فتحتا عيوني وانا بين واعيه وما واعيه ماكنت عايزه افتح عيوني ماعايزه اسمع خبر كعب، عاينتا لي امي الكانت واقفه جنبي وبتدعي لي
بانه: امي وكان صوتي متقطع شديد، امي البيبي كويس؟
امي: بانه قولي اللهم اجرني في مصيبتي واخلف لي خيرآ منها
بانه: قصدك شنو يا امي يعني البيبي مات، يعني خلاص ضاع لا ماتقولي لي كدا ماتقولي وبديت اكورك، امي مسكتني وبدت تتكلم معاي بانه اهدي وقولي الكلام القلتو ربنا بربط علي قلبك وربنا يجعلو ليك سلف صالح انتي قدمتي حاجه في الاخره ماتزعلي دا امر ربنا
بانه: حاضر يا امي وبديت اردد اللهم اجرني في مصيبتي واخلف لي خيرآ منها قلتها كم مره حسيت انو جواي يقين تام انو الحصل دا لي خير وانو الخير فيما اختاره الله، وانو لازم ارضا والرضا بي المقسوم عباده والصبر عواقبو محموده، اي حسيت انو قلبي اتقسم النص وحسيت انو روحي دايره تطلع وحسيت انو الفقد الفقدتو دا ماعندو عوض، حته منك تروح ماحاجه ساهله بس كنت صابره، كلهم جوني داخلين ابوي واخواني مالك كان واقف بعيد ماقرب مني وكانت عيونو وارمه من البكاء قعدوني كم ساعه وبعدها جيت البيت ماكان عندي نفس انو اشوف اي زول او اتكلم مع زول عايزه اكون براي دخلتا غرفتي ورقدتا ختيت يدي علي بطني وحاسه انو دي كل حلم وخلاص الدنيا حاتصبح وحاينتهي اي شي ماقادره اتخيل انو انا فقدتو، بقيت بدعي كتير انو ربنا يصبرني
بعد اسبوع جاني راشد داخل سلم علي وقعد جنبي
راشد: حاسه نفسك كيف؟
بانه: الحمدلله كويسه
راشد: قبيل جاء مالك هنا وطلقك قدامنا كلنا وقال ورقتك حايجيبا ليك في اسرع زمن، سمعتا الكلام حقو ومن غير ما احس كانت دموعي بتنزل، اي انا ماعايزه مالك في حياتي بس الفتره العشناها مابسيطه نحنا كان في بينا بيبي، راشد كان ساكت وبعد مسافه حتي اتكلم معاي
راشد: الحاجه دي صعبه يابانه بس انتي مريتي بي اصعب منها ودي كمان حاتتجاوزيها عادي، بس انتي خلي عندك ثقه في نفسك وكوني متاكده انو حاجه ماعايزاها مابتحصل واسي انتي لو عايزه مالك برجعك ليهو ومابزعل منك والله مهما كان بقيف معاك في اي حاجه والحاجه الفيها مصلحتك بتهمني
بانه: اي يا راشد الحاجه دي ماهينه وصعبه وعشتا مع مالك فتره وبينا ايام كتيره حلوه بس دا مابيعني انو انا ارجع ليهو، مابقدر اعاين في شو ولابقدر اقبلو لي راجل تاني في حاجه بينا اتكسرت تاني مابتتصلح
راشد: طيب الله يكتب ليك الخير في حياتك الجايه انا كدا بقيت مرتاح ومطمن انتي ارتاحي واي شي بلزمك انا في، وطلع طوالي بقيت قاعده وشريط حياتي انا ومالك كلوووو كان قدامي الحلو والكعب، قررتا انو من اليوم بعمل الحاجه العايزاها انا وعمري تاني مابسمع كلام زول في حاجه بتخصني يعني اعيش لي نفسي وبس
