" منزلي "

يتطمن بالي..

سويت كل شي يمنعني اني اطلع من غرفتي بس طفشششت! مو منطقي اقعد ساعات بغرفه وحده !
حاولت اقعد لين الظهر عشان اتعذر بالغداء
ماصدقت سمعت الاذان ونزلت لـ تحت

كان للأن مستلقي ومشغل مكيف الصاله على ابرد شيء
وكالعاده دخلت المطبخ ب هدوء و تجاهلت وجوده رغم انه قدامي بالصاله اشوف نص جسمه الممتد
واشوف بطنه كان بدون تيشيرت بس الشاش مغطي صدره

بديت اشوي الدجاج وقطعت خس و شبت و شرايح خيار ، طبخه غريبه ما ادري ايش اسمها بس اسويها دايم خضار مقطع و ذرة بصوص الرانش مع دجاج مشوي

كان صالح صامت ماتكلم ولا سألني ولا شيء
قطعت الصمت بـ سؤال..
انتي : تبي احط لك ؟
مارد علي بس شفت جسمه يتحرك
رفعت راسي بشوفه
انتي : صالح ؟
رحت للصاله بشوفه بس طلع نايم
مغمض عيونه بـ براءه ونايم ، المكيف كان بارد فعلًا ونازل على جسمه

كلمت نفسي بس هالمره مو بـ صوتي الداخلي تكلمت فعلًا..
انتي : ياروحي انا مو لابس تيشيرت اكيد انك بردان
حطيت اصابعي على كتفه وفعلًا كان زي الثلجه
طلعت لـ غرفتي وجبت له لحاف خفيف وغطيته
رجعت للمطبخ اكمل الاكل..

^^^^^^^^^^^^^^
اخر شيء اتذكره وجهها وهي تطل علي من فوق
ضحكت على لطافتها وكيف انها تحاول تطمن علي بأي طريقه..

نومي خفيف اصحى من الاصوات الخفيفه..
صحاني صوتها وهي بالمطبخ ،، قاعده تسوي الغداء اكيد
ماتحركت ولا فتحت عيوني كنت احتاج استرخي بـ مكاني بس..
كانت تسألني اذا ابي غداء وتجاهلت سؤالها ما ابيها تعرف اني صاحي

سمعتها تتكلم..
- ياروحي انا مو لابس تيشيرت اكيد انك بردان
حسيت ب اصابعها تلمس كتفي الايمن.. لحظات وحسيت ب لحاف يغطي جسمي ،، ماتقدر تخفي حنانها..
كانت هي ، غطتني عن الهوا البارد اللي كان يضرب جسمي المكشوف..
ابتسمت لا شعوري..

^^^^^^^^^
جهزت الغداء وحطيته بالطاوله ورتبتها
اصحيه؟ يسوى اصحيه من نومه عشان ياكل ؟
هو ما اكل شيء غير الفطور وبيطلع للنادي بعد شوي اكيد يحتاج يتغذا
بصحيه خلاص

مسكت كتفه وهزيته بهدوء
انتي : صالح .. اصحى الغداء جاهز
يلا عشان يمديك تجهز تطلع للنادي
صالح : يله ثواني..
انتي : رح غسل وجهك و صل الظهر انا بنتظرك على الطاوله
فتح عيونه بـ ابتسامه
لفيت جسمي كنت بمشي .. او بهرب من نظرات عيونه

مسك معصم يدي قبل امشي..
صالح : انتي اللي غطيتيني ؟
انتي : لا الخدم والحشم جو وغطوك و سوو الغداء وانا كنت ب جلسة المساج
صالح : ههههههههه شكرًا

ضحكته يالله تجذبني وتضعفني! حاولت ما اناظره واشيل عيوني عنه..
انتي : عشاني حرقتك مو عشان سواد عيونك هاه!
صالح : الواضح ان الحرق جا معاه خدمات VIP
انتي : يلا قوم على الغداء ! عشان تلحق خدمات الVIP
انهى النقاش بـ كلمة "يلا.." وطلع لـ فوق يغسل وجهه