كتير مننا بيكون مخنوق و حاسس انه عايز يفضفض مع حد ...بنكلم واحده صحبتنا او اختنا بس يا تري اوقات بتقدري توصفي الي جواكي زي ما هو ....لا طبعا يا اما بيخونك التعبير او في حاجات مش بتقدري تحكيها لاقرب حد ليكي فتحكي الموضوع من بره و بس
يمكن عشان متفهمكيش غلط او عشان متشوهيش صورتك قدامها او مكسوفه تقولي الي جواكي كله او اصلا مهما حكيتي محدش هيحس بوجعك زيك
الوحيد الي عالم بيكي من غير كلام هو ربك
جربي تتكلمي معاه احكيلوه فضفضي و لا عمره هيفهمك غلط و لا عمره هيقول انك مش كويسه
اعملي وقت يكون خلوه مع الله ...مش لازم تصلي وقتها او تقفلي علي نفسك...لا الموضوع اسهل من كده وقت ما تكوني علي سريرك عشان تنامي غمضي عينك و كلميه حتي لو كنتي كلك ذنوب
اوعي ذنوبك تبعدك عن ربنا اشتكيله حالك ادعيلو يبعدك عن ذنب متحكم فيكي و مش قادره تبطليه
هو اعلم بيكي منك
هيسمعك و هيحس بيكي و هيغفرلك اقسم بالله هيغفرلك لانه من صفاته الغفار
يا جدعااااان ربنا كريم ...ربنا غفور...ربنا رحيم...اوعي تخلي شياطين الانس او الجن يضحكو عليكي و يأسوكي من رحمه ربنا
من قال هلك الناس فهو اهلكهم
كان فيه واحد عابد وقته كله عباده و كان ليه اخ عاصي
العابد كان بيخرج يشتري طلباته بالليل عشان ميقابلش اخوه العاصي
في يوم قابله في السوق العاصي راح يسلم عليه العابد رفض و قاله انت كلك ذنوب و معاصي ..مش هتورد علي جنه
بكي العاصي و مشي
ربنا غضب وقتها و لما الاتنين اتعرضو عليه لام العابد و قاله انت مين عشان تمنع رحمتي عن عبادي
و دخل العاصي الجنه برحمته
و كان في اتنين عصاه دخلو النار و بعدها ربنا امر الملايكه انهم يجيبوهم و بعد ما وقفو قدام ربنا و كلمهم امر الملايكه انهم يرجعوهم النار تاني
واحد من الاتنين جري مع الملايكه تنفيذا لامر ربه و التاني بقي ماشي براحه و كل شويه يبص علي ربنا
فربنا امر الملايكه يرجعوهم ليه تاني
سال الي جري و قاله ايه الي خلاك تجري علي النار فالراجل قاله : عشان عصيتك فالدنيا و مش عايز اعصيك فالاخره
ربنا سال التاني ليه ماشي علي مهلك و بتبص وراك
الراجل قال لربنا : ظننت انك لما خرجتني من النار مش هترجعني ليها تاني
ربنا غفرلهم و دخلهم الجنه الاول عشان اطاعه و التاني عشان احسن الظن بيه
ربنا ارحم و اكبر و اكرم من انه يعذبنا ...بس انتي روحيله اتحايلي عليه اعتزريله
انتي لو زعلتي امك بتفضلي تتاسفي لحد ما تسامحك
و لما بتتعبي و بتروحي لدكتور مشهور بتبقي واثقه فيه لمجرد ان الناس قالت عليه كويس
و لله المثل الاعلي نتاسف لبشر و نثق في بشر و ننسي رب البشر حاشي لله
فكرتي تبكي بينك و بينه و انتي ندمانه علي ذنب عملتيه
فكرتي تلجئيله بيقين لما الدنيا تقفل في وشك
انتي لو محتاجه حاجه من حد بتلحي عليه طب ازاي و انتي عندك الي بايده مفاتيح الدنيا و الاخره
