قـلت ليهو ماف داعي للحركات دي ، بـكل بساطه كان ممكن تقول لـي عايزك تمشي معانا ، ما ضروري تخرب وش ، إتلفت علي و إبتسم إبتسامه مستفزهـ و قـال لي أكيد ما جادهـ ، قلت ليهو أثبت لي عدم صـحة كلامي ، قـال لي انتِ منو ذاتك عشان أحاول أثبت ليك إني ما شايلك من أرضك !! قلت ليهو معناها وقف العـربيه و نزلني ، قال لي حأقيف لمن أحـس إني عايز أقيف ما بأمر منك ....بقى يلف في الشوارع و يغني بصوت عالي ، في سري قلت صوت حمار بس !!
كان واضح إنـو عايز يضايقني أكتر و يستفزني ، رجعت لـ ورا و ربعت يديني و إسترخيت و بقيت أعاين بالشباك ، طبعاً ناس طيف استغربوا فيني ، هو كان بغني و بعاين لي في المرآيه لمن لقاني مستكينه اتغاظ و إستغرب ، بقى يبذل أقصى جهد عشان يضايقني و يستفزني بس ما أبديت ليهو أي ردة فعل ، سفهتو كأني لا شايفاهو لا سامعاهو ! طبعاً التطنيش أقوى سلاح و أفضل وسيله عشان تقهر بيها الطـرف التاني ، بعـد مسافه وقف العربيه و قـال لي يلا اتخارجي ، طيف قالت ليهو بزعل قصي عيب !!
قلت لـ قبس انزلي عشان أنزل ، فعلاً عن سكات نزلت و أنا نزلت بعديها ، قلت ليهو : مالاد malade 😏 قال لي انتِ كمان مالاد ، طبعاً أنا متأكدة إنو ما عارف معناها شنو عشان كدا قال لي انتِ كمان مالاد ، بمعنى مريض....
طيف نزلت و قالت لي أرجوك يا مها ما تزعلي من الحصل ، قصي دا ما كدا والله ، قلت ليها ما بهمني ، قالت لي آسفه شديد و خجلانه اقول ليك أرح معانا ، بس انا عايزاك تمشي معانا ، قلت ليها مستحيل ، قبس نزلت و قالت ليها ما حتسمع منك يا طيف و أكيد بعد الحصل بينها و بين قصي ما ظنيت نفسها تسمح ليها تركب في عربيتو تاني ، أخوها ضرب ليها بوري و قال ليها خلصينا يااااخ !! ما ردت عليهو ، قالت لي آسفه مره تانيه ، قلت ليها ماف مشكله و طوالي إتحركت شويه من جنبهم ، هي زعلت شديد من أخوها و أول ما ركبت معاهو سامعاها بتشاكل فيهو بعدها دور العربيه و مشى يلحق الباقين...
كنت بنبذ فيهو في سري ، بقيت واقفه و بأشر لأي مواصلات جايه ماره بجنبي بس للأسف كلهم شاحنات ، الكريه نزلني في مكان ما فيهو مواصلات عشان كدا اضطريت أقطع الزلط و أمشي مسافه طويله بعدها لقيت مواصلات ، ركبت و نزلت في العربي ، طبعاً أنا كرهتي في الدنيا الأسواق و الزحمه ، ما بطيقها و بـكره نظرات الرجال الكلها قرف دي !! كنت بحاول أمشي بإستعجال بس الناس زحمه و ماشين براحه ، حسيت روحي حـ تطلع والله ! إحساس إنو وراي و قدامي و يميني و شمالي ناس حاجه ما كانت مريحه بالنسبه لي ، مسكت شنطتي قوي ، بقيت أمشي و أتلفت وراي عشان ما اسمح لزول يتلصق فيني بالذات الرجال ، لمن قربت للمواصلات استعجلت في المشي ، فجأه في مره وقعت قدامي و الناس إتلمت فيها ، طبعاً أنا اتهجمت لأنو فجأه كدا هي جات واقعه و خلعتني ، فجأه حسيت بحركه وراي ، لمن إتلفت لقيتو راجل كان مقرب مني شديد عشان كدا حسيت بيهو ، جسمي كلو بقى يرجف ، هو عامل رايح و طوالي مشى و أنا والله المشي غلبني ، قعدت على الأرض و أطرافي كلها بترتعش ، للسبب دا انا بكره الزحمه و الأسواق ، عندي فوبيا من الرجال ديل و بخاف من قربهم ، يمكن الموقف دا يكون قابل للتجاوز بالنسبه لـ غيري بس أنا لا ، قلبي كان بضرب شديد و حسيت نفسي مهبطه ، بقينا أنا و المره واقعين في نفس المكان ، هي على الأقل كان معاها زول بس انا لا ، الناس إتلمت فيني و بقوا شغالين لي في شنو يا بت الناس كدي قومي على حيلك.....البكى كان غالبني والله رغم إنو قلبي كان بتقطع حته حته ، جات مره رفعتني و قالت لي مالك يا بتي في شنو ؟؟!
