قمر الإنتقام

✨الفصل الثاني عشر : ذكريات ✨

كانت إيلين في بيتها تاكل في روحها ، قمرة واش جابها هدا واش كانت تسقسي حتى دخلت ليها يماها
نسرين : وقتاش جيتي ما شفتكش ؟
إيلين : واش جابها هديك لهنا ؟ ماشي راحت ؟
نسرين : إسلام جابها معاه ، مافهمتش انا كامل ميتين عليها
إيلين : مالا قلتيلي إسلام ياك ، دوك تشوف
خرجت نسرين من عندها وهي بدلت حوايجها وقعدت تخمم واش دير
عند قمرة كانت راقدة بسك كانت عيانة أصلا حتى دخلت ليها أمينة قعدت قدامها ومسحت على شعرها مست رأسها لقاتها سخونة راحت جابت سربيتة وطاسة ماء وقعدات ديرلها كل شوية تشمخها وتحطها حتى هبطتلها الحمة خرجت تروح ديرلها ماكلة بنينة وخلات السربيتة فوق رأسها كامل هدا وقمرة راقدة
إسلام كان في بيتو يشوف tv حتى عيطلو فراس
فراس : واش إسلام رحت عندها ؟
إسلام : راني فدار
فراس : تمسخر بيا قتلك روح عندها
إسلام: خليني نكمل هدرتي ، راني فدار وهي تان راهي هنا
فراس: كيفاش ؟
إسلام : طرق تاعي ، مهم ما تقلقش راهي مليحة مي راهي مريضة شوية بصح حمة برك ماشي حاجة كبيرة
فراس : مدام راهي معاكم نتكل عليكم هيا اتهلا
إسلام : هي إتهلا
شاف فالساعة لقاها 17.00 والحالة سماطة خمم يروح يهبل يماه شوية ، كي يقعد فالدار دايمن يجيبها موراها ، حبط للكوزينة لقاها لتم طيب
إسلام : يمااا
أمينة : واش
إسلام : وشبيك مشنفة
أمينة: إسلام راني نعرفك تحب تهبلني مالا غير روح إلعب بعيد يالاه ، نورمالمون راك تلعب مع ولادك ماشي
إسلام: 1.50 ثانية
أمينة: واش ؟
إسلام : جازت دقيقة و50 ثانية بالضبط باش قلتي الجملة الشهيرة
أمينة: إسلام طير عليا طير
إسلام: يما ما عنديش جناحتين
دارت ليه بمغرف تع حديد وراحت تجري موراه وهو راح للصالون وكانت نايلة وصفاء يشربو قهوة تع لعشية وراح وقف مور فوتاي تع نايلة ، كانوا يضحكوا عليه
أمينة : ليوم تدي طريحة ، توحشت يامات الصغر أرواح نوريهملك
نايلة : تهردت عليك ليوم إسلام
راحت ليه وين كان واقف وهرب مور فوتاي تع صفاء
إسلام: عمتي ياك تحبيني ؟
صفاء : باينة وليدي
إسلام: صحا نتي شديها وانا نهرب للبيت
ناضت صفاء تحط فنجالها وهو هرب جات تحكموا جاتها صفاء تضحك
صفاء: خليه تعرفيه يحب يهبلك
أمينة: كنت نطيب في أمان الله، طياب ... ماكلة فوق النار
راحت تجري تشوفها ونايلة تضحك
أما إسلام طلع يجري تخبى ديراكت في بيت قمرة بسك علابالو تجي تحوس عليه في بيتو يماه ، دار لعندها لقاها غارقة في سابع نوم وسربيتة فوق رأسها ، دنا عندها حط يدو على خدها لقاها هبطت الحمة تحركت قمرة وفتحت عينيها بلخف (بسك مدربة ) شافتو وهو بقا يشوف فيها
قمرة : واش ؟
إسلام: والو
قمرة : علاه راك واقف كي ملك الموت
إسلام: كنت نهبل في يما وجيت تخبيت هنا علابالي تجي تحوس عليا في البيت
قمرة: مازالك في عوايدك ما تكبرش نتا ؟
إسلام: كي تكبري نكبر
تحركت كي ناضت وتوجعت مالجرح وبان على وجهها
