وهم الوجوه

الحلقة التاسعة عشر

#وهم_الوجوه

الحلقة التاسعة عشر ..

للكاتبة .. زينب الشمري zan_eb15

°°°°°°°°°°°°°°°°°°°°°°°°°°°°°°°°

هواي تعرضت لمواقف تحرش بحياتي في الشارع بغض النظر عن ذكرها خلال القصة وكنت دائما ادافع عن نفسي دفاع كامل من خلال الكلام او الفعل حتى احفظ كرامتي وماخلي لأي مخلوق يتعدى علية لفظياً اوجسدياً دائماً ثبت لنفسي أني امرأة قوية وگد كل الصعوبات قوية شجاعة متخااف قنوعة صابرة مثابرة ..

لكن الشي المنعني مادافع عن نفسي بهاي الحظة هوة انعدام الحقوق والقانون فرضاً لو دافعت عن نفسي وضربتة او رديت علي بكلام يليق بتصرفة المهين چان كدر يستبعدني عن المهنة بتهمة التجاوز على ضابط القانون ويتخذ بحقي اكثر من اجراء يكدر يخليني مارجع لمهنتي نهائياً ..

ولگون الوسط الي اني بي عبارة عن واسطات ورشاوي ولان ماكو سند عندي واحد يكدر يردة كرتبة اعلى منه حتلو يطلع جدي من كبرة ميكدر يرجعني بعد لذالك اتخذت وضعية الصمت حفاظاً على شرفي وكرامتي لان من دون شي الناس بس يسمعون شي راح يتهموني اتهام باطل والوادم متخااف الله

اني ماهمني سمعتي والي يحجي علية لو يكول لان اني اعرف نفسي مامحتاجة تقييم من احد بس مهنتي وعملي اهم من كل شيء بالنسبة الي ..

رديت علي واني كلي نظرة غضب ومتقززة من قربة _ سيدي ممكن تبتعد

قرب وجه لدرجة خشمه طخ بخدي وهوة يشم مثل الچلب _ واذا ماابتعد شسوين

سحبت نفسي بسرعة وصرت كبال الطاولة _ تكدر تخلي المعاملات يمك اذا كملتهن اكمل بقية شغلي واجي اخذهن

انطيته تحية ودرت وجهي اطلع وهوة معصب وخنزر لان مانطيته مجال يريد كل النسوان اليشوفنة يصيرن عبيد عندة وكلشي يسولة ماعرف ياكلب ابن كلب خلالة رتبة وعينه مع كل الأسف هاي النماذج والشگولات خلت نظرية على كل الضباط مو زينين البعض بيهم جايين من كلب يخدمون بلدهم وبيهم جايين حتى يسرقون ويشوهون سمعة بلدهم ..

طلعت واني مختنكة من خلقتة السزز وانفاسة القذرة رحت للكافتريا اخذت بطل مي اشرب واتأفأف ندسني من ورة شخص ..

التفتت علي _ صباح الخير

_ صباح النور

_ شبيج معصبة ؟

_ ماكو شي.. مو هواي تغييب عن دوامك وتجي لهنا؟

_ غير علمودج جااي داافكر انقل يمج

_ شسوي هوة اني اريد اطفرر

_ ليش شصاير

_ يمعود ناس ساقطين ميستحون عوفك منهم هسه شنسوي

_ منو همه ساقطين

_ بعدين احجيلك مو وكتهه هسه شنسوي

_ انطيني معلومات عن خلف سكن اسم عنوان اي شي تذكري والباقي علية