نيشان
البارت الثالث عشر
حسيته مستحي ومحرج من امي فمديت ايدي شوفتها الحلقه بدون مااحجي. امي فرحت وباركتلي وباركت لقيس وصاحت لنورس كلتلها نورس عبالك ربحت جائزه فرحت اكثر منهم كولهم تبوسني وتحضني وتبوس امي وتحضنها بعدين حضنت قيس وراحت ركض بلغت سجاد وليث وسجاد وليث مثلها ضحكني رد فعلهم قيس من شافني ضحكت هو هم ضحك. امي:بهالمناسبه الحلوه راح انزل العشا جوا ونتعشا كوليتنه سوا سبحان الله اليوم مبقيت شي مسويته عبالك كلبي حاس. رحت غسلت وبدلت وقيس نزل يغسل ويبدل امي ونورس واخواني راحوا ينزلون العشا واني نزلت بعدين وراهم. اتعشينه وخلصنه وكمنه اني ونورس غسلنه الماعين ونظفنه المطبخ وسوينه جاي. من رجعنه كعدنه كالت بيبي: الذهب علي هديه مني. مريم:مشكوره بيبي ميحتاج واصله كولج خير وبركه. قيس:مشكوره حجيه اذا انتي تجيبين الذهب لعد اني شجيب؟ههه. عمي:واني مني المهر. بيبي:انت تجيب الاخشاب. مهر وذهب واخشاب وغرفة نوم وزواج وبلاوي منتظرتني حسبي الله عليك يازيد فعلا حتى الي خطفوني عدهم غيره اكثر منك.بس يجوز مجنت تحبني معقوله جنت تضحك علي واني بت عمك؟كل شي يصير بهالدنيا مااستبعد ولا استصعب شي بعد. وراها بكم يوم عمي انطاني المهر وبيبي جابتلي ذهب. طبعا ولد عمي الباقين ليث وغيث من سمعوا لبسنه الحلقات هم مقصروا وزوجاتهم بنات اوادم وبما انه اني ممنوع اطلع وحدي للسوك فجانوا البنات ياخذوني ويشترولي اشياء حلوه ومرتبه مكياج عطور قمصان نوم ملابس طلعه كشخه جهاز عروس يعني. قيس جانت تصرفاته عاديه متغير شي من اسلوبه وتصرفاته ويايه يعني اغلب الوقت مجان عندي تفسير لوضعه مرات احسه يتعامل وياي على اساس خطيب وخطيبته ومرات قيسان ابن عمي فقط. من اللحظه الي لبسنه بيها الحلقات اخذت عهد على نفسي انسى كل الماضي وزيد اعتبره غريب مااعرفه صحيح اني كرهته ولعبت نفسي منه بس هسه قررت اعتبره مموجود اصلا وحتى مااعتبره فرد من العائله بس بقت مشكلة ابرار. هي متقبل ترجع وقيس ميريدها اصلا ترجع وبصراحه اني هم مااريدها ترجع ساعات اتمنى بيني وبين نفسي يتطلكون وساعات استغفر ربي اكول لتصيرين ظالمه حرام عليج انتي الي دخلتي حياتهم وخربتي زواجهم وساعات اكول هو زواجهم من الاول فاشل وعلى كولت قيس مسألة وقت وينتهي. بس هالافكار جانت بس براسي مجنت احجيها لاحد مااكدر اكوله طلكها واشيل ذنبها. قيس جان كل فتره يخابر اهلها حتى يروح يجيب البنات يمنه يبقون الخميس والجمعه ويرجعهم السبت. جنت انقهر بيني وبين نفسي لان راح اتزوج واحد متزوج وعنده اطفال بس اصبر على نفسي واكول وين تلكين واحد مثله عالاقل ابن عمج وتعرفيه وتعرفين شخصيته واصلا بعد منو يقبل بيج بعد الي صار واتوقع الي يسمع راح اتزوج واحد متزوج واني بهالعمر ودكتوره راح يتوقعون اكيد لان احبه علاقة حب يعني مو زواج تقليدي وهو اصلا مو زواج تقليدي اتصور مو تقليدي. كل جمعه العصر جنه نروح اني وقيس وامي ومرت عمي حتى نشوف اخشاب حيره واحس السوك كله متشابه ماكو شي مميز. اليوم حنروح بس اني وياه نشوف محلات بغير منطقه. قيس:شرايج بهاذي؟ مريم:حلوه. قيس:وهاذي؟ مريم:حلوه. قيس:معناها معجبوج. رحنه لغير محل قيس عجبته وحده لونها ابيض اني مااحب غرف النوم الي لونها ابيض بس تعبت افتر وكله متشابه فكتله كيفك. اشتريناها ورجعنه واجو حتى ينصبوها. بهالاثناء قيس جان ويه العمال بالغرفه واني واكفه بالمطبخ ويه مرت عمي داوصفلها الغرفه. شويه اجه قيس انطه التليفون لامه لان مشغول ميكدر يرد على زيد. مرت عمي:الو.ها يمه حبيبي شلونك؟ شلون صحتك؟اي اي تليفون قيسان هذا بس هو مفارغ هسه مشغول ويه العمال دينصوبون الاخشاب مالته.اخشابهم هو ومريم.اي بعد اكو غيرها كم مريم عدنه هههه.مو لبسوا الحلقات صار فتره مو كتلك؟معقوله؟يجوز نسيت شسوي قابل عقلي دفتر. فكرت معناها مجان يعرف لبسنه الحلقات هسه يالله وصلته الصدمه وهالمره الصدمه اقوى حلقات واخشاب معناها خلص مباقي شي للعرس. مرت عمي شويه وانطتني التليفون حتى احجي ويه زيد بالبدايه ماردت بس بعدين اخذته وكلت خلص اني اعتبرته مموجود وغريب وميت ماله داعي ارتبك لو اخاف لو اضوج منه. مريم:الو؟ زيد:الو مريم:هلو زيد شلونك؟ زيد:شنو هالاخبار؟ مريم:اخباريش؟ زيد:لابسين الحلقات ودتنصبون اخشاب؟ مريم:اي والله.عقبالك. زيد:عقبالي ها؟انتي خليتيني هسه اشتعل واطفى. مريم:ليش اسم الله شبيك شناقصك حتى تكول هيج اشو ماشاءالله شاب ومرتب وحلو ومناقصك شي الف وحده شريفه وبت ناس تتمناك. مااكدر احجي براحتي مرت عمي يمي واتقصدت اكول كلمة شريفه. زيد:مريم لخاطر الله بطلي. مريم:امم.هههه لايمعود ماابطل لتخاف انت مبطل ومتريد تتزوج كيفك. زيد:مريم لتخبليني مالكيتي غير اخوي؟ مريم:هههه اي بالضبط مالكيت غيره هو احنه لايكين على بعض على كولت بيبي لان اثنينه نستاهل الاحسن. زيد:منو يمج؟امي يمج؟ليش تحجين هيجي؟ طلعي بره واحجي. مريم:يالله زيودي اني لازم اروح قيس ديصيحلي حتى اشوف الغرفه هاذي عمه وياك. انطيتها التليفون ورحت.
