက်ခင်းလင်းရောသ်ခြည်တို့မှာတိုးဝင်လာကြသည်။မည်သည့်စကားမှမဆိုဘဲ အထိန်းတော်ရှို့သည်ထရပ်ကာဟန်ရှင်းနောက်တွင်ဒူးထောက်ချလိုက်သည်။
နှုတ်ခမ်းကိုတင်းတင်းစေ့၍သူပြောလိုက်သည်။
“အထိန်းတော်ရှို့..ဒီကိုလာဖို့ကလည်းဧကရီမယ်မယ်ရဲ့အကြံဉာဏ်ပဲ..ဟုတ်တယ်မလား..”
အထိန်းတော်ရှို့သည်သူမနဖူးနှင့်ကြမ်းပြင်ဆောင့်သည်အထိအလျင်အမြန်အရိုအသေပေးလိုက်ရင်း
“ဒါပေမဲ့ကျွန်တော်မျိုးမပြောသမျှစကားတိုင်းကတော့နှလုံးသားရဲ့အနက်ရှိုင်းဆုံးနေရာကနေလာတာပါ..”
ခြေသံများကငြိမ်သက်တိတ်ဆိတ်နေမှုကိုဖြိုခွဲလိုက်သည်။ခြေသံများမှာတစ်စုံမကပေ။အသံများမှာဖရိုဖရဲနှင့်ပြတ်တောင်းပြတ်တောင်းနိုင်နေပြီး ခပ်ပြင်းပြင်းဘွတ်ဖိနပ်သံများ၊လက်နက်နှင့်သံချပ်ကာဝတ်စုံတို့၏ချွင်ခနဲချွင်ခနဲရိုက်ခတ်သံများနှင့်ရောထွေးနေသည်။အထိန်းတော်ရှို့ကသူ့ကိုအကြည့်မလွှဲဘဲစိုက်ကြည့်နေသည်။
ဧကရီမယ်မယ်ထံတွင်တာဝန်ထမ်းဆောင်ရသောအကြီးတန်းအရာရှိသည်ခြေလှမ်းကျဲကျဲနှင့်လှမ်းဝင်လာပြီးရပ်တန့်လိုက်သည်။ထိုလူ့နောက်တွင်ကားလက်နက်အပြည့်အစုံပါသောစစ်သည်တစ်စုတန်းစီရပ်နေကြသည်။နောက်ထပ်အမှုထမ်းသည်ဦးညွှတ်ရင်းနှင့် ဝိုင်ထည့်ထားသောခွက်တစ်ခွက်ကိုကိုင်ကာရှေ့ထွက်လာသည်။
ပိုအသက်ကြီးပုံရသောအမှုထမ်းကြီးသည်သူ့ကိုပြတ်သားသောလေသံနှင့်မေးလာသည်။
“ဆုံးဖြတ်ချက်ချပြီးပါပြီလား”
ရွှေရောင်အပွင့်အဖတ်များသည်ပယင်းရောင်ဝိုင်ထဲတွင်ပေါလောမျောနေကြသည်။ရွှေရောင်ပွင့်ချပ်လွှာပါသောဝိုင်တစ်ခွက်...ဤသည်ကားတော်ဝင်မျိုးနွယ်များကိုသာပေးအပ်လေ့ရှိသော သက်သက်သာသာနှင့်သေစေခြင်းတစ်မျိုးပင်ဖြစ်သည်။သူခွက်ကိုစိုက်ကြည့်ပြီးသရော်ပြုံးပြုံးမိသည်။သူ့ကိုသိပ်ကိုမျက်နှာချိုသွေးနေကြတာပါ့ကော...။
အထိန်းတော်ရှို့မှာကြမ်းပေါ်ဒူးထောက်နေရင်းတုန်ရီနေကာဝမ်းနည်းပက်လက်ငိုကြွေးနေသည်။
မင်းမှုထမ်းကြီးသည်သူ့ကိုမျက်စိမှေး၍အကဲခတ်နေသည်။သူလှောင်ရယ်လိုက်ပြီးဝိုင်ခွက်ကိုလက်နှင့်တိုက်ချပစ်လိုက်သည်။ပယင်းရောင်ဝိုင်များမှာမြေပြင်ပေါ်ဖိတ်စင်ကျကုန်ပြီး ရွှေခွက်မှာအဝေးသို့လိမ့်စင်ထွက်သွားသည်။စစ်သည်တို့သည်ရုတ်တရက်ရှေ့တိုးလာပြီး ဓါးကိုဓါးအိမ်ထဲကနေတစ်ဝက်ထုတ်ထားကြသည်။
“ကုန်းကုန်း”
သူနာမည်တပ်ခေါ်လိုက်သည်။
“မင်းဒီမှာရှိနေစရာမလိုတော့ဘူး”
