" لو الأرض ماتاسعّ عناد .. ياسعه قلب نجّد " .

البارت الثاني ..

الجّد علي لـ محمد : يامحمد ماودك ناخذ نويّر لعناد !
محمد : الشور شورك ياجدي مالنا شور عقبّك
الجّد علي : عجل توكلنا على الله ! وعناد بيوافق غصب مهوب طيبٍ منه
حثلين : ياجد أنت أخبر بعناد وعناده لاتجبره على شي مايوده وذا زواج مهوب لعب عيال
الجد علي : بياخذ نويّر وان ماخذاها لاهوب حفيدي ولا أنا أعرفه
أنقهر عناد بسبب الموقف اللي حطه فيه جده اولاً محد كان يعرف أن عناد مسحور من وحده وهالسحر من وحده تحبه وهو ما بدالها هالحب
وسحرته ولا أحد كان يعرف أنه وقت نومه يقول كلام مكتوم بقلبه وماوده يحرج نفسه مع بنت عمه ولا وده بالزواج من أساسه لاكن .. محد كان مقهور كثر نويّر !
نويّر : أهه يانجّد بيزوجوني ميت القلب غصب وأنا ما أحبه ولا أواطنه
نجّد : توكلي على الله ياختي ومايضيع عند الله شي وأن كن ربي كتب مانتوا متزوجين
نويّر : بس يانجد أنتي تعرفين أني أموت بحثلين !
نجّد : ياروحي أنتي والله أدري لاكن حثلين مو وأضح يبي يتزوج مره ثانيه ولالا من عقب ما كسرته مرته وهو كاره حتى البشر
نويّر : أنا يانجّد مستعده أعيش معه بالمكان الي وده وأجبر كسوره من مرته
نجّد : يكتب الله لكم الخير
كان لـ عائلة ال مسعود محل تجارة بشوت فالديره وبدا عناد العصر يفتح المحل وينظفه عشان ينسى أن جده وده يزوجه غصب
أبو عناد : ياولدي خذ بكلام جدك وتزوج وعش حياتك مابقى من العمر كثر ما مضى
عناد : يبه فديتك أنت داري أني مانيب فاضي أشغل روحي في مره ولا طلباتها ودوامي في أي وقت بيقدر على ربي أني أموت
أبو عناد بخوف : بسم الله عليك ياولدي والله لايفجعنا فيك لاكن ترا جدك ماعاد بيرضى عنك أن رفضت
عناد : معليه
فتح باب المحل ودخل أبو ناصّر :
تعريف بسيط لابو ناصر عنده من البنات غزيل ومن العيال ناصر
وغزيل أقوى بنت بالديره ! ومحد يقدر على فراقها ونيسه ولاكنها شر لمن عاداها واخوها ناصر نفس الطبع نسخ لصق
أبو ناصر : السلام عليكم مساك الله بالخير يامشعل
أبو عناد : يامرحبا يا أبو ناصر وش علومك طمنا عنك
أبو ناصر : والله أبشرك بخير والحال يسرك
عناد : يبه بجيب لكم شاهي من هارون وأجي
~ عند بوفية هارون ~
عناد : هارون عطني 3 شاهي 2 بدون سكر
وبالصدفه عناد لمح نفس الشخص اللي لمحه يوم كانوا عند السوبرماركت ولاكن قال يمكن اتوهم
خذ الشاهي لأبوه وطالت السوالف وبيع البشوت وأمسى الليل
أبو عناد : سكر المحل ياولد والحقني
عناد : لايبه بروح لناصر بنسمر وبعود مانيب مبطي
أبو عناد : طيب
~ في عزبة ناصّر ~
ناصر : ياعيال ماشفتوا عناد؟
سأل ناصر على دخلة عناد فزوا الكل له ورحبوا الكل فيه وهلوا
ضيدان : يامرحبا بالرفيق القاطع !
عناد : ضحك وقال مانيب قاطع امور الدنيا والوظيفه
ضيدان : الله يسهل .. وش ودك تسمع من القصيد ياضيفنا؟
عناد : اللي ودكم
بدأ ضيدان بالقصيده وكانت :

‏ولا في حبة المبسم خيانة وانشد البخاس
‏واليا ضمك حبيبك تحت مدلوق الشعر خفّه

‏ولا مثل اللقا وانتو على ضوح القمر جلاس
‏ولا مثل العيون تنثّر المشتاق وتلفه

‏وخايف اليا تلاقينا تذوب النفس في الأنفاس
‏واليا سلهمْت بعيونك تروح الروح مختفّه .

كان عناد يقول في نفسه : ليتني أقدر أكون فيها مع وحده أحبها أحبها من صميم القلب ولا أبدلها بغيرها من كبر غلاها .. ضحك عناد ويقول لنفسه من جدك ياعنّاد بتحب؟ من اللي بتقبل بك؟
ومشت الليله بقصيد وضحك وسمّره ماعقبها سمره رجع عناد البيت بحدود الساعه 12 والباب مسكر !  قال وش السواه ؟ مالي الا أشقح السور وأول ماشقح كانت نجّد بالحوش ونزل من الجدار وبالصدفه نجّد بدون غطاء ويحلف عناد في نفسه أنه ماشاف مثل جمالها وصغر حجمها و وتدارك روحه وصد
عناد : المعذره مادريت أنش هنا
نجّد : مايخالف بس أنت من وين جاي؟
عناد بتعجب ! : وأنتي شدخلش؟
نجّد عشان تقهره : لابس كان قلت لك تسلم لي على حبيبي
عناد بقهر الغيره بحكم انها بنت عمه : ومن حبيبش؟؟
نجّد بضحك واستهزاء : مالك دخل !
عناد سحبها بجسمها الصغير الي يصغر جسمه بأضعاف وقربها منه قرب مايقربه الا العاشق لمعشوقه لدرجة أن مبسمها قرب من مبسمه وعيونهم تلاقت !
عناد : نجّد تحاكي من حبيبش !!
نجّد : شبلاك أنت مريض؟ أبعد مني !!
عناد : مانيب مبعد لين تحكين !
نجّد : امزح يالمريض أبعد مني !!
عناد تدارك نفسه وخلاها ورأح لغرفته وهو يحس بشعور غريب بقلبه ولا مره حس فيه ولايذكر أن هالشعور يدخل قلبه! كان شعور مالي قلب عناد بالسعاده والغيره بسبب نجّد ولاكن !
.بجانب أخر فيه من يحترق غيره على نجّد وبالمقابل محد أنتبه له ولاكنه حلف مايخلي نجّد لعناد وأن ياخذها طيب ولا بيقلب الدنيا عليهم !
__________________________
أدعموني بالتصويييت والتعليقات ويارب
تعجبكم الأحداث القادمه 😢🩵🩵🩵 .