بلأخير نمت وصار الصبح وگعدت راسي يوجعني واول شي فكرت بي الأثار و التراب الي ع جسمي وضليت افكر هواي بالموضوع،
سويت ريوگ واني اتأمل بوجه الشايب شوفه صافن وعينه مدى ترمش بيده جگاره احترگت كلها وهو ما شارب منها شي كأنما الشايب جمد او ميت !
ناديته ابو فلاح !! حجي !!
جان يلتفت عليه وبنفس الهيئه و الجمود گلي مهيمن
لا تدخل الدائره بعد حتلو تربط نفسك اتأكد لا توصل ليها وانت نايم !
مهيمن - ليش؟
الشايب - انت جايبني لأن اني افهم منك بالصحراء فلا اتناقشني بهل موضوع .
اني گلت انطي ع مايه واخذته ع گد عقله وما اهتميت.
اتريگت كملت جهزت نفسي اخذت سلاحي ومشيت
ادور ع ارنب طير اي شي اصيده
لزمني الشايب گلي لتبتعد اكثر من ٧٠٠ متره عني
گلتله اوك
اتحركت واني ادور على ارنب فشفت من بعيد شجرات صغار ابمسافت كيلوين او اكثر گلت اكيد اكو ارنب او طير .
وصلت للمكان وهملت موضوع المسافه مال الشايب
شفت طير ع الشجره گلت اصيده !!
جهزت سلاحي سحبت اقسام دا اركز ودااحاول اصيده من طلقه وحده وصار هدوء تام وماسمع بس نفسي ودگات گلبي دا ترتفع حسيت بنسيم هوى بارد كلش ابضهري وريحه كلش معفنه ركزت ع الطير وحسيت شخص دفعني بكل قوه من ضهري وگعت ع وجهي انداريت اشوف منو الدفعني واموجه السلاح عليه ، طلع الشايب وهو يصيح عليه
الشايب - اني مو گلتلك لا تبتعد ليش ما تسمع الكلام ؟
مهيمن - اكو طير هنا خلي اصيده وارجع
الشايب - يلا صيده اني جاي اتفرج عليك
التفت ردت ارجع اصيده ماهنه الشجرات !!!
هاي شنو ؟؟ شديصير ؟؟ ضليت صافن وجمدت ابمكاني لدقيقه كامله گلت للشايب وين الشجرات؟؟
گلي يا شجرات؟؟ التفت واني مستغرب واتفاجئت اكثر الشايب وين؟؟ هستوه يمي وين راح ؟ شديصير؟؟ رفعت سلاحي والتفت اخر مره لمكان الشجرات الشجرات موجودات اني گلت معقوله هذا السراب الي جنت اشوفه بلأفلام؟؟
رحت لنص الشجرات وهملت موضوع الشايب الي فجئه اختفه دخلت بين الشجرات اشوف طيور هواي
وافاعي ميتات الأفاعي وحده منهن لادغه نفسها وميته دااحاول اشيل الحيه وفجئه حسيت بنفس النسيم البارد ابضهري !!
هلمره انداريت بساع شفت الشايب واگف وامدنگ ضليت صافن عليه
گلي اني مو گلتلك ارجع ؟؟ ارجع لا ادخلك بعالم ثاني .
رجعت للشايب واني ماصايد اي شي وصارت ساعه ١٠ الصبح و الجو صار كلش حار
گلتله يلا گلي جاي وراك مشيت وصلت المكان البي سيارتنا وخيمتنا الصغيره لگيت الشايب نايم وغاط بالنوم اني استغربت؟؟
گعدته
مهيمن - شوكت رجعت وشوكت نمت؟؟
الشايب - هو شوكت اتحركت اني غير هستوك گعدتني
مهيمن - شنو هستوك انت مو جنت وياي يم الشجرات؟؟
الشايب - يا شجرات ؟؟
مهيمن - ذنيج واشرت لمكانهن
الشايب - الضاهر اثرت بيك الشمس يا شجرات شطلعني شمشاني ؟؟
مهيمن - ذنيج والتفت لمكانهن ماهنه ؟؟
شنو الموضوع معقوله دااتخيل ؟؟ گلي متگدر اتصيد العصر خلي انام وباجر نطلع انصيد اني وياك الصبح
گلتله اوك .
صار المغرب والجو بده يبرد والشايب غير مكانه ورسم ٣ دوائر وگلي دير بالك يصير الي صار البارحه
گلتله اوك وفرشنا ونمنا
فزيت ع نسيم هوى كلش عالي وبارك كلش القمر كامل وامضوي الصحراء كلها عبالك الفجر وتگدر اتشوف كل شي التفت ع مكان الشجرات شفتهن الشايب گعد يمي گلي ها تقصد ذنيج الشجرات گلتله اي گال يلا انروحلهن ؟؟
گلتله واني متحمس كلش يلا خلي انروح مشينه وهوه يمشي بسرعه مو طبيعيه بحيث اسرع مني وهو شايب ميكدر يمشي اساساً وصلنا المكان الشجرات ضل واگف مقابيلهن وگال بصوت خشن واتحس بصوته بي صدى
گال هنا اخذوني الجن !!
گلتله شنو ؟؟
التفت عليه وبنضرات مرعبه جداً گال اعرف مراح اتصدگ بس هنا خطفوني الجن ومگدرت ارجع وگلتله لعد شلون هسه انت موجود ؟ بأستهزاء
دار راسه وادنگ گال منو گلك اني موجود؟؟
نصيحه مني الك لا تبقه الليله الثالثه ارجع لهلك هلمكان مو للصيد وهذاك الشايب يعرف كلشي ليش جابك؟
گلتله يا شايب؟؟
گال ذاك واشرلي ع مكان السياره واني دااحاول اشوف منو بعدين اكتشفت هشي الشايب يفتر ويدور بنص الصحراء وفاتح ضوه ويصيح مهيمن !!
مهيمن !!
عيوني اتوسعت جسمي ارتعش التفت ع الي ابصفني گلتله منو انت؟؟ اباوع لا الشايب ولا الشجرات ؟؟ ركضت ع الضوه والمسافه جاي تبعد ما تقترب واني عرفت هذا مو انسان ومدا افكر بغير القران الكريم
وضليت اقره ايه الكرسي لحد ما وصلت للشايب گلي
وين رحتت ؟؟؟
گلتله لازم نرجع لأهلنا بسرعه امشي لسياره
الشايب - شنو شبيك وين نرجع هسا مانعرف الطريق انتيه
مهيمن - مااعرف لازم نطلع هسا
الشايب - مهيمن ما نگدر نطلع اتحمل هل ليله واني اضمن الك مراح يصير شي
مهيمن - ليش انت تعرف شنو ديصير؟؟؟
الشايب - اعرف من اول ما دخلت المنطقه
صرت عصبي حيل على الشايب واصريت نطلع هسا صار هوى كلش عالي واني معصب ع الشايب واجت عاصفه ترابيه علينا گلي دنگ لا تختنگ اني ما دنگت لحد ما اختنگت حيل من الهوى واغمى عليه وقبل لا اغمض عيني شفت الشخص نفسه الي جان يم الشجرات وره الشايب واغمى عليه .
يتبع....
