نيشان
البارت الرابع
دعمتني سياره وراحت. دخلوني كبل لغرفة الاشعه رجلي طلع بيها فطر وايدي تمزق بمفصل الرسغ وزلوغ وخدوش بوجهي ورجليه. ولان مابطلت بجي قيس كل للدكتور ينطوني منوم فد شي وفعلا خلولي مغذي وشويه ونمت. كعدت الظهر كعدتني امي باوعت امي وقيس وزيد يمي امي تبجي وزيد يبجي وقيس واكف يم راسي بس فتحت عيوني كلي: الحمدلله على سلامتج مريومه شسويتي بينه. دمعت عيونه ومسحها اني بجيت لزمت ايده وبستها كتله: متت من الخوف كلت بس لا ماتلكوني ومااشوفكم بعد خفت يكتلوني ويذبوني. دنك باس راسي كلي: تخافين وقيس اخوج والله لاجيبهم من جوه الكاع وهالشارب مو على رجال اذا ماطلعتهم. زيد ميحجي بس يبجي ويباوعلي. مريم:لتبجي زيودي مابