فزيت على نفسي وراسي امصدع حيل وجسمي تعبان كلش واكو اثار ضرب عليه .
اول شي فكرت بي الشايب وينه؟؟ واني وحدي بصحراء والسياره ماهيه وتلفوني ماهو ودااحاول اركز وين اني ووين طريقي !!
واني ابحاله صدمه من الي صار ودااحاول افسر كل شي ووصلت النتيجه الي هيه الشايب سلبني وشمرني بالصحراء ووياه شخص .
ولي اكد تفكيري اثار تايرات السياره اموصلتني للمكان الي بي اني وماشيه .
اول قرار اخذته اتبع اثار السياره ومشيت وراها بنص الطريق لگيت سلاحي مشمور وياه سبع طلقات بس .
اخذته ونزعت البدي لفيته على وجهي وراسي وكملت طريقي ،
دامشي وبان عليه التعب و العطش والجو حار كلش
شفت رجال وگف على تله بعيده رفعتي السلاح رميت طلقه فوگ بلكي ينتبهلي ، الرجال ضل واگف وما اتحرك ولا رد اي فعل !! فكرت معقوله هذا مو من الأنس؟؟ بس ماعندي حل غير امشي بأتجاها بلأخص هو واگف بنفس اتجاه اثار السياره وصلت للتل صعدت ما لگيت احد بس شفت اكو بير موجود اتفاجئت شجاب البير بنص الصحراء؟؟
فگلت اكيد لراعي الغنم اني ميت عطش فمشيت بأتجاه البير واني دامشي صارت عاصفه ترابيه قويه كلش غطيت عيوني ونمت ع بطني وانتضرت تمر العاصفه حسيت اكو شخص اقترب مني گلبت روحي اريد اشوف منو بس العاصفه ماخلتني اشوف شي .
مرت العاصفه ووگفت ع حيلي بس جسمي حيل تعبان كأنما شايل وزن ع متني وحركتي صعبه كلش
وخطواتي ثگيله، وصلت للبير طلعت ماي منه وشربت صح الماي جان مالح كلش بس بارد ونعش گلبي گعدت ابصف البير عسى ولعل يجي شخص اله
نمت واني محتمي ابضل البير ومخلي سلاحي يمي
فزيت ع صوت ماعرف شلون اوصفه بس الأكيد الصوت مفتعل مو من وحده لزمت سلاحي ووگفت اباوع ماكو اي اثر لأي كائن حي ، ركزت الصوت جاي من داخل البير!
قررت اعرف شنو سبب هل صوت فباوعت ع الي بداخل البير ،
البير الماي البي جاي يغلي ويرتفع الماي لونه داكن اسود حيل ، باوعت ع السطل الي يطلعون بي ماي من البير شفت علي اثار دم !! وبي دم باقي واني شربت منه .
اديه بيها اثار دم وشفتي وحنجي بيها دم يابس!!
عرفت اني شربت دم !! بس ما اهتميت لأن مجان اكو حلول وضليت اتفرج ع البير وشلون يغلي بسرعه
بعديت اجت نسيم الهوى البارد ابضهري مره لخ
شعر جسمي وگف وكزبر جلدي حسيت اكو شخص وراي بالضبط!! درت وجهي بسرعه ماشفت شي سمعت صوت حجر وگع بداخل البير الصوت قوي كلش !! رجعت باوعت داخل البير لگيت الماي ركد وميتحرك ، رجعت نسمت الهوى من جديد وماحسيت غير بشخص دفعني داخل البير !!
مجان داخل البير ماي جان دم واني دااسبح بالدم احاول ما اموت بس تعبت حسيت اكو ايد انمدت من داخل البير دا تسحبني لجوه وگفت عن المقاومه وگلت الي عشته يكفي خلي اموت مااريد اشوف اكثر .
فجئه اسمع شخص يصيح
مهيمن !! مهيمن !!
وشمر الي السطل والحبل مالته لزمتهن كل قوتي والشخص يسحب بيه فطلعت من البير ووگف الشخص على راسي گلي اخذ نفس اني عيوني امغطيها الدم اخذت نفس وگلتله شتسوي هنا وحدك؟
الشخص الغريب - اني هذا بيتي انت شتسوي هنا وحدك ؟
مهيمن - قصتي قصه ومراح اتصدگها !
الشخص الغريب - بالبدايه جنت مااصدگ بعدين عرفت هواي اشياء جنت جاهلها .
مهيمن - مو مهم شفت سياره لونها سوده ؟؟ بيها شايب ؟؟
الشخص الغريب - الشايب و سيارتك يم (عزرا)
مهيمن - وين الاگي عزرا هذا ؟؟
الشخص الغريب - احسلك لا اتلاگي!!
مهيمن - ليش؟؟
الشخص الغريب - ممكن يخطفك !
مهيمن - اوك بس دليني
الشخص الغريب - اوك راح اگعدك من النوم بس هذا الي ع ضهرك نزله !!
گلتله شنو ؟؟؟
وفزيت من النوم ورجعت لمكاني منتجي على البير
ضليت حاير وماعرف شديصير وشنو الحقيقي وشنو الحلم ولگيت اشاره سهم مشيت بأتجاها وشفت من بعيد الشجرات الي حذرني منهن الشايب وفرحت كلش واخيراً وصلت وراح ارجع للبيت !! وصلت للشجرات
وبلش الوزن يزداد ع ضهري وضليت افكر بكلام الشخص الغريب گلي نزل هذا من ضهرك .
ودخلت ابين الشجرتين على امل اندل مكان السياره او اشوفها لأن تبعد عن هل شجرتين كيلوين
انتبهت الشجره بيها ثمر واني جوعان ردت اكل من هلثمره الي شكلها جداً غريب واول مره اشوف هيج ثمره اول ما مديت ايدي جرني شخص من ضهري
گلي لا تقترب لشجرات عزرا
نفس الشخص الغريب !!
مهيمن - راح انجن انت بشر لو لا ؟؟
الشخص الغريب - اي بشر
گلتله وين عزرا ؟؟ گال تعال وراي مشي وراه دخلني من وره الشجرات وضل واگف حسيته جمد
مهيمن - ليش وگفت ؟؟
الشخص الغريب - وصلنا
مهيمن - لعد وين عزرا ؟؟
الشخص الغريب - اني عزراا
خفت وردت اشرد بس حسيت اكو شخص لازم رجلي
باوعت لرجليه اكو قزم كامش رجلي حيل ورافع راسه الي انتبهت لرجليه ماعنده اصابع عنده رجلين مال غنم هيج شي ..
عرفت همه جن وثگل نفسي بس اتشجعت وحاولت ماافقد عقلي وگلتلهم بس اني ما اذيتكم شتردون مني ؟؟
