وفي اجواء الجمعَة الي لامتهم ولامة عائلة ابو عبدالله وعائلة ابو فارس والعم عبدالعزيز والجد والجدة واحفادهم حولهم والاصوات تعالت بالضحكات ومطولين عن هالجمعات الحلوه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الجد: الله حيهم يارجال عزالله نورتو
العم عبدالعزيز: الله يبقيك يبوي
ابوفارس: منور ب اهله ياعمي
ابوعبدالله: والله مطولين عنكم وقلنا نجمعكم هالليله ونسمر بها معكم
العم عبدالعزيز: والله زين ماسويت يابو عبدالله اني مبطي ماسيرت عليكم
وخذتهم السوالف الحلوه
عند ريم والبنات
ريم: شادن وشلون اهلك
شادن: والله بخير ياعيوني مبسوطين بالرياض
ريم: روحي لمهم وسلمي عليهم مبطيه عنهم
شادن: اي والله خاطري قريب بإذن الله
" تنويه ان ابو شادن وامها منفصلين وهيا عايشه مع جدتها بالشمّـال "
ريم: وكيف حياتك ياروحي ناقصك شيء وتبين شيء علميني ولايردك الا لسانك
شادن: لا ياعيوني ماناقص شيء ابد ولو ناقص جدي محمد ماقصر
ريم: الله يخليه لك ياحبيبتي ويحفظهم له
شادن: امين ياعمري انتي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
عند عبدالله وفارس
فارس: عبود شرايك ندق على مازن
عبدالله: تم كلمه زمان عنه
فارس: يالله دقايق بقوم ادق عليه واجي
عبدالله: خذ راحتك
عبدالله قام يشب النار وبيسوي الشاهي وهو يهوجس بالي صاير وبنص هواجيسه وهو مقابل النار دق عليه دحوم
عبدالرحمن: عبوود شخبارك ياعين اخوك طيبين؟
عبدالله: طيبين الحمدالله شخبارك انت وينك ماتجي يمنا؟
عبدالرحمن: والله رحت الصناعيه عندي كم شغله ماضنتي اجل وطريت علي ودقيت عليك
عبدالله: زين ماسويت
عبدالرحمن: وشفيه حسك منت على خبري
عبدالله: اهخ يادحوم شقول ووش ما اقول
عبدالرحمن: يساتر لهدرجه
عبدالله: اي والله وزود بعد
عبدالرحمن: اجل انتظرني اخلص شغلتي ونتقابل بالاسطبل يمديك؟
عبدالله: تم ماعليك
عبدالرحمن: هيا فمان الله
عبدالله الي كان يبي احد يسمعه بكل اريحيه وياخذ منه قرار ونصيحه واختار افضل واحد ممكن يسمع له ويفهم منه لان لو بيقول لفارس امكن يفهمه غلط ومايسمع الباقي منه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مرت ساعتين ووصل عبدالرحمن الاسطبل وضبط براد الشاهي ودق على عبدالله
عبدالله: يالله جاي ياعيني
عبدالرحمن: احتريك
راح عبدالله وهو بطريقه جالس يهوجس وشلون يشرح لعبدالرحمن الي صاير وكيف بيفاتحه بموضوع ريم وانها كانت تحب خالد وبيفتح موضوعه وخايف يتحسس من الوضع ومو عارف شيء غير انه يبغى يتكلم ويطلع الي جواته وصل الاسطبل واستقبله عبدالرحمن وجلسو قبال النار وتحت ضو القمرا
عبدالرحمن: اي بالله ياعبود وش صاير معك
عبدالله: والله الموضوع قلبي يادحوم
عبدالرحمن: وشبلاه قلبك؟
عبدالله: احب ريم يادحوم وماني عارف وشلون افهمك الوضع بس بقولك الوضع وانت وجهني والله اني متحير حييييل
عبدالرحمن: ريم ماغيرها؟
عبدالله: اي ريم اخت فروس
عبدالرحمن: ونعم البنت والله
