تحت مسمى القسمه والنصيب

البارت الرابع والعشرون

#تحت_مسمى_القسمه_والنصيب

لـ الكاتبه حَـوࢪاء آل طائي

--------------------------------------------

تَـرتيل"

مرت ايام الفاتحه بأصعب مايكُن هل مرا خسارتنا چبيره اعز واحد من عمامي فاجعه اصابت آل اسماعيل عائله كامله بيوم واحد تركو عزيزه گلبهم وراهُم حالها يبچي الگلبه صخر متعرف عليمن تبچي ووين تروح تفتر من عماتي لعمامي لنسوان عمامي تحظن بيهن وحده وحده وتشهك وتگول

"مابيكم ريحه امي"

راحت ارواحنا ع حالها اريدد اساعدها بأي شي طبعاً البنات حالهن مو احسن من حالي صار ٦ ايام احنا مناكل غير شي قليل اما لـمار اخخ يا لـمار بهل ايام عايشه ع المُغذيات كل الموجودين يبچون على حالها مو ع الماتو باچر السابع وهي تخربطت مثل كل يوم يرحون يشدولها مُغذي دخلو الولد كُلهم لابسين اسود وظهرهم منحني يمكن اقرب واحد الهم عمو ابو لمار الله يرحمه ومنا اسر وعمتي ام لمار هم مره تنحط ع الجرح ويطيب حنينه الى درجه قبل لانتوجع تحس بينا تفهمنا اكثر من اهلنا حيل تأثرنا بفقدانهُم

تقدم امير يمها: لمار ياروحي گومي اكلي اروحلچ فدوه لاتسوين بنفسچ هيچ والله جاي تعذبينهُم

-امير روحييي رايحه النفس من اسحبه يوجعني منو الي بعدهم اهلي هذوله اهلييي

-مُـرتضى: وين رايحين احنا اذا ماتشيلچ الگاع عيوننا تشيلچ كافي هيچ تسوين وهذا يومهُم

-متحسون بالاحسه والله

-مُصطفى: روحي انتِ حاس بيچ وروح الغالي بس جاي تأذينهم هيچ فوي نفسچ لخاطرهم اقريلهم قُرآن صليلهم

-ليششش مارحت وياهم ذاك اليوم ليش عاندت امي وبقيت

صارت تضرب على وجهها تقرب امير حضنها ومرتضى يهمس بأذنها بـ آيات قرآنيه

-مُرتضى:لأن انتِ انكتبلچ عمر جديد وهم هذا يومهم لتحچين هيچ حرام

بالگوه قنعوها تاكل بس شأكلت لگمتين والله هم احسن من ماكو ،راح مُرتضى جاب المغذي وشده الها وهي روحها رايحه بسرعه مددت ونامت وتأخر الوقت احنا هم نمنا يمها ورا فتره حسيت حركه صارت بالغرفه اني نومي كلش خفيف فـ بسرعه احس فتحت عيني بهدوء هذا ادم گاعد مقابيل فراش لمار ولأن قريبه منهم سمعت كلامه يهمس

-روحي توجعني عليچ اريد اشيل الحزن منچ گلبي يتگطع من اشوف دموعچ والله لو بيدي انطي روحي لأهلچ ولا اخليچ هيچ حايره بخسارتهم ، اشوف الولد كلهم يجون ويواسونچ بس اني مااگدر ادخل واشيل شويا من همچ، روحي معلگه بيچ ولچ لا تكسريني بكسرتچ