كان في واحد من كندا كان عنده مزرعه ورد و شويه ابقار و اغنام علي دجاج و ارانب
كان بيربيهم و بيحب زراعه الورد جدا
شاف علي النت مزرعه كبيره للبيع في افريقيا و سعرها رخيص
و لانه عنده طموح اتفق انه يشتريها ...باع كل حاجه يملكها في كندا حتي بيته و سافر علي افريقيا
و تمم البيع و دفع كل الي معاه و بعد ما ركب عربيه توديه للمزرعه الجميله لقي نفسه في صحرا و السواق بيقوله ايه الي جابك هنا قالو دي ارضي و المفروض انها مزرعه ...السواق قاله لا دي ارض العقارب
اكتشف انه اتعرض لاكبر عمليه نصب و لقي نفسه في ارض مليانه عقارب كل ما يمشي خطوه يلاقي عقرب...كل ما يحرك حجر يلاقي عقرب
بني خيمه و قعد فيها وهو مهموم ...بس مستسلمش للي حصله قعد يفكر .
لحد ما وصل لفكره خلته بقي اكبر صاحب شركه ادويه علي مستوي العالم
قرر وقتها انه يستخلص سم العقارب دي و يبيعه لشركات الادويه لحد ما بقي هو صاحب اكبر شركه
ليه بقي......
لانه مستسلمش لليأس.....مخلاش الي حصله يحبطه
بعد ما كان بيزرع ورد لقي نفسه عايش وسط عقارب
خلق من هزيمته اكبر انتصار
لان من جواه مؤمن بقدراته و عارف انه يقدر يحول التراب دهب ذي ما بيقولو
انتي كمان كده....عندك افكار و عندك قدرات تقدري بيها تهدي الدنيا ...بس انتي الي مش عارفه قيمه نفسك
لو بس شيلتي النضاره السوده من علي عنيكي و الي حواليكي هما الي اجبروكي علي لبسها عشان ديما تشوفي الدنيا غامقه...لو بس قررتي انك تبقي شجاعه و تكسري النضاره دي ...وقتها بس هتشوفي نور الشمس الي كانو حرمينك منه بافكارهم العقيمه
لو كل الي حواليكي ضلمه ...دوري جواكي علي طاقه نور
انا عارفه انك تقدري ....و هتقدري ...بس انتي قولي يارب و خدي خطوه...خطوه واحده بس ...لو عملتيها هتلاقي نفسك في حته تانيه
عارفه ايه هي الخطوه دي....هقولك يا سكر
انك تكسري الاصنام الي حواليكي و جواكي
خوفك من بكره ....صنم
قله تقديرك لنفسك ...صنم
انك تعملي حساب للكل الا نفسك ....صنم
خوفك من الفشل ....صنم
استسلامك لاحباط الناس ليكي ...صنم
سماعك للكلام الي زي السم و تخليه ياثر فيكي...صنم
اصنام كتير حواليكي ....مدي ايدك و كسريها واحد واحد ...و انتي قويه و تقدري ..قولي لنفسك انا مؤمنه بالله و عصر الاصنام انتهي
قولي لنفسك كل يوم....انا جميله و عاجبني شكلي لان ربنا هو الي صنعه
قولي لنفسك انا عارفه قيمه نفسي مش محتاجه تقييم من حد
قولي لنفسك انا واثقه في اخلاقي و علاقتي بربنا و مش هسمح لحد ابداااااا انه يشكك فيا
قولي لنفسك انا جميله من جوه و من بره......من حقي اعيش.....و هحارب عشان اعيش زي ما انا عايزه مش زي ما هما عايزين ادام مش بعمل حاجه غلط
الحياه حق مشروع متسمحيش لحد انه يسرقها منك .....ابداااااا
فريده
