حبيبتي بدينه

٢٣

بارت ٢٣
ريم ،،،مانمت ابد طول الليل الوب وابجي وانحرك كلبي حرك وعبالك ميتلي ميت اروح لحسابة يطلعلي مغلق ادك علية مغلق جنت راح اجنن علية تغيرت حياتي ودمرت نفسيتي كرهت حالي وكرهت جسمي وكرهت الاكل كمت كل مااشوف الاكل اتذكر انه بسبب الاكل وجسمي خسرت حب عمري
وسيم،،،تحطمت بهل فترة وكمت اكره ذيج المنطقة والمجمع كلة بعد مااحب اروحلة وصرت انعزالي صار عندي تهيج بالقولون العصبي وعانيت فترة منة صار فراغ بحياتي مو طبيعي وبعد ماعندي ثقة بجنس مخلوق ابد لا بنت ولا ولد
وخاصة بالمواقع والنت العالم الافتراضي ظليت شهر على هل حال بعدين تركت المجمع بي العمال وكمت كل فترة امرلة وفتحت بغير منطقة بوتيك البسة رجالية كمت مااريد اشوف بنية ولا اتعامل معهن بس مانسيت ريم وكلشي جان يذكرني بيها وحبها انزرع بكلبي
ريم،،،تحطمت بفترتها ودمعتي مانشفت ردت بس شي يوصلني الة رحت مرتين للمجمع وأسأل عنة يكولولي بعد ميجي بعد لا ليلي ليل ولا نهاري نهار تعودت عليه وتعلقت بي وصار هو النفس الي يجري بية كمت مااكل ابد وصار عندي ضعف عام وكمت ادوخ واوكع لحالي
عدت الايام وانكسرت بداخلي وظل وسيم غصة عمري وتندمت على جذبتي جان المفروض من البداية مااجذب عليه ولا احطم نفسي واحطمة وياي مجان يروح من بالي لحظة الي جان يكلب بجهازي ومشمأز ومصدوم وبعدين سمعت من سالي انه خطب وراح يتزوج
سرى،،،من بعد ماحجتلي سالي شسوت بريم ووسيم ضجت منها وخفت كلش كلت اذا بنت خالتنة هيج سوت بيها وعملت مو غريبة عليها تأذيني وكل اسراري يمها كمت اخفف وياها وابتعدت عنها واتأثرت على ريم والصار وياها لان جانت طيبة وفطيرة ومافد يوم اذتنا بأي شي حاولت من امر للمجمع اسأل عن وسيم لعل وعسى اكدر اصلح شي بينهم بس من يومها بعد ماشفناه
انخطبت وتزوجت وصار قليل احتكاكي ببنات خالتي والتهيت بحياتي
وظلت سالي بعلاقاتها المتعددة وانخطبت وتزوجت وواحد جانت على علاقة بي نشر صورها ومحادثاتها وياه وصارت مشكلة جبيرة وطلكت