نيشان
البارت العاشر
قيس:اياج ثم اياج تحجين شي لاحد لا ابرار ولا غيرها.بعدين هي حركت اخر كارت باقيلها عندي من حجت هالحجي وغلطت هالغلط كله شنو محد تارس عينها؟ مريم:الله يخليك لملم الموضوع ماله داعي انت تعرفها راسها يابس مراح تقبل ترجع بهالسهوله احجيلها وفضها خليها شتريد تكول خل تكول مو مهم. قيس:لاترجع اني مااريدها ترجع بعد لازم تعرف هالمره غلطتها لاتغتفر. مريم:متسوه والله سوء تفاهم ويصير بكل بيت وبين اي اثنين متزوجين لتعاند وهي تعاند والبنات يتأذون. قيس:تريد ترجع ترجع من نفسها مااروح ولاارجعها وترجع تعتذر من الكل عالكلام الي كالته. مريم:تره هي حجت بساعة عصبيه شتتوقع ردها يكون وبيبي الله يسلمها مستلمتها كبل قيس راح يجيب مرته. قيس:ههههه. مريم:والله العظيم بيبيتك تره خطيره سوتلها قصه وفلم وكارثه يعني مو طبيعيه الي بعمرها تره كاعده على سجادتها تصلي قضاء مافي الذمه. قيس:😂😂😂. مريم:والله العظيم شبيك احجي صدك تره يعني اني ساعات اصفن وافكر جدو الله يرحمه شلون جان متحملها هي مسيطره فد مره. قيس:هههههههههه اي والله. مريم:الله يرحمه جان يخاف منها. قيس:😂😂. مريم:والله شبيك؟ قيس:ههههههه كافي لج عيب. مريم:عالاقل بس هنا نحجي براحه بالبيت ممنوع. قيس:هههه هي الله يطول عمرها قويه. وجدج مجان يردلها كلمه فالكل يحترمها ويهابها وصارت كلمتها مسموعه ومحد يناقشها. مريم:يعني نفسه كلامي بس انت هسه عدته بصغيه مؤدبه ومنمقه اكثر. قيس:هههههه كلامج هذا بس يمي اذا احد سمعج بالبيت تره تترزلين اني اكولج واذا هي سمعتج تره ترحين وره الشمس هههه. مريم:علواه. سكتت مااريد ابجي. قيس:شبيج غيمتي تره المسألة مسألة وقت وكل شي ينحل وينتهي.انتي عليج بس تتخرجين حتى نجي عندج نعالج اسنانه. مريم:تدري كلما اريد اكول الله ينتقم من الي جان السبب اتراجع. قيس:ليش تتراجعين الله ينتقم منهم ان شاءالله. سكتت بس جان على طرف لساني اكوله لان الي صار كشفلي زيد شكد اناني ومابي خير ونذل. مريم:حتى يكولون الزركه حظها كاعد. قيس:هههههههه ليش انتي زركه؟يرحولج فدوه كل البيض هذا السمار الحلو وين اكو مثله. مريم:على كولت المصريين مين يشهد للعروسه. قيس:ههههه ابن عمها. سكتنه شويه بعدين كتله: قيسان عفيه لتضوج مني ادري تأذيت بسببي ودوختك وتعبتك وسويتلك مشكله جبيره ويه ابرار وماادري شسوي بس اذا اكو شي اكدر اسويه ويصلح الوضع راح اسويه بدون تردد والله العظيم. قيس:لا ماكو شي تسوينه.والحجي القبله ماله داعي بعدين انتي من جنتي زغيره متعبتني ومبتلي بيج بقت على هاي هههه. ادري بي يتشاقى بس انقهرت لان الحجي صحيح لشوكت نظل عاله عليهم شوكت نكبر ونعتمد على نفسنه وميشيلون همنه بعد. مريم:شتسوي اليوم هنا؟ قيس:شغله جانت عدنه وكلت امر اشوفج اليوم الصبح جنتي ضايجه وعاقجه وجهج. مريم:لا عاقجه وجهي ولاشي بس كافي صارلك اسبوع توديني وترجعني كافي راح ارجع ويه البنات بالخط احسن. قيس:مابقى شي وتخلص السنه ماله داعي الخط هيج احسن حتى منظل بقلق وكتلج اني اصلا طالع للدوام يعني متأثرين. هالسنه جان دوامي مابين الكليه ومابين المستوصف لان هالسنه اغلبها يكون العمل تطبيقي سريري يعني عملي. جانت دراستي مكلفه حيل وجنت استحي اطلب من امي فلوس لو مواد لان ادري بيها دتسوي كل الي تكدر عليه ومااريد اضغط عليها اكثر. بس بيت عمي جانوا ميقصرون وبيبي جانت من تستلم التقاعد جانت تقسمه بيني وبين نورس بس اغلب الاحيان الحصه الاكبر الي. امي جانت كل فتره تشترك بسلفه حتى تجمع مبلغ حتى بالمستقبل افتح عياده بس العياده تكلف كوومه مو مبلغ بسيط. خلصت السنه واتخرجنه وابرار وقيس معارك متقبل ترجع وهو ميقبل يرجعها وزيد سافر وبيبي شوكت ماشافتني لو شافت قيس ظلت تلح على موضوع الخطوبه. ذاك اليوم قيس اتصل كال: مريم عندي الج خبر بمليار. مريم:شنو خبريش ياستار؟ قيس:اكولها بمليار تكول ياستار. مريم:قيسان عندي مريضه هسه بس اخلص اتصل عليك. ميس ابوها فتحلها عياده ويه عيادته بنفس البيت ولان اني ماعندي امكانيه افتح عياده طلبت مني اشتغل وياها والي نسبه من الربح طبعا فرحت احسن من الكعده بالبيت فترة العصر. ميس اليوم مااجت لهسه للعياده ومااعرف وين صارت ومااكدر استلم شغل هي باديه بي فخلصت شغلي واتصلت بيها متجاوب ابوها هم ماجاي. اتصلت بقيس: الو؟ قيس:الو مريم:هلو قيس شلونك؟ قيس:الحمدلله.خلصتي شغلج. مريم:لحد الان خلصت.شنو الخبر بالله؟ قيس:اول شي صديقتج اليوم سألتي عنها شفتيها ليش ممداومه؟ مريم:منو ياصديقه؟ قيس:دكتوره ميس. مريم:وانت شمدريك بيها ممداومه؟يمه قيسان لتطلع مخلي كاميرا وتراقبنه بالعياده تتجسس علينه. قيس:هههه اي مو ماعندي شغل وعمل بس انتو. مريم:لعد شمدريك؟ قيس:صديقتج اليوم الا شويه جان انخطفت. مريم:يمه قيس:اي يمه. مريم:عفيه قيسان صدك تحجي؟ قيس:اي والله الظاهر جانت تريد تجي للعياده ونزلوا عليها جماعه ملثمين. مريم:وانت وين دريت؟وشنو سوولها؟ قيس:مسوولها شي ملحكوا لان لزموهم. مريم:لزموهم؟كول والله؟؟
