"لا تبالغ في حب الأشياء ، ستؤذيك يوماً ما."
عمران :
بعد ستة شهور وبعد معاناة وسهر ليالي قدرت اطلع اهلي من البيت ده ونمشي بيت تاني.. والحمد لله انو اسياد البيت م كانو عاوزنو ف باعو لي بسعر رخيص.
ربا خلصت سنه تالت والامتحانات زي م قالت فيها الحلو وفيها الصعب.. طيف قررت ننفصل م اكذب واقول م صدمتني م كنت متخيل انها ف يوم تطلب كدا.. بعد محاولات كتيره مني انها ترجع بس كانت عنيده.. قلت اديها وقت تفكر براها.. م اكون اناني واحب نفسي وانا لي الان م عارف انا حأجهز بتين..كنت دايما بلهي نفسي طول الست شهور دي بحاول م افكر لأن الفيني كتير.. مرات بحس اني لازم اكلمها بس تاني بنسحب.. م كنت عاوز احسس اخواتي بي حاجه ف بكون مضطر أبين اني كويس ومافيني شي.. طيف.. الانسانه الوحيده الما حقدر اتعود على عدم وجودها بين حياتي.. ياررب..
"أحاول أن أتجاهل ما بداخلي، لكنهُ يؤلم."
ف يوم بالعصر كدا كنت شغال ترحال وجاني طلب لمطعم م بعيد من المحل الانا فيه قبلت وبقيت متابع اللوكيشن.. وانا ف الطريق تلفوني دق وكانت رمس بتقول لي بعدين لمن تكون جاي دق لي عاوزين حاجات قلت ليها حاضر قفلت... لمن وصلت دقيت لي سيد الرقم وقلت ليه اني قدام المطعم ال.. قفلت.. وبقيت منتظر لمن حسيت بي زول بدق القزاز نزلتو.. كنت بحاول اكذب عيوني.. بلعت ريقي وانا بعاين ليها وهي متوتره وبتفرك في يدها..
م كنت قادر اتحرك او اعمل اي رده فعل... بعد دقايق نطقت هي وقالت ممكن نتكلم شويه عاينت قدامي وقلت ليها الكلام خلص.. قالت لي شويه بس.. مسحت على وشي وانا بقول ف زول حوصلو واجيك قالت لي الزول د انا قعدت حواجبي قالت لي انا الطلبت انزل.. نزلت امنت العربيه ودخلنا المطعم..
كنت بعاين ليها وهي بتعاين حولها بتوتر وملاحظ انها من التوتر م قادره تتنفس كويس.. متأكد لو هبشت يدها حألقاها بارده.. انا كل الفات اتعاد على وبقيت اتذكر كل لحظه حلوه بينا وكل لحظة سيئه..
التجاهل الكنت بتجاهلو لي ست شهور الليله م قدرت.. م قدرت اتجاهل اكتر وحسيت الذكريات د كلها بتجي غصب عني.. مغمض وبهز ف رجلي ومره امسح وشي ومره اضغط على راسي...
م كنت عارف اقول شنو خذلتيني؟ كسرتيني؟ اقول شنو؟ طيف الكانت بتحرص على زعلي اقول ليها زعلتيني؟ م كنت عارف ارتب الجوطه الجواي كيف... كنت معصب وعاوز اهدا.. عاوز أهدا عشان م انفجر فيها.. طيب انا غلطان؟ ولا هي؟
مفترض تقيف معاي؟ ولا تخليني؟ م كنت قادر احدد انا مفترض اعصب وازعل ولا مفترض اتفهم وعلى كُلٍ انا معصب ومتنرفز...
