الجزء السادس و العشرون
الساعة 3:45 عصرا
هويدة و صابرين مقعمزات يهدرزوا في حوش هويدة
هويدة : معقولة هكي دارت فيك ليلة !!
إلي يشوفك يقول من شوق التريس و أنتي طلال منغنغك و مدلعك آخر دلع
صابرين رشفت قهوة من فنجانها :
مش كيف يا دودي مش كيف
عيسى حبي و حياتي إلي عايشة ليه و نموت فيه
هويدة ضحكت بهزوة : هههه
تموتي فيه و تخوني فيه كيف جت هذه؟؟
صابرين تنهدت و اتكت على مسند الفراش
و غمضت عيونها و تكلمت بحزن مالي قلبها :
انتي إلي تتكلمي هكي يا هويدة
معقولة ؟؟
تعرفي البلي إلي حصلت فيه
دماغي معش يقدر يقعد بلا مخدر
نبي ننسى
مفيش شي زي ما نبيه
من صغري مش زي باقي البنات لا نقدر نجري
و لا نقدر نلعب و انقز زيهم
و حتى لما كبرت و انخطبت و جاني الدكتور
إلي بيطلع يكمل قرايته برا
قلت و أخيرا يا صابرين بتعيشي و بترتاحي
لكن صدمني الواقع بأنه كان يحب وحدة ثانية
و فوق من هكي أني منقدرش نولي أم بالساهل
زيي زي باقي النساوين حتى بعد العلاج و العمليات مقدرتش نولي أم
شفتي وحدة عيشتها منكدة زيني
و ديما حياتها ناقصة
تعبت يا هويدة تعبت
كنت نبي حاجة تخدرني و معش تحسسني بشي
و شوفت عينك حالي كيف بدي
أني نحب عيسى و الله نحبه لكن لما حسيت روحي رخيصة و ماعنديش قيمة عنده معش تحملت
فكرة أنه ممكن يطلقني بش ياخد وحدة تجيبله صغار تقتل فيا بالعرق
و لا حتى لو خلاني على ذمته
أني بنقدر نتحمل يرقد مع وحدة غيري
يشوف لوحدة غيري
يحب وحدة غيري
و هويدة قاطعتها بهزوة و شماتة
و حروفها ينقطوا سم :
علاش هو عيسى يحبك؟؟
صابرين ناضت معصبة قامت فازة محطوطة
عالطاولة قدامهم خبطتها عالحيط و هيا تعيط :
معش تقولي هكي معادش
عيسى يحبني .. إيه إيه عيسى يحبني أني
و مفيش قوة في الدنيا تخليه يبطل حبه ليا
و لو فكر يشوف لغيري نقتله
و الله لما نقتله و نقتلها و نقتل روحي
تسمعي فيا نقتل روحي
تلفتت قامت شنطتها و تليفونها
و طلعت قربعت الباب وراها
و هويدة قعدت تضحك عليها :
هههههههه مهبولة البنت ختشت بالرسمي
تحسابه عيسى مازال بيشبح فيها
بعد لا بدت تخون فيه
لكن صبرك عليا يا صابرين
خشمك هذا حنفطسهولك
و نمرمده في الوطا
و نخليك تدفعي حق الفازة إلي كسرتيها دم مش فلوس
🌿🌿🌿🌿🌿🌿🌿🌿🌿🌿🌿🌿
أما صابرين إلي طلعت ترعش من حوش هويدة
معش قدرت تولع السيارة
من كثر ماترجف و منهارة
صكرت عليها السيارة و الشبابيك
و اتكت عالستيرسو و بدت تبكي زي المجنونة
لن صوتها انبح
قعدت أكثر من ربع ساعة لن شرين تليفونها
لقاته عيسى
اضطرت ترد عليه بش مينشغلش عليها :
أيوة حبيبي
عيسى : صابرين أنتي وين مش متفاهمين
نجي نلقاك في حوش خالتي ضروري يعني
تخليني نعاود كلامي و تعصبيني
صابرين بصوت واضح فيه بحة البكاء تكلمت :
آسفة يا حبي هاني جاية شوية بس و نكون حداك
و عيسى تكلم بقلق :
خيره صوتك كنتي تبكي ؟؟
خيرك صابرين شن فيك؟ وين أنتي توا؟
أنت تقرأ
حين يعصف العشق 💕
Lãng mạnروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
