" لو الأرض ماتاسعّ عناد .. ياسعه قلب نجّد " .

البارت الثامن .

~ في غرفة حثلين ~
ابو عناد : حثلين جدك يقول انك ضايق شبلاك يابوك وش محزنك؟
حثلين : فديت روحك مانيب حزين لاكن طرا علي موضوع الهنوف
ابو عناد بحزن : أتركها عنك يابوك وروح لجدك
حثلين : ابشر
الجد علي : وينك يابوك ابطيت علي؟ وش محزنك؟
حثلين بابتسامه : فديت كبدك وش يحزني بس عجزت من التعب توني راجع من البل وهالك
الجد علي : أبرك يابوك
~ فالقسم ~
ضيدان في مكتبه : كييييف صقر خاطف نجد ؟ وليه خطفها وحطها عند الغريب وهي بنت عمه ؟
سكت على دخول عناد : وش تقول ياضيدان تحاكي روحك ؟
ضيدان : لا بس عناد لازم ..
عناد : لازم وش؟
ضيدان : لازم تجيب نجد للتحقيق
عناد بصدمه : وليه اجيب نجد للتحقيق ؟
ضيدان : جيبها وبعدين تعرف
عناد : الان تقول !! ليه اجيب نجد ووش عرفك فيها اصلاً !!
ضيدان : تذكر يوسف التركي الي داهمنا شقته ؟
عناد : انجز
ضيدان : يوسف قال ان نجد كانت بالشقه والي جابها صقر
عناد : صقر ؟؟ وليه صقر بياخذ نجد ؟؟؟
ضيدان : مادري لاكن نجد لازم تجي للتحقيق
عناد : طيب طيب روح لشغلك وانا بتصرف
طلع عناد من القسم للبيت ويهوجس بموضوع نجد وصقر ليه صقر خذها ؟ وحطها عند الغريب ؟
~ فالبيت ~
عناد : بينه
بينه : لبيه؟
عناد : نجد هنا؟
بينه : ايه شتبغي بها؟
عناد : ادعيها
بينه : طيب
بينه : نجود عناد يبغيش
نجد برعب : بسم الله وش يبغي ؟
بينه : مادري
راحت نجد للمجلس الي كان فيه عناد وكان واضح من ملامحه العصبيه والضيقه وكان للان ببدلة الدوام وبريهته ، وبالصدفه حط عيونه في عيونها ومن بعد نظراته حست نجد ان مافي العالم احد سواهم من جمال عيونه ونظراته ولاكن تداركت الوضع يوم دعاها
عناد : نجد هيه وين سرحتي ؟
نجد : هلا شتبغي ؟
عناد : اقولك لازم تروحين معي للتحقيق والان تقولين وش وداك لشقة صقر ؟
نجد بخوف : صقر ؟؟؟ انا ماشفت الا واحد متلثم دايم ماعرفته وواحد اسمه يوسف بس صقر شدخله؟ بعدين هذا المتلثم هو الي جابني لشقه!
عناد : طيب طيب البسي عباتك وامشي معي
نجد : طيب
عناد : محمد
محمد : لبيه؟
عناد : باخذ نجد للتحقيق وكلها ساعتين ونرجع إن شاء الله ولاتروع بس عشان موضوع خطفها لازم يحققون
محمد : بجي معك
عناد : لالا ماله داعي كلها ساعتين ونعود
محمد : زين بس انتبه لها
عناد : ابشر
~ في بيت غزيل ~
نوير : اخ ياغزيل الا غصب يبوني لعناد وانا مااااابيه مابيه ولا ادانيه
غزيل : مهيب مشكله انا باخذه
نوير : ياليت وتفكيني منه
غزيل : غبيه انتي ؟ احد يعاف عناد ؟
نوير : ايه انا لانش تدرين اني ابي حثلين
غزيل : وهل حثلين معطيش وجه ؟ لا ليه تركضين وراه ؟
نوير : بركض وراه واسعى لين اخذه غصب عنهم
غزيل : بقره تعاف عناد الطول والعرض وتاخذ حثلين
نويركانت فعلاً تعشق حثلين وكل تفاصيله وماتتمنى حياتها بدونه وحاولت عشان تتقرب منه وصدها ولاكن كان فيه سر بقلب حثلين محد يعرفه ..