عبدالله: اهخ يادحوم انا احبها بس هي ماتحبني
عبدالرحمن: وشلون ماتحبك وتحبها؟
عبدالله: الحال غير يادحوم تحب خالد الله يرحمه وخالد كان يحبها
عبدالرحمن عدل جلسته وتغيرت نبرته: اسالك بالله؟
عبدالله: اي والله صادق ومالهم شيء وتوفى الله يرحمه وماتهنو ببعض وكانت تدري اني احبها بس خالد مايدري
عبدالرحمن: عبود صاحييي انت وشلون حبيتها واخوك يحبهاا؟؟ وشلون تجرأت
انفعل عبدالرحمن وصد عن عبدالله وقام يحرك البراد ويقرب حول النار
عبدالله: يادحوم والله العظيم اني قلت لها قبل يحبها وعلمتها لما شفتها بتحب خالد
لف دحوم عليه وعدل جلسته
عبدالرحمن: يعني قبل يتكلم خالد ؟
عبدالله: ايه يادحوم وهي كانت واضحه معي للامانه وقالت ماتبيني اشوش قلبها وعقلها واني ابعد عنها بس ماقدرت هذا خالد مات الله يرحمه واشوف حزنها عليه وانا احبها ولا اقدر على حزنها
عبدالرحمن: والله شيء يحير الصدق بس شوف الحين هي ماتقدر تحبك بهالسهوله وتو متوفي خالد ماطاب جرحها بعد اصبر عليها ولاتجيبها بعاطفه فكر بعقلك ولاتسمع لقلبك وخلي الموضوع رسمي بعدين وروح طق الباب وخذها لك
عبدالله: والله يادحوم احس اني ما اقدر امسها بشيء من كثر ماهي مثل النسمة على قلبي ودام هذا رايك شورك وهدايه الله
عبدالرحمن: اي والله وتوكل ع الله بكل امور حياتك ياعبود ولاتستعجل بشيء
عبدالله: بإذن الله ياعين اخوك والله ان كانت ضايقه فيني الوسيعه ولكن من عقبك تريحت
عبدالرحمن: ماسوينا شيء ياخوك اي وقت تبيني بتلقاني يمينك
عبدالله: الله يديمك يابعد الدنيا
كملو سوالف مع بعضهم ومع الشاهي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
عند شاديه والجد وابو عبدالله
شاديه: يابوي عندي طلب وخاطري يصير والله
الجد: امري يابعدي تم قبل تقولين
شاديه: الله يسلمك ويخليك يبعد قلبي بس ودي ان نروح لمكه وناخذ عمره عني وعن ولدي خالد ان ماطلبت كثير
الجد: اي والله زين مافكرتي يابنتي تم اجل نهايه الاسبوع بإذن الله نروح انا وانتي وابو عبدالله
ابوعبدالله: ان شاءالله
شاديه: الله يخليك لنا ياحيي ولايحرمنا منك والله يتقبل مننا ان شاءالله انوو النيه من الحين لاتنسون
الجد: اي والله بإذن الله
العم عبدالعزيز: والله ان ودي اروح معكم ولكن ما امداني ووراي شغل اقابله ولكن بإذن الله تتيح لي الفرصة واروح
ابوعبدالله: ماعليك ياخوك باذن الله تروح والجيات اكثر
العم عبدالعزيز: ان شاءالله الله يسمع منك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
عند ريم والبنات
ريم: ايوه وشرايكم نروح مع شادن ياميس؟
ميس: وين الرياض؟
ريم: اي احس ماودي اخليها بروحها
ميس: والله تم بس شوفي اخواني وابوي مدري ىش يقولون
ريم: ماعليك عندي
شادن: ليه يبنات ماله داعي اتعبكم
ريم: اسكتي ماهو تعب ولاشيء بنجي معك
شادن: ياروحي انتم والله اني استانست
ميس: اكيد حبيبتي بتستانسين بس بالاول اقنعي ابوي
شادن: ازهليني اقنعه والله بس عبير معانا؟
