درع الغيــد

البارت الثامن

الصبر لا يعني لقاءاً مُحتمل
لا خيرَ في صبرٍ إذا ماتَ الأمل
إني و إن تمضي سريعا خطوتي
في داخلي شخصٌ مصابٌ بالشلل
يا حسرتي الأمرُ المُحالُ وقوعهُ
من فترةٍ قد كان شيئاً مُحتمل

-------------------------------------------
غيد : تقدمت على جدي خليت ايده ب ايدي وكتله مساء الشوك جدي خليت ايدي الثانية على ايده وابتسمت هو بسرعه لفني وحضني باس راسي بدون مايحجي شيء رحت تقدمت على جدتي تمسح بدموعها كتلها بضحك ترا البجي يكَصر العمر  وانتي مريضه لو اني منج ماابچي هي ضحكت وكالت حته نفس حجي ابوج سوده عليه يايمه سوده عليه بقت حاضنتتي وتبجي واني اكولها كافي جده لتبجين الله يرحمه ل أبوية بعدهه سلمت على عمو ابو آيار
ابو آيار : وصلت ابنية الغالي ومرت الغالي كَوية عين نسره مو بنت زلم مشوربه ولا استحت منه سلمت عليها وهمست الها والله وخوش صيده صايد ابني هي ضحكت ودنكت
ام آيار: هلا يمه هلا ابنيتي
ام مريم: اهلا بيج عمه
مريم وهي كاعده : اهلا حبيبتي
فرح طفرت حضنت غيد : ولج فدوه لربج شهل جمال
غيد : شكرا فريحه
فرح: اسمي فرح والله فرح مو فريحه
غيد بضحك: كيفي وبمزاجي
ابو مريم : هلا بيج ابنيتي نورتينه
غيد : كملنه سلام اني وامي وكعدنه اباوع ع الاستقبال شفت على الميز مال البلازما صورت أبويه كمت جبتها هم يباعون عليه كعدت حطيتها بحضني طلعت من جنطة السفر مال الايد كلنس مسحتها وبوستها وخليتها بحضني رفعت راسي اباع عليهم
عمو ابو آيار ابتسملي وهز راسه جدي حجه
الجد : بوية غيدة كومي يمي اكعدي
غيد : كمت كعدت يمه كتله ها جدو  ... وخر الشماغ ورجع لفه اليه مثلهم وكالي تروحين للخيل نشوفهم
كبل وافقت اموت على الخيل
الجد : ها اغا اجيت
آيار: ايي بويه أمرني
الجد : اني وغيده طالعين للخيل تعال ويانه
آيار: تفاجئت هو وغيد وللخيل هو جدي اصلا مايحبهم ولا سأل عنهم هسه للخيل وي غيد الله يستر كتله ايي بوية صار يلا نتوكل
غيد : يلا ماما اترخص
ام غيد : ديربالج على نفسج حبيبتي
الجده : جا ما تاخذوني وياكم
غيد : تعرفين تركبين خيل
الجده : ولج يمفلوكه اني عندي مزرعة مال خيل ورثتها من ابوي وانطيتها هديه لهذا الشايب اليمج انتي رايحه لمزرعتي ولخيلي
غيد بضحك : اكول جدو شلون قنعت المره وخليتها تنطيك مزرعه خيل
الجد بضحك: انطيتها هدية بستان جبير مال ورد وفواكه وانطتني المزرعه
غيد وهي تباع على الجده :  جده طلعتي مو هينه بستان وخيل اكول جدي ما اخذ الثانية والثالثة
بس اني راح ازوجه خطية بعده صغير مو جدو
آيار : فاتح حلگي وصافن عليها شلون دخلتهم بمزاجها بسرعه صدك نسره سالفة ابوي من يكول نسره 
الجده وهي تلطم على صدرها : أنه امك يمنذر تريد ازوج زلمتي عليه تالي عمري
ابو آيار بضحكه: ماتزوجيني وياج بوية
غيد : بعيني تدلل بس كون  عمه توافق وماتزعل كلشي ولا زعل عمه
ام آيار: لا يمه ماازعل زوجي خلي ندك ونركص ثلاثة ايام