إسلام : وشبيك ؟
دنا عندها يجري وهي دارت يدها على خصرها كرد فعل
قمرة : والو ني عيانة برك
إسلام : قالولك حابس ولا؟ وشبيك علاه راكي حاطة يدك لتم ؟
قمرة : لالا قالولي ولا يدخل روحو بزاف
إسلام: هكا إمالا
قمرة : هكا ، معليش تخرج تخليني نوض
إسلام: اوكي كيما تحبي
خرج وهو شاك فيها ، هي ناضت قابلت لمراية شافت الجرح سال منو شوية دم راحت صالدوبان بعد ما دات حوايج جدد لبست سروال وقعدت لفوق تريكو قصير بدلت الضمادة ورمات لخرين فالبوبال صغيرة لتم ولبست تريكوها وخرجت لقات أمينة جات في يدها سنيوة تع ماكلة ودواء (دارتلها سوب تع عدس حمر مع سكالوب وفريت وجو تشينة )
أمينة : جبت لبنتي ماكلة سخونة باش تبرى بلخف (قالتها وهي تتبسم وقمرة لي تبسمت كي حست بحنانتها )
قمرة : يا يما على ماكلة ماما لعزيزة
قعدت فوق البونك وحطتلها السنيوة في حجرها وكانت تهدر معاها وتاكل حنى كملت كلش وشربت الدواء ، ناضت أمينة حطت سنيوة في الطابلة صغيرة لتم وراحت قعدت قدام قمرة بسك قالتلها تمشطلها شعرها
أمينة : عبالك كي كنتي صغيرة بيبية كنتي حلوة سكر كنا ملي نجو عندكم وانا رافداتك وإسلام معايا يلعب معاك بصح ما يرفدكش بسك كان يخاف ، حتى كبر شوية باش ولا يقدر يرفدك كان يديك يخرجك حتى نولو نحوسو عليكم
ضحكت قمرة وهي تسمع لواحدة من الحكايات تع طفولتها مع إسلام
قمرة : تشفاي نهار دخلنا للجاردان تع عمي محمود وجرا مورانا بالعصا ؟
ضحكت أمينة : هداك نهار ما ننساهش إسلام جا حوايجوا كامل موسخين مام نتي
‏قمرة : بسك كنا نطيحوا فالغرقة ونوضو ، مزية مرتو تعرفني حتى سلكتنا منو
‏أمينة : وتشفاي نهار خليت إسلام وأماني عندكم كنتو عصابة ، رميتو كامل البصل والزرودية على جاركم
‏ضحكت قمرة : سعيد المهبول ، نشفى هداك النهار كل عيطة بحبة زرودية
‏وخلي وخلي الزبايل لي كانو يديروهم كي كانو صغار ما يبانوش قدام هادو
جازوا يومين ، قمرة بدات تريح شوية الحمة مابقاتش تحكمها والجرح شوية شوية يبرى بصح ولات تقدر تتحرك أحسن ملي كانت . كانت توجد في روحها با تروح مع إسلام وتهدر مع أماني بالكاميرا
أماني : تسما راح نديروه عند إسلام
قمرة : yess baby ، بصح ما فهمتش علاه ما قلتيلوش مالاول مينداك نحير ادا عندك عقل والله
أماني : شو دصارة لجايحة ، خلينا واحكيلي واش صرى لبارح لإيلين
قمرة : ياودي كبيرة وجايحة والله ناس تتقدم وهي تولي للور ، قاعدة نقصر في أمان الله مع إنصاف جاية تهدر وتقولي وقتاش تروحي منا ، وقيل عمباتلك صح فاميلتك هادو ، تأمنيني أول مرة ما نحبش نرد على بنادم يقلقني والله المفيد سمعها أمير كان جايز حطلها سعدها في يدها
أماني : خسارة راطيت يعني
ضحكوا في زوج من بعد كوباو وقمرة كملت شعرها ، ناضت سقمت ربتها مادام راهي هنا خلي طلع الغاز لفطوم وبنتها و حفيدتها ، تبسمت لروحها فالمراية وبعتت بوسة لروحها