حين يعصف العشق 💕

الجزء التاسع

الجزء التاسع

رغدة : رائد
سمر وهيا تبرد في أظافرها: كملي

رغدة: والله كل يوم يكلم فيا عنك مرتين
ثلاثة يسأل

سمر : يسأل؟

رغدة : اهه يسأل ،، يبي يعرف شن شاغلك

هو في باله أنك تحبي وصايرة معاك مشكلة عاطفية
وباعتبار يعامل فيك كيفي نانعرفه لما يحس صاير معايا شي ميرتاحش غير بعد يعرفه

سمر شافتلها بعيون مدمعة: حتى أنتي يارغدة
رغدة قربت منها : سمورتي بدون زعل بالله عليك
أنتي تعرفي أني نتمنى تكونوا لبعضكم أنتي وخويا

سمر مسحت دموعها : أصلا نا توا والله مانبي غير تساعديني نتجاوزه وبس
خوكي حلم وحايقعد حلم ومستحيل حتى
نانبي نبعد عنه عشان نرتاح
وخاصة بعد علاقته بجنى إلي جنات كل مانتلاقوا تقعد تحكي عنها
ولا سكرتيرته إلي قعدة معاه 24 ساعة وتجيه والله أعلم شن قاعد يصير بينهم

رغدة فهمت تلميحها:
لالا يا سمورة هذه ماحبيتهاش منك
رائد خويا الحرام ميقرباش مستحيل
حتى أم رهف لما قرر يرتبط بيها تزوجها عند شيخ وبزواج شرعي ..

سمر بحزن :ولو ،، هيا لو تبي تقرب منه حتوصل
صدقيني حتوصل

القريب من العين قريب من القلب كيف مايقولوا

رغدة ماحبتش تأمل سمر أكثر من هكي في خوها
آ

ثرت الصمت وخلاص وهيا واجعها حالها عليها

🌿🌿🌿🌿🌿🌿🌿🌿

الساعة 5:30 م

في حوش شكري

عياطات حكمات كانت مالية الحوش
كانت تدور في وسط الحوش زي المجنونة

بينما هالة مع أماني في دارهم

أماني كانت لا مع الحيين ولا مع الميتين مازالت تحت تأثير صدمة إلي صارلها الصبح
لاتكلمت ولا تحركت من مكانها
ملامحها جامدة ،،
هذا غير دموعها إلي ينزلوا وخلاص😭😭

أسيل لما روحت من الثانوية ولقت عمتها هكي
خافت عليها ومعرفتش كيف تقدر تساعدها
مادارت شي غير أنها مخلتش بيسان تشوف أمها هكي
خدتها من إيدها ورفعتها لحوش عمها محمد جارهم بش أميرة وأمها يهتموا بيها
وحكتلهم الحال إلي لقت عليه عمتها
وعلى طول روحت للحوش بش تكون مع عمتها

وبعد لا روحت حكمات العصر
وحكالها أسعد إلي صاير بدت تعيط وتخبط
خافت من فوزي هلبا
قصة الدين إلي عليهم لفوزي
وهيا أكثر وحدة تعرف شخصية فوزي كيف شرير
ومايهمه حد
حاولت تخش لأماني تهزبها لكن البنات سكروا الباب بالمفتاح خوفا على أماني منها
ولحد الآن مازالت تعيط شوية
وشوية تقعد تقربع عالباب تبيهم يفتحولها بش تخش تفش غلها في أماني
لأنها حسب تفكيرها لو وافقت ترجع مع راجلها راهو هذا كله ماصارش