الحزن في القلب مرض مميت قد يفتك بنا إن لم نتجاوزه كما يليق فلا تخال جريح القلب بخير وإن أبدى ذلك!، اجتمعت يسر بشقيقتيها بعدما عادت إلى منزل هدى قبل قرابة خمسة أيام، خمسة أيام ولايزال الصمت قائمًا بينها وبين من أحبت!، حملت يسر صغيرتها شاردةً بينما تعلقت أنظار كل من هدى واسيل بها، استفاقت يسر من شرودها ثم نظرت إليهما وقالت :
-مالكم في ايه؟!
وكأن كلاهما كانت في أمس الحاجة لسماع ذلك السؤال حتى يرويان عطش فضولهما، قالت هدى ببعض الحزن لأجل شقيقتها :
-هو انتي خلاص نويتي على الطلاق؟
-طب ورؤى؟!، هيسيبوها معاكي عادي؟
قالتها اسيل فتنهدت يسر ثم قالت :
-دي كانت غلطتي من الاول ياهدى مكانش ينفع أوافق اتجوزه، انا عملت كدا عشان بنتي وياريتني فضلت معاه عشان رؤى وبس، المشكلة إن انا حبيته ياهدى، حبيته بالرغم من كل حاجة!، اما بالنسبة لسؤالك يا اسيل حقيقي معرفش إجابة ارد ابيها بس اللي انا متأكدة منه اني عمري ما هسيب بنتي او اتخلى عنها!
تبادلت كل من هدى واسيل النظرات فعادت يسر تنظر إلى ابنتها ثم قالت :
-انا بدأت ادور على شغل واول ما ربنا يرزقني هاخد شقة ونعيش فيها انا واسيل ورؤى، كفاية عليكي كدا انتي استحملتينا كتير انتي ومنصور الله يخليكم
ابتسمت اسيل بخجل بينما عقدت هدى حاجبيها بتعجب، لطالما كان فارق السن بينهم يجعلها تشعر وكأنها والدتهم وخصيصًا بعدما فقدوها لذلك قالت ببعض الغضب :
-انتي اتجننتي يا يسر ولا ايه، ده بيتك انتي واسيل ورؤى وهيفضل طول عمره بيتك
-حسبي الله ونعم الوكيل، انتي كرهتيني في الرجالة يا يسر!
قالتها اسيل فضحكت يسر ثم قالت بمزاح :
-رجالة عيلة الخطيب بس، انا مجربتش غيرهم!
ضحكت ثلاثتهن حينها فمن الجيد أن يجد المرء الوقت ليبتسم حتى في أشد الليالي ظلمة!، فُتح الباب واقبل كريم اكبر أبناء هدى والذي يصغر اسيل ببضع أعوام فقط فنظر إليها ثم قال بعدما ضيق عيناه :
-مين بقى اللى بتجيب في سيره الرجالة
-انا!
قالتها اسيل بتحدي فأشار إليها أن تصبر حتى يجلسا وحدهما فضربت هدى كفًا على كف وقالت :
-يارب ارحمني منهم!
-ربي ابنك ياهدي وقوليله يتعامل مع خالته بأسلوب احسن من كدا
قالتها اسيل بعدما عقدت يداها فإتجه هو نحو يسر قائلًا لأسيل :
-اتنيلي
ضحكت هدى بينما عقدت اسيل حاجباها بغضب، حمل كريم رؤى فضحكت له على الفور فقال بمزاح مبتسمًا :
-شوفتي بقى يايسر بتحبني قد ايه؟، خطيبتي والله!
-فرق السن اللي بينك وبينها ريأكت اضحكني
-يا اسيل هزعلك والله يا اسيل
-ياحبيبي من فضلك بعد كدا قولي ياخالتو اسيل
-اتنيلي ياخالتو اسيل
