نوفيلا جديدة انتهى الحصرى الخاص بيها هنبدأ تنزيل من يوم الخميس وعلى المدونه من الأربعاء بعنوان
" من السارق"
موجوده فى الأعمال
**
الظابط: قوليلى يا مدام مين تانى غير والدة حضرتك معاه نسخه من مفتاح الشقه؟
ليلى وهى تنظر لزوجها: حماتى.
الظابط: ممكن اعرف السبب ؟
ليلى: يعنى لو انا نسيت مفتاحى وانا هنا ومحمود مش موجود وخصوصا ان ده بيحصل معايا كتير ووالدتى ساكنه فى نفس المنطقه قريبة منى هى وحماتى وكمان تبقى متابعه الشقة لو حاجه حصلت واحنا مسافرين وكمان ابلغها قبل ما اجي تبعت لسميحة تيجى تنظف ومع حماتى لنفس الاسباب بحيث لو واحده مش فاضية مش موجوده التانية تسد.
الاسبوع ال فات مين دخل البيت عندكم؟
ليلى: حماتى وسلفى، وماما وعادل اخويا و فريدة جارتى وسميحة.
هز رأسه بتفهم متابعا: سميحه دى الشغالة؟
ليلى: مش معنى شغالة هى بتيجى فى العمارة يعنى لكل واحده يوم فى الاسبوع او يومين حسب ما بنحتاجها ويوم الجمعه بتكنس السلم وتمسحه.
الظابط: وايه رايك فيها سلوكها طباعها حد اشتكى منها قبل كده؟
ليلى: ابدا سميحه كله بيحبها امينه نظيفه وغلبانه مش بتاعه مشاكل ومعندهاش غير ابنها ياسين عنده حوالى سبع سنين وجوزها مطلع عينها فكله بيحب يساعدها.
الظابط متابعا: غير سميحه واهاليكم مين تانى مسموح يدخل الشقة ويتجول فيها بحريه؟
الاثنان بنفس الوقت: مافيش.
حسن متابعا: حد يعرف ان امهاتكم معاها نسخه من مفتاح الشقه؟
محمود بإستنكار: حضرتك تقصد ايه؟ والدتى او والدتها ؟ معقولة كلام حضرتك ده؟
الظابط: انا مقصدش ده بالمعنى ال وصلكم ، يمكن يكون حد استغلهم واخد المفتاح بدون علمهم ودخل بغرض السرقة وخصوصا انه مافيش اى علامات خدش على كولون الشقة ولا محاولة بطفاشة ولا كسر وكمان الشقه ليها منور بس مقفول ولو قولنا حد من الجيران نط من على المواسير من فوق او طلع من تحت هيخاطر ازاى كده بالنهار؟
يعنى تفتكر يا استاذ محمود مش هيحط احتمال واحد فى الميه ان حد يشوفه ؟
محمود: صح.
الظابط متابعا: والمدام قافلة شبابيك البيت كله وبلكوناته من جوه مش مخليه منفذ لحاجه تعدى غير من باب الشقة الرئيسى؟
اكمل يقلب حديثه ناظرا لهما: ده بقا معناه ايه ؟
صمت لثوانى يراقب أعينهم التى تنظر له باهتمام كذلك ابتلاعهم لريقهم بصعوبه ليكمل عليهم ما يبث بداخلهم الرعب:
ان ال دخل دخل بمفتاح و عارف المكان ال بتحطوا فيه الحاجه كويس اوى بدليل ان مافيش حاجه اتبهدلت ولا اتشالت من مكانها غير الدرفة دى بالذات، يعنى داخل وعارف هو عايز ايه بالظبط؟ والظاهر انه اتفاجأ بالخزنه فحاول يفتحها ولما طلع اول صوت إنذار هرب زى ما دخل من الباب؟ ولحد ما الحيران دوروا على مصدر الصوت وطلعوا من شققهم كان هو مشى.
محمود بإستنكار: يعنى اكيد نزل يجرى هربان خايف محدش شافه من السكان كان طالع او نازل حد من الشارع حتى!
الظابط وهو ينقر بقلمه على سطح مكتبه: ما هو لو متعود يتردد على المكان محدش هيشك فيه وده ال بيقوى احتمال انه حد قريب منكم ومعروف للسكان ودخل وخرج بسهولة من غير ما حد يهتم يسأله اصلا أانت بتعمل ايه؟!