تسيبي الخالق و تلجئي لمخلوق طب ازاي
كلمي ربك مهما كنتي عصياه
قوليله انا عصيتك بس مكفرتش بيك
في ايه في القران بتقول ( قل يا عبادي الذين اسرفو علي انفسهم لا تقنطو من رحمه الله ان الله يغفر الذنوب جميعا )
عارفه نزلت ليه ...هقولك
في بعض الصحابه بعد ما اسلمو ارتدو عن الاسلام و رجعو للكفر و لما الرسول صلي الله عليه و سلم فتح مكه ندمو و كانو عايزين يرجعو للاسلام من تاني بس قالو طب ازاي بعد ما كفرنا بربنا نرجع تاني مش ممكن هيقبلنا
وقتها نزلت الايه دي عشان ربنا يطبطب عليهم و يقولهم ادام ندمتو و رجعتو انا قابلكم و توبت عليكم
ربنا تاب علي الكافر الي اشرك بيه مش هيتوب علينا احنا طب ازااااااي
كان في صحابي اسمه سيدنا عوف ليه ابن وحيد الكفار اسروه و عوف كان غلبان و فقير معهوش يدفع فديه لابنه راح للرسول صلي الله عليه و سلم و اشتكاله قاله ابني مالك اتاسر و انا معنديش حتي قوت يومي اعمل ايه
الرسول صلي الله عليه و سلم قاله الزم انت و زوجتك قول لا حول و لا قوه الا بالله
سيدنا عوف رجع لمراته و قعدو الاتنين طول اليوم و طول الليل يرددو الحوقله زي ما سيدنا محمد امره
ووقت صلاه الفجر سمعو الباب بيخبط فتح لقي ابنه مالك و معاه اكتر من ٤٠٠ خروف
سيدنا عوف فرح جدا برجوع ابنه الوحيد و بعد ما دخل و قعد ساله هما سابوك ازاي سيدنا مالك قاله و الله يا ابتي انا كنت مربوط ايد و رجل بسلاسل من حديد و من بعد صلاه المغرب لقيت الاغلال بتتفك عني لوحدها خرجت من غير ما الحرس يحس بيا لقيت جمل قدام الباب ركبته و جريت بيه و انا بهرب قابلت قطيع الخرفان ده سوقتهم قدامي و جيت علي هنا و برغم ان الحرس كان مالي المكان بس كان محدش فيهم شايفني
سيدنا عوف استغرب و سأله : المسافه بعيده تاخد يومين سفر لحقت ترجع ازاي من المغرب للفجر
رد عليه سيدنا مالك و قاله : و الله يا ابتي كنت اشعر ان الملائكه تحملني
فرح سيدنا عوف برجوع ابنه و راح جري لسيدنا النبي و حكاله عالي حصل مع ابنه
وقتها النبي صلي الله عليه و سلم فرح و قاله : قد نزلت فيك أيه يا عوف
و الايه بتقول ( و من يتقي الله يجعل له مخرجا و يرزقه من حيث لا يحتسب )
هو ده الموقف الي نزلت فيه الايه دي من يتقي الله يعني يذكر الله
و لو حد قالي احنا خلاص زمنا ده مفيهوش معجزات هقولك فعلا بس رب المعجزات موجود في كل زمان و احنا امنه بيه و برسوله من غير ما نشوفه احنا اولي من الصحابه بالمعجزات
استغفري لذنبك
استغفري لضيق رزقك
استغفري عشان يرزقك الزريه الصالحه
استغفري عشان يرزقك الزوج الصالح
استغفري عشان يفك كربك و يرزقك من حيث لا تحتسبي
الرسول قال : من لزم الاستغفار جعل الله له من كل هما فرجا و من كل ضيق مخرجا و رزقه من حيث لا يحتسب
صدقت يا حبيبي يا رسول الله
اتمني تعملو بكلامي و انا معاكم
بحبكم فالله
فريده