ريم: مدري كلموها
ميس: مو هي مشغوله مع اختها بخصوص البيت والنقل
شادن: ايوه صح اجل مومشكله خلاص يكفي انتم
ريم: تمام اجل نتمم اذا وافق عمي ابوعبدالله
ميس: اهخ يارب
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
ريم: عمي
ابوعبدالله: لبيه
ريم: لبيت حاج، بغيت اطلبك طلب ولاتردني
ابوعبدالله: سمي ماعاش الي يردك
ريم: الله يسلمك بس بغينا نطلع مع شادن للرياض بتزور امها وابوها وتسلم عليهم ونرجع
ابوعبدالله: بس وشلون بتروحون؟
ريم: ابد بسيطه بنحجز رحله لنا انا وميس وشادن وواحد من العيال يوصلنا المطار وام شادن بتستقبلنا هناك
ابوعبدالله: والله انا ماعندي مانع اجل بس شوفو شاديه
شاديه: ماعليكم يحبيبتي روحو والله يسرها عليكم
ريم بفرح ضمت ابوعبدالله وحبت راسه: الله يسعدك يعمي
ابوعبدالله بضحكه خجل: ياحبيبتي انتي امري وحنا نلبي
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
راحت ريم تركض للبنات مستانسه
ميس: اقبلت ريم ومستانسه لايكون صارتت
ريم: ابشركم اقنعتهم ووافقو
ميس: منجججدك؟؟
ريم: اي والله
ميس: ريموه منتي هينه وشلون اقنعتيه؟
ريم بضحكه: بسيطه
شادن: يعني رايحين معاي يالله ماني مصدقه بنستانس مررره وبتفرح امي
ميس: ياحياتي انتي
ريم: اي اكيد وجهزو بكرا طالعين المطار بعد مانحجز
شادن: متى تبون الرحله؟
ميس: احس الفجر افضل عشان نوصل الصباح
ريم: ودي يبنات اشوف الدنيا بليل من الطياره
شادن: ونا بعد والله
ريم: اجل شرايكم نحجز ساعه 6:00 المغرب ونوصل العشاء؟
اول قبل العشاء
ميس: خلاص تم
ريم: تمام اجل بدور حجز لبكرا ونتوكل على الله
ميس: ونعم بالله
راحت ريم تدور حجز وشادن وميس يخططون وش بيسوون بالرياض
وايش بيكون الجدول هناك
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
عند عبدالله وعبدالرحمن
عبدالله: يالله يادحوم تخاوي البيت؟
عبدالرحمن: لاوالله رح انت ولاحقك بعدين عندي كم شغله بخلصها بالاسطبل وجاي
عبدالله: تمام اجل موفق خير يابعدي
عبدالرحمن: بالتوفيق وسلملي ع الموجودين
عبدالله: ابشر يوصل ان شاءلله
طلع عبدالله من الاسطبل وهو كان جاي بسيارته ودق عليه مازن بالطريق
مازن: عبود شخبارك ياواحشني
عبدالله: بخير ياواحشني شخبارك انت؟
مازن: والله ابشرك زين
عبدالله: ياجعله دوم مو يوم وشعندك من علوم
مازن: والله ابد ودي اسمع حسك واتصلت عليك
عبدالله: تعال تعال للبيت عندي نتكي بالمشب ونلعب بلوت وشغل زين
مازن: والله جت بوقتها عاد انا مدري وش اسوي
عبدالله بضحكه: اجل تعال يالله وفروس هناك يحتريني
مازن: يالله مسافه الطريق
عبدالله اتصل على فارس
فارس: هلا عبود وين رحت انت
عبدالله: هذاني جاي من الاسطبل جهز المشب مازن جاي
فارس: وش الطاري
عبدالله: ابد والله كذا
فارس: يالله زين اجل
فارس راح يرتب المشب وعبدالله الي راح يجيب معاه حلا وامور الجلسه ومازن يتجهز وجاي لهم
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
يتــبع :
