رتبة و ظفيرة

الحَلقة 36 ⚜️

لَتنسـون التَصويت شَذراتي + التعليق بين الفقرات ..
رتبة و ظفيرة
رُسل فَهد
....

- يّا حَزن ياريت اعرفك
چَنت اسَويلك حديقة يَاسمين
وممشَى مَن گاشي الفَرح جدَام بيتك
يَا حَزن ياريت اعَرفك وين تسگن چَنت أگُلك لا تجينيّ
وتمشِي گُل هَاي المسَافة أنهَ وحَدي چَان أجيتك
- مظفر النَواب
.....

يَاسمين
انحطت قطعة قماش على خشمي و اني ارافس لحد ما فقدت الوعي
فتحت عيوني مغوشة شوية شوية بديت اصحصح عبالي أنعميت ضليت ارمش بأستمرار اباوع الباب من جوة مبين منة ضوة ادية و رجلي مُقيدة بحبل
صرخت طلع صوتي
- منوووووووو هنااااا ... سكتت و تذكرت اني شجابني هنا !! وين اني ؟؟
ماكو أي صوت

ماضل بَشر اعرفة ما خطر على دماغي
خاف سحر و ام باسم يريدن يذبحني ؟ خاف الگتلة انعل ابوك و راد يضربني
خاف ناس تعرف عمي !! مية فكرة أجتي ببالي
ضليت أصرخ و ماكو صوت من الصدمة و عدم الاستيعاب حتى ما بچيت
مدري تعبت عيوني من البچي

مرت فترة و صرت اسمع صوت رجلين تتقدم و ضحك زِلم
صار الضوة يختفي بسبب ضل الاشخاص الي ديتقدمون رجف جسمي
الخوف و الفضول ماكلني اعرف منو

اسمع صوت القفل ينطك قربت رجلي و حضنت جسمي انفتح الباب و هم مستمرين يسولفون انفتح الضوة أباوعلهم وجوه تخوف و اجسام تخوف اكثر
جانو اربعة تلاثة بقو واكفين و تقدم واحد أصلع الوشم مالي كل جسمة حتى رگبتة
گعد ركبة و نُص مَد ايدة لزم فكي بعدت وجهي و خزرتة
- هيوووووووو لا تمد ايدك منو انتَ
- هههههههههه يا يابة شهالصيدة هاي ما تنترك يا ارشد ما تنترك

يَاسمين : ارشد ؟؟؟ منين تعرف ارشد و انتَ منو وخر
- شـو ما تبچيـن انتي مثل البنوات !!
- منو انت شتريد مني عفية ترى ارشد مطلگني
- اكيد يطلگچ غير شَـابعين بيچ

احسها مو كلمات صدگ سچينة بخاصرتي
تفلت بوجهة و انـداريت على الواگفين تفلت عليهم
يَاسمين : هاي منـووووو الشابع بية جيبة خل ادوس راسة بالقُندرةة
اشرف منك و من ارشد و من عشيرتكم يا عارات
فك ادية اذا انتَ رجال فكهن
بعـدني احچي و انضربت على وجهي انرگع راسي بالكاشي