الكل : يضحكون بقوة  ... بس مريم اتباع عليها وتغلي بحقد
الجد : يلا بوية امشونه
آيار: أخذتهم ورحنه للخيل صاير مسافه عن بيتنه... جدي يسولف وياهه ويضحك على سوالفها ويسالها على حياتها وهي بس تبسمر بي ومره تحشش عليه
الجد : بوية طلع المهره مالتك واخذ غيده  وخلي شوفها
غيد: جدو خلي اركب المهره
الجد : بوية تعال اخذ غيده وركبها وديربالك توكع
آيار: الله فرصه واجتني ... ايي بوية صار راح اركب وياهه خاف توكع .
الجد : يلا بوية بس مو تتاخرون اني راح اشوف مهرة جدتك وانطيها اكل وارجع
آيار : براحتك بوية الف رحمه على اهلك  ... خليت جدي يبتعد وكتله يلا تعالي انطيني ايدج
غيد : انطيته ايدي وركبت وركب وراي محوط خصري بيده
آيار: ركبتها وركبت وراهه حضنت خصره ومشيت بالمهره بعدت شويه عن جدي وكتله اشتاقيتلج واني احضنها لصدري واقوي بالحضنه ودي ادخلها بين ضلوعي
غيد: درت وجهي عليه وكتله : ليش محجيت وياي الك أكثر من أسبوعين
آيار: حقج عليه بس صارت مشاكل ومرض جدتي مكدرت احجي وياج
غيد : بس انت وعدتني ماتتركني وتبقه تحجي وياي حته تذكر من سألتك من كتلك لو مثلاً التقينــه اني وياك مره ثانية راح تجاوب على كُل اسئلتي لو راح تتهرب مثل ما امي تتهرب من كل سؤال اسئله الها وكتها وعدتني تجاوب وماتتهرب هسه ليش جاي تتهرب جاوب ليش جفيتني هلكد صاير شيء !
آيار: لا يكَلبي مصاير شيء كل الموضوع تعبت نفسيتي على جدتي
غيد: الله يساعدك بس ترا اخر يوم ماتمنيتلي التوفيق ومجاوبت زين
آيار: هههههههه اسف وحقج عليه بعدين عادي حته اذا مجاوبتي اي قسم تردينه ادزج اله بالاهلي
غيد : ترا اريد طب تدفع بالسنه أكثر من ١٢ مليون
آيار: ادفعلج حته سنين من عمري اذا تردين حجيت واني اتلمس صدرهه وشفتي على ركَبتها ابوس بيها حسيت بيها مالت على صدري بس بسرعه عدلت روحها كتلها غيد اني احبج
غيد : اعترفلي يااااا عزاااا : سكتت محجيت شيء من الصدمة
آيار : غيودتي ليش ساكته احجي شي تحبيني لو لا ؟
غيد : درت وجهي عليه خليت ايدي على لحيته وكتله ايي احبك محسيت غير باسني بشفتي اتصنمت شويه حسيت مااكدر اتنفس بعد دفعته وضربته على كتفه  اذا من اولها هيج فراح تموتني بيدك مخنوكَه
آيار: اعترفت الها مابيه اتحمل بعد واعرفها راح تكلي احبك شكلها وحركاتها تجنن من سولف بجديه بستها كد قوتي .... بقينه نمشي بالخيل حته كالتلي
غيد : اوعدني ماتعوفني ابد مثل بابا وتبقه دائما وياي وتسندني وتخليني مطمئنة دائما.. آيار أني عشت عمري كله ادور على الاطمئنان والامان احس  فقدته وي بابا بس من تقربت منك لكَيته مااريد أفقده مره ثانية الله يخليك.... احلفلي متعوفني ابد وشلت ايده خليتها على راسي احلف بحياتي ماتعوفني ابد ولا تتخلى عني
آيار : صفنت بوجهه شكول الها واني راح اتزوج مريم تنهدت .... وعدتها مااتركها وحلفت بحياتها مثل متريد هسه ماادري شنو من حلف هذا دور ايدي على راسها  ..... بقينه نمشي بالخيل بالمزرعة بعدهه رجعنه للبيت.