حين يعصف العشق 💕

الجزء السادس و الأربعون

الجزء السادس و الأربعون

يوم الجمعة 6 يناير

حوش شكري

حكمات من الصبح اليوم نايضة عليها النشاطة و الفلاحة
مع أنه الجو مصقع و مثلج
لكن هيا شادتها تسييق و تلميع
و أسيل و أماني لما ناضوا لقوها اضم هكي استغربوا فيها،،
هيا في العادة لما يبدوا البنات قاعدات زي يوم
الجمعة مثلا مستحيل تقيم معاهم قشة
و في وجود أسعد مافيش وحدة فيهم تقول كلمة
لأنه يبدأ يشوف فيها كيف هيا راقدة و هما يضموا
و مايتكلمش لذلك حتى هما يسكتوا إلا من شوية مناوشات بينها وبين أسيل و أماني فيسع تتدخل و تحز فيها

🌿🌿🌿🌿🌿🌿🌿🌿🌿🌿🌿

‏صباح يليق بكِ وبعينيكِ الفاتنة
صباح جميل كجمال أبتسامتكِ ، صباحي أنتِ دائماً 💙

هذه كانت رسالة جابر الصباحية لأميرته
الفترة الصعبة إلي عاشوها الإثنين كانت و كأنها إختبار لحبهم
إنهم يتفرقوا عن بعض بسبب هما ما ليهمش فيه
لا حول ولا قوة زي شيء قوي كالسحر ما كانش الموضوع سهل بالنسبة ليهم الإثنين
وخصوصا جابر
جابر إلي يحاول قد ما يقدر يعوضها على كل لحظة بعد عنها
وكل لحظة خذلها فيها
وكل لحظة بكاها فيها
و أميرة بالرغم من خوفها الدائم إلا أنها كانت سعيدة و فرحانة بالمرحلة الحلوة إلي وصلتها علاقتهم
و إلي أكدتلها إنها مبنية على أسس قوية و مستحيل أي شيء يفرق ما بينهم
لكن صدقا الإختبارات الجاية بالنسبة ليهم مازالت صعبة
و صعبة هلبااااا
و مش معروف إذا حيتجاوزوها بنجاح أو لا

🌿🌿🌿🌿🌿🌿🌿🌿🌿🌿🌿

و أحيانا الحياة تحطنا عند مفترق طرق
تخلينا تايه فكرنا و حاير دليلنا
زي حال سليمان توا
من أول مافتح عيونه و جي كلام رغدة في باله
و هو أصلا مقدرش ينساه
و لا ينحيه من باله
و بالرغم من أنه كان المفروض بعد لقاءه بأصدقائه
إلي ماسكينله شغله في .......
في المطعم يكلم رعد إلي يستنى فيه و يتلاقوا
لكن سليمان حس أنه مش قد هالمواجهة حاليا
خداها من قصيرها و بعت لرعد أنه صارله ظرف طارئ
و مضطر يروح لمدينته
المواجهة متع أمس كانت قاسية على سليمان
حس أنه رغدة عراته قدام نفسه
و خاصة بعد لا اتهماته بالجبن
و شخص زي سليمان واثق في نفسه
و معتد بقوة شخصيته
كلام رغدة كان صعب عليه و فوق احتماله
و مكانش يفكر إلا في طريقة يبرر تصرفاته قدامها
بس كيف؟؟
و رغدة قطعت عليه طريق الرجعة
و أكدتله أنها لا عاد حتكلمه و لا حتى حترد على مكالماته أو ترضى تتقابل معاه

🌿🌿🌿🌿🌿🌿🌿🌿🌿🌿🌿

في فيلا آل رزق الله