ကုန်းကုန်းကြီးသည်နားလည်သဘောပေါက်သည့်အပြုံးမျိုးနှင့်ဘေးဖယ်ပေးလိုက်သည်။ကြက်သွေးရောင်လင်ဗန်းကိုင်ဆောင်ထားသောစစ်သည်တစ်ယောက်သည်ဦးညွှတ်လျက်ရှေ့တိုးလာကာဒူးတစ်ဖက်ထောက်ထိုင်ချလိုက်သည်။စစ်သည်တော်များမှာအနီရောင်သံချပ်ကာနှင့်အနီရင့်ရောင်ဝတ်ရုံရှည်ကိုဝတ်ဆင်ထားကြပြီး အကုန်လုံးမှာလုပ်နိုင်ကိုင်နိုင်စွမ်းရှိသည့်လူငယ်များဖြစ်ကြသည်။ကြက်သွေးရောင်လင်ဗန်းပေါ်တွင် မြည်ဟိန်းနေသောမဟူရာနဂါးတစ်ကောင်၏ပုံတူကို၎င်း၏ချွန်မြမြလက်သည်းများနှင့်အတူထည့်သွင်းခြယ်သထားသည့်မင်းဧကရာဇ်တို့၏အဆောင်အယောင်ကိုးပါးအပြင် ပုလဲသီထားသောကြိုးကိုးချောင်းနှင့်တန်ဆာဆင်ထားသောပုလဲကိုးပါးသရဖူပါရှိနေသည်။ပုလဲသီထားသောကြိုးများမှာအချင်းချင်းရိုက်ခတ်နေသဖြင့်တချွင်ချွင်အသံပင်မြည်နေကြသည်။
“အခမ်းအနားဝတ်စုံကိုပြောင်းလဲဝတ်ဆင်ပေးဖို့အရှင်မင်းကြီးကိုမေတ္တာရပ်ခံအပ်ပါရစေ..ဧကရီမယ်မယ်ကအရှင့်ကိုစောင့်နေပါတယ်”
မင်းမှုထမ်းကြီးသည်သူ့ကိုတရိုတသေပန်ကြားလာသည်။
အလိုလေး..နောက်ဆုံးတော့သူကံကြမ္မာရောက်လာခဲ့ပြီပဲ။
သူစကားမဆိုဘဲ ဝတ်ရုံဆီသို့လက်လှမ်းလိုက်သည်။
ထို့နောက်သူဟားတိုက်ရယ်လိုက်ရင်း ဝတ်ရုံကိုဆွဲဖြန့်လိုက်ကာကိုယ်ပေါ်တွင်ကောက်ဝတ်လိုက်သည်။မင်းမှုထမ်းများကသတိကြီးစွာထားပြီးသူ့ကိုကူညီပေးကြသည်။ဘုရင်တစ်ပါးကိုခစားနေရသလိုမျိုး သရဖူကိုဂရုတစိုက်နှင့်ဆောင်းပေးလာကြသည်။သူကိုယ်ကိုမတ်အောင်ထားလိုက်ပြီးကူညီဝတ်ဆင်ခွင့်ပြုထားလိုက်သည်။
စစ်သည်များကနန်းတော်တံခါးများကိုဖွင့်လှစ်လိုက်ပြီးခါးညွှတ်ကာအရိုအသေပေးကြလေသည်။နေထွက်လာပြီဖြစ်တာကြောင့်အရုဏ်ဦး၏လင်းရောင်ခြည်သည်သူ့မျက်နှာကိုလာရောက်ရိုက်ခတ်လေ၏။
ထို့နောက်ဖြစ်ပျက်သမျှသည်သူ့အတွက်အတန်ငယ်ဝေဝါးလို့နေသည်။ဧကရီမယ်မယ်သည်မှူးမတ်အရာရှိအားလုံးကိုဆင့်ခေါ်လိုက်ပြီးကြေညာခဲ့သည်။
‘မြို့စားကျောက်ယွဲ့၏အကြီးဆုံးသားလဲဖြစ်..’
‘ဧကရာဇ်မင်၏မျိုးဆက်လည်းဖြစ်သည့်’
သူမကစကားဆက်သည်။
‘ဤကလေးကိုသူ့အဖေ၏သစ္စာဖောက်လုပ်ရပ်အတွက်ဗွေမယူပါဘဲ..တိုင်းပြည်၏လက်ရှိကြုံတွေ့နေရသောအခြေအနေအရပ်ရပ်အရ သူသည်အနီးစပ်ဆုံးမျိုးဆက်လည်းဖြစ်သည့်အပြင် ထူးချွန်လိမ္မာထက်မြက်သည့်အတွက်ကြောင့်လည်းကောင်း၊ တိုင်းပြည်ကြီးဆက်လက်တည်တံ့စေရန်ရည်ရွယ်မျှော်ကိုး၍လည်းကောင်း ဤသူကိုဆက်ခံသူအဖြစ်ထီးနန်းကိုလွှဲအပ်လိုက်သည်..’
သူမပြောနေစဥ်အတွင်းစိတ်ထဲကနေရယ်မိသည်ပင်။အောင်နိုင်သူတွေကသာသမိုင်းကိုရေးထိုးနိုင်သတဲ့..။အို..သူ့အဖေရဲ့သေဆုံးမှုကမတရားလိုက်ပါဘိ။
YOU ARE READING
Cold Sands[Myanmar Translation]
Historical FictionAll the credits belong to the original author, publisher and english translators. Source from novelupdates.com Original Author_ Mu Yun Lang Qing English translator_ayszhang Status in COO_ 41 chapters(complete) တငွေ့ငွေ့တောက်လောင်နေတဲ့စစ်ပွဲမီးလျ...