كان في شاب بعد ما خلص الكليه اشتغل فالعمل الحر و فتح شركه استيراد و تصدير صغيره علي قده
خطب بنت كان بيحبها و شايفها كويسه و جدعه
ملوش فالدنيا غير ابوه
ابوه الي جاله سرطان و تعب جدا و الشاب ده صرف كل الي معاه علي علاج ابوه لمده سنه لحد ما الدكاتره قالو انه محتاج عمليه كبيره و هتتكلف مبلغ كبير
خطيبته و اهلها قالولو معلش مش هينفع نكمل معاك عشان انت شكلك مطول مع ابوك و مبقاش حيلتك حاجه
صحابه عرضه عليه صفقه فراخ فاسده يشتريها بملاليم و يبعها بملايين و فضلو يقنعو فيه ان ده الحل الوحيد عشان ينقذ ابوه من الموت و ياخي ابقي توب بعدها
الشاب رجع بيته وهو بيفكر عايز يقول يارب ده وقته يعني الي هما بيقولوه
اتوضي و صلي ركعتين و دعي ربنا انه يبعد عنه شياطين الانس و الجن و ميخليش احتياجه يضعفه و يلجأ للحرام
و فعلا رفض كلام صحابه
بعد اربع ايام ابوه مات ...عمره خلص
الشاب بيحكي حكايته بعد ما عدي سنتين عالي حصل بيقول انه رجع وقف علي رجله تاني و ربنا كرمه و عمل حج لابوه و عمله صدقه جاريه في مستشفي كبير لعلاج السرطان
بس طلع من المحنه دي بحاجات كتير اتعلمها
خطيبته الي كان بيحبها ربنا حطه فالمحنه دي عشان يعرف انها عمرها ما كانت هتبقي سند ليه
صحابه الي دلوه عالحرام مع ان نيتهم علاج ابوه ...بس هو قال لا مش هسمع لحد
تخيلو لو كان ضعف و سمع كلامهم ابوه بردو كان هيموت في معاده ...بس هو كان هيبقي سقط في اختبار ربنا ليه
انما عشان هو نجح و قال للحرام الي الكل قال انه هينجيه لااااااا ربنا كرمه و ادالو اضعاف الي صرفه علي ابوه و خلاه يتعلم ان ربنا ابتلاه بالمحنه دي عشان ينضف حياته من كل الناس الي متستاهلش تكون في حياته
هقولك مثل ....لو في واحد بيرمي سهام و شاطر جدا فالتصويب و مهما استخبيتي منه هيصيبك تعملي ايه عشان ميجيش فيكي سهم....هقولك يا سكر ببساطه اقفي جنب الرامي
دي سهام القدر ربنا الي بيرميها علينا لو انتي واقفه جنب ربنا و بتتحامي منه فيه مش هيصيبك بسوء
حتي لو حصلك حاجه في نظرك وحشه تاكدي ان ربنا له حكمه منها و اكيد انقذك من حاجه مكنتش تخطر علي بالك
مره شاب كان نفسه يدخل كليه الطب ذاكر و اجتهد و دخلها و لما بدأ الدراسه كان فرحان جدا....في مره ماشي هو و اصحابه بعد ما خرجو من الجامعه جات عربيه سبحان الله خبطته وهو في وسط صحابه
المهم دخل المستشفي و عملوله عمليه استأصال كليه عشان اتضررت جامد من الخبطه....لما فاق زعل جدا و قال ليه كده يارب يعني العربيه تختارني انا من وسط صحابي....بعد كام يوم دخل عليه دكتور كبير يكشف عالجرح و لقاه زعلان فقاله : انت زعلان عشان العربيه خبطتك انت المفروض تحمد ربنا طول عمرك
الشاب رد عليه بغيظ و قاله : احمد ربنا علي ايه ان هعيش بكليه واحده بقيت عمري
الدكتور ابتسم و قاله : تحمد ربنا انه كتبلك عمر جديد احنا لما استأصلنا الكليه لقينا جواها حاجه غريبه و لما حللناها لقينا جواها خليه لمرض سرطاني نادر و خبيث كان لسه في بدايته و لو مكنتش عملت الحادثه كان هيكبر و ينتشر في جسمك كله من غير ما تحس بيه الا في اخر ايامك يعني و انت بتموت
انا مش هقول العبره من القصتين و دول حصله فعلا بس هسيبكم تحسو بكل كلمه كتبتها بقلبكم
عشان ربنا يجعل جواها طاقه نور تنور بصيرتكم و تخليكم تفهمو الحكمه من كل محنه او ابتلاء بتمرو بيه
بحبكم جداااا وواثقه فيكم
فريده
