حين يعصف العشق 💕

الجزء السادس

الجزء السادس

يوم الخميس 26 فبراير
الساعة 4:20

في المزين إلي يشتغلوا فيه أميرة وأسيل
وباعتبار اليوم خميس كانت زحمة وشغل هلبا عند العاملات

وحدة من زبوناتهم اليوم الأخصائية الاجتماعية
في ثانويتهم الأستاذة زاهرة إلي كانت تجهز في نفسها لأسبوع ولد خوها ،،
وجاية خصيصا لأسيل بش تمكيجها لأنها حبت شغلها هلبا وجايتها قبل هكي كذا مرة،،
الأبلة زاهرة شخصية مرحة بشوشة ومتفهمة للبنات ومشاكلهم، ،
والطالبات كلهم يحبوها ويوثقوا فيها ويستشيروا فيها في مشاكلهم الخاصة قبل العامة
هذا عدا عن شخصيتها القوية والواثقة إلي مخلية البنات يحاولوا يتقربوا منها

لكن العلاقة بين أسيل والأستاذة زاهرة كانت مميزة لأن زاهرة ديما تشوف في أسيل تشبه لشخصيتها هلبا وفيه بينهم توافق كبير

هذا غير تعاطف زاهرة مع أسيل الخاص لأنها يتيمة وتعرف ظروفها الصعبة إلي تواجه
فيها مع مرت عمها.

في الوقت إلي أسيل تمكيج في زاهرة ..
وأميرة جنبها ادير في تسريحة لأخت زاهرة كان محور تهدريزهم الجمعية الخيرية(جبل الخير)
إلي القائمين عليها حيديروا ندوة تعريفية عن أعمال الجمعية ونشاطاتها في مسرح الثانوية إلي يقروا فيها البنات، ،
وإلي الأستاذة زاهرة وأختها زينب من ضمن المؤسسين للجمعية ،،

أسيل سألت زاهرة:
يعني ياأستاذة حيكون فيه حضور غير هيئة التدريس في الثانوية والطلبة؟؟

زاهرة بتأكيد: أكيد الدعوات وجهت لمجموعة من نشطاء المجتمع المدني،،
لضباط في المجلس العسكري ، ،
لموظفين مسؤولين في المجلس المحلي للبلدية، ،لرجال أعمال ليهم اهتمامات ومساهمات بالأعمال الخيرية، ، بالإضافة للطلبة إلي ناويين ينضموا للجمعية من ثانويتكم

أميرة بحماس وهيا ترش في السبراي المثبت على شعر زينب : والله من لما حكيتيلنا على قصة الجمعية ياأستاذة وأني نستنى أمتى بتبدا نشاطها في مدينتنا بش نشارك معاكم ولو بشي بسيط

أسيل بنفس الحماس: صح مش حيكون عندنا وقت هلبا لكن حنحاولوا على قد مانقدروا نساعدوا

زاهرة بتفهم: معليشي المهم في الوقت إلي بتحضروا فيه تهنوا لأنه أهم شيء توا تركزوا
على قرايتكم وإن شاء الله في الصيف تخدموا معانا وقت أكثر ..
وتشاركوا معانا في نشاطات أكثر

أسيل بفرحة : إن شاء الله..
معناها توا خلاص
يوم 14 مارس الموعد عالأكيد
زاهرة وهيا تشوف في وجهها عالمراية بنظرة رضا: الله يعطيك الصحة على هالإيدين..
ولا أهم ميكب ارتست في البلاد والله كان تحصلي موديل تمكيجيها وتنزليها عالفيسبوك تشوفي الزبونات يجوك من كل مكان وخاصة العرايس وتكسبي ثروة من إيديك إلي يلتفوا بالحرير اللهم بارك عليك
أميرة :والله ديما نقوللها فيها كان تنزلي حتى خدمتك بالرسمات إلي ترسم فيهم على يدها..تشوفي الخدمة كيف تنزل عليها