قمر الإنتقام

✨الفصل الثامن عشر✨

خلاصت الغنية وقمرة سكتت حتى سمعتهم كامل يصفقوا ويصفروا وهي ضحكت وهبطت وراحوا يقطعوا الباتيسري كانوا موجدينها رؤيا وماريا
قمرة : الباتيسري روعة شكراا بناات
رؤيا : العفو قمرة
خلاصت سهرتهم وبداو ينوضو باش يروحو ، ماريا ورؤيا يروحو مع أمير وإنصاف ، أيمن يوصل هلال وأمين مع إيلين عصام مع أماني ورياض وحدو ، وبقات قمرة وإياد وإسلام
إياد : تحبي نوصلك قمرة ؟
هي جات تهدر وتقولو إيه قاطعها إسلام
إسلام : ما تشقيش روحك أنا نوصلها
هدرها وهو يشوف فيها وردة الفعل تاعها إدا تعارض بصح هي تنهدت ودارت لإياد مرة أخرى
قمرة : شكرا على الإقتراح إياد بصح إسلام يوصلني
إياد : ولو العفو ، مالا تصبحوا بخير
قمرة : تصبح بخير
خرجت قمرة هي لولة وإسلام موراها وكانوا راحوا الجماعة تاعهم ، فتحلها الباب تركب وشكراتو وراح ركب هو تان وديمارا . لاحظت قمرة بلي طول الطريق وحست بلي حاب كاش حاجة بقات ساكتة تستنى خطوة تاعو القادمة ، إسلام شافها ما هدرت والو عرف بلي فهمت على هادي كمل في طريقو للوجهة تاعو ولي هي حديقة جاية تطل على البحر . وصل وهبط هو اللول واستناها شوية وهبطت كانت لبست فيستا تاعها جلد ،هو كانت مستند على طونوبيل مالقدام وداير يديه في جيبو وهي تان دارت نفس الشي وربعت يديها ضامتهم ليها . بقاو مدة وهما ساكتين يشوفو في البحر هي تسنتى فيه يهدر وهو يشوف شحال تقدر تبقى ساكتة
وأخيرا قرر هو يكسر الصمت رغم أنه استناها هي لي ينفد صبرها وتهدر
إسلام : ما تقولي والو ؟
قمرة شافت فيه بنص عين وعاودت كملت تشوف في البحر وابتسامة خفيفة على شفافها
قمرة : نظن نتا لي جبتني لهنا ماشي أنا طلبت ، تسما نتا لي راك حاب تهدر ماشي أنا
دار برأسو شاف فيها مليح يحاول يحلل كلامها
إسلام : تمام ، مالا نهدر أنا
هي بلعت ريقها بدون ما يلاحظها ، للحظة توترت وماعرفتش واش رح يهدر ، هاد المرة إسلام دار عندها بكامل جسمو ومزالهم يديه في جيوبو
إسلام : علاش كنتي تهربي مني الأيام لي فاتو ؟
قمرة حبست نفسها للحظة وملامحها تزيرو شوية من التوتر ، ماكانتش تستنى هاد السؤال للأمانة هي ماكانش عمبالها حتى واش ممكن يقوللها ، لهدا خدات نفس هادئ ودارت ليه تواجهه
قمرة : واش تقصد بسؤالك ؟
إسلام : ما تجاوبينيش بسؤال اخر قمرة سؤال واضح بزااف ونتي علابالك واش نقصد
قمرة : وقيل راني عايشة في مخك باش نعرف واش تقصد وواش لالا ؟
قالتها بنوع من الحدة بصح مش لدرجة الغضب لكن فجأة لانو ملامحها للإجابة تاعو
إسلام : ماراكيش غالطة فهاد النقطة ، بصح سؤالي المعنى تاعو اخر وبرأيي فهمتيه
قمرة سكتت مدة تخمم في جواب بصح مالقاتش بكل صراحة مالقاتش بقات تشوف فيه وتحس فمها تبكم ، في الحقيقة ماشي مالقاتش جواب هي عندها واحد بصح مالقاتش جواب تغفلو بيه وتنسيه لكن نظرة عينيه المصرة حست انه ليوم ما يخليهاش حتى يعرف واش حاب
إسلام همس : قمرة
قمرة : حبس .......واش تسحق من عندي حقا ؟
إسلام : الحقيقة ، علاش كنتي تهربي مني الأيام لي فاتو وتبدلتي فجأة
قمرة سكتت تخمم مرة أخرى تخمم واش تهدر ، لوكان تقولو ادا نسيتني رح تبان بلي راهي تحبو ، هادي حاجة مفروغ منها بصح ماشي وقتها برك كاين عفايس يمنعوها حاليا تعيش حياتها معاه ، ولوكان تكدب كاش كدبة برك يفيقلها ديراكت
دات نفس عميق وهو يتبع في حركاتها ومن نفسها العميق عرف بلي رح تهدر لدا تأهب باش يسمع
قمرة : نسقسيك سؤال انا قبل مانجاوب على سؤالك
هو استغرب لكن حرك رأسه بنعم يشوف وين رايحة بيهم الليلة هادي
قمرة : أنا شكون إسلام ؟
إسلام عقد حواجبو باستغراب سؤال غير متوقع منها وواشمن علاقة رح تكون عندو مع سؤاله
إسلام : قمرة
قمرة : جاوبني على سؤالي من فضلك ، أنا شكون ؟
إسلام : نتي صديقة طفولتي وبنت عمي
قمرة : حقا ؟
إسلام : عندك شك في دلك ؟
قمرة : بالاك لأنه تعارفنا مكانش يوحي بدلك للأمانة ، تصرفك مكانش تصرف إنسان شاف صديقة الطفولة تاعه من زمان وبنت عمه في نفس الوقت
إسلام : هدي لي قلقاتك ؟ لأنه ماتعرفتش عليك ؟
قمرة تكرزت من سؤاله هدا ويقولها بكل راحة وهي لي عندها يامات ماشي مليحة تخمامها قتلها وهي تسيي تحلل في الشخصية تاعه
إسلام قدر يعرف اخيرا سبب حالتها هادي وصراحة كان يستنى في ردة الفعل هدي عندو شحال
إسلام : انا ظنيت أماني عرفت صديقة جديدة بعد إنقطاع تواصلنا <شافت فيه بحدة>
قمرة : صديقة جديدة ؟ إنقطاع تواصلنا ؟ ، تسما حاب تقنعني بلي نتا نسيت كليا بلي اماني عمرها ولا صاحبت بنات بسبب شخصيتها الخجولة وانه انا صديقتها الوحيدة وفوق هدا انها لقات صديقة جديدة عندها نفس إسمي ، تتمسخر بيا ؟
قمرة : نتا لي قطعت تواصلك معايا ماشي انا ، نتا لي رحت وبعدت وماشي انا <ضحكت بسخرية وقلق > لوكان سقسيت برك طاطا امينة تقولك شكون انا ، زعما ما علابالكش كامل علاش خرجنا من هديك العايلة ولا علاش قطعنا التواصل امم امنتك
إسلام : قمرة واش صرا فالماضي مكتوب ولا واحد فينا قادر يبدلو