~ فالقسم ~
ضيدان : نجد لازم تقولين كل شي من اول ما انخطفتي الى اليوم الي طلعتي فيه
نجد : تمام
وقالت نجد كل القصه لضيدان من اولها لبدايتها وأنصدم عناد من كلمة نجد " كان يوسف يقول لخويه اذا مو تسليه ليه جبتها ؟ " ورد عليه " بنتسلى بس مهوب الحين "
عناد : ياعسكري جيب لي صقر ال مسعود
العسكري : حاضر سيدي
بعد حضور صقر انصدم بوجود نجد قريبه جدًا من عناد وكانت ورا ظهره خوفًا من صقر !
صقر في نفسه : وبعد واقفه وراه؟ هين يا انا يا القبر يانجّد
محد كان يدري ان صقر الي مايتعاشر عاشق نجد ويبيها غصب وهو متأكد 100٪؜ ان نجد مستحيل تقبل فيه
عناد : ليه اخذت نجد لشقة خويك؟
صقر : ماخذت احد ولا رحت شقة احد
ضيدان بغضب : لاتكذب وأنا وأنت ندري أنك كنت موجود واعترف الان
صقر : ايه انا خذيتها وحاولت اقرب منها عشان تبعد عنك لاني ادري انها تشوف عناد ولا تشوفني ! ومحد بيحبها كثري وماراح اخليها له يا انا يا القبر
عناد الجم صقر بكف وقال : ياكلب ذي بنت عمك شرفك وشلون تخليها عند غريب وتحاول تقرب منها !!
صقر بقهر : لان من صغرنا وكل شي لعناد وحثلين عناد الملازم وحثلين البار وصقر مثل الطوفه محد يشوفه !
عناد : ياعسكري رجعه
العسكري : حاضر سيدي
عناد : امشي بنعود
نجد : طيب
وكان الهدوء يعم السياره محد كان له خلق يتكلم وعناد كان حزين من كلام صقر ونجد تهوجس بوضعها وصدق عناد يبيها ؟ ماتدري ان عناد مافكر بالحب اصلاً ولافكر يحب
عناد : يالله وصلنا انزلي
نجد : صحيح كلام صقر ؟
عناد : نجد اخلصي لاتكثرين حكا
نزلت نجد واستقبلها محمد وعلمته كل الي صار الا بارت حُب صقر لها وتوقعه انها تحب عناد عشان لايصدقه محمد
~ في غرفة الجد علي ~
الجده عفراء : تكفى ياعلي وغلاتي عندك ترضى عنه وتخليه يرجع لبيته واخوانه
الجد علي : كم مره قلت لاعاد تتكلمين بهذا الموضوع ؟ يخسي القاتل يطب بيتي ولا يحط رجعله على عتبة الباب
الجده عفراء : لاكنك تدري انه قتل خطأ مهوب عمد ليه تظلمه ؟
الجد علي : خطأ ولا مهوب خطأ قاتل وبس ولاعاد تطرين هالموضوع
الجده عفراء : لاكن ..
الجد علي : بس ياعفراء بس
الجده عفراء بحزن : ابشر
أنتهت هالليله على خير وكلٍ في فراشه ونام الا عناد وحثلين ونجد ونوير كان كل واحد فيهم له همه محد فيهم قدر ينام ولا قدر يتهنى بنومته الليله هاذي ..
_____________________________
أدعموني بتعليقاتكم وتصويت عشان أقدر أكمل
وأنزل بارتات أطول وأكثر إن شاء الله 🩵 .