Abby
Wull way home a Pablo or wtv him waa name deh pon mi mind. Mi dvn know the bwoi and mi a yam fi him already.
Mi stop eh taxi and pay mi fare and start walk guh in a mi community, ofcourse big mouth Miss. Pim wah doe know how fi mind ar bizniz affi stop mi.
A juss because a mi church sista mek mi nuh tell ar sumn rude enu because she too ups man.
"Abigail, is afta 5 almost 6 how yuh jussa come in?" Mi waa cut mi yiy and tell ar fi guh suck ar madda so bad but aguh waa next piece a argument dat and mi cya badda.
"Mummy have a meeting suh mi did affi tek taxi." Mi tell ar a hope she woulda done eh convo deh suh but obviously not because she very nuff.
"A hope anu yuh likkle boyfriend yuh gah park guh meet inu." Mi force out waa lawf even tho mi neva find shit funny before mi walk weh.
She nuh see ar pikney Makeda wah deh guh roun a fuck dung eh place like stray dawg but a me she av strength fah.
Ar pikney a d community mattress and mi sure she muss ave boh 40 std and ar madda doe ave nun fi seh to ar but she ave problem wid everybody else pikney.
Den every Sunday she run gawn a church and a chat bout people fi pray fi ar because she get touch. Lady yuh daughter just love buddy end a story.
Cya dealid hypocrite people inu and mi know fi a fact seh Makeda nuh leff unda ar man arm yet but a mi she ave yiy fah.
Oman just bruk mi medz dawg.
Mi open eh gate and guh een, like Pablo time mi caz as mi reach home waa text come in from him numba. How him even get mi numba dawg?
Mi open eh door and text back a ask how him get mi numba and him seh some shii bout mi nuffi worry bout that.
Him deh ask mi bout miself and actually remember fi send mi the stickers. Mi nah get my hopes up tho enuh, by one week time we stop text.
-☆-
Is like mummy think seh mi like walk much less inna hot sun. Dis lady have another meeting this evening again bredda. Atleast Kayla deh yah wid mi but mi really neva waa guh a bus park again or atleatst a that mi a tell miself.
"Ah which man deh pon your mind?" Kayla ask and mi cut mi yiy dem.
By yah now we reach a park and she a put mi pon taxi den Nicoy a come pick ar up. Him woulda just drop off eh two a we but e ppl dem inna mi community too ups.
"A wonda mia wonda wah mi a guh home guh eat." Fi a slim girl mi eat like cow but is like fat a run from mi.
"Food alone you think bout." She seh a shake ar head.
"Bombaa Kayla hide mi hide mi." Unu nuh waa fi guess a who mi see a walk a come ova mi bus stand.
"A wah?" Girl deven deh medz wah deh tek place
"Mi nuh waa dah bwoy deh see mi." Mi wull dung mi head back a d girl but being that Kayla know almost everybody the likkle girl di deh a lawf like eediat.
"Pablo yah hide from Abby?" Him hear ar and start walk come ova to we and god know mi did just wish ih ground woulda open and swallow mi.
"Me yah hide from Abigail?" Caz why him affi seh mi name so nice? Dis nuh safee.
"A sumn mi a tek up." Obviously a lie mi a tell but him nuh need fi know that.
"Weh ur man deh likkle girl a yuh sideman yuh deh yah a wait pon?" Him ask Kayla
"Yea, a Shellaz a mi sideman." Him start laugh
"Yuh betta bill before Nicoy come bax yuh inna yuh mouth." Pablo a chat like Nicoy can put him hand pon Kayla. If him eva try dat him end up single.
"Any day him ready tell him fi run up." Him tell e other bwoi wah him did a walk wid seh him soon fwd and come stand up beside mi.
"My girl, ah eh first night we a text and yah leff mi pon seen already?" Inna my defense a neva purpose, if me and yuh a text anytime afta 12 and yuh tek more than 2 seconds fi reply a sleep mi a guh sleep.
"Drop asleep." Eh man cologne a kick enu dwq. A suh man fi smell.
"Look inna mi yiy wen mi a talk to yuh." Mi did a scroll thru IG not bc nun interesting deh pon eh but just bc mi cya dealid eye contact. Dem ting deh mek mi knee dem shake.
"Wah yuh waa Pablo?" Eh man stand up so close to me and him a look right inna mi yiy dem to. All mi go seh is. Flood out.
"Cya call mi dah name deh a dem part ah park yah, Delano mi name yer." All eh man name sexy dwq no sah. Why him did affi gah CC?
"Okay, wah yuh waa Delano?" Ih man just start smile and wull on pon him chest.
"Seh it again, seh it again" kmt mi convince seh dah bwoi yah mad enu.
Him start pull one a d curl dem one inna mi puff and mi guh back pon mi phone.
"Bloodclaa, Abby nuh mouthamassi dat?" Mi look up and unu jus guess who mi see a come outta the taxi?
Big mouth Miss. Pim.
YOU ARE READING
Soul
Teen FictionPreview -> "mi madda deh outta gate" i mutter while he continues leaving hickeys all over my neck. "mi nuh bizniz, just keep quiet." _____________________________________ Miss Margaret good girl wah nuh leff yaad, everybody seh she gwaan like she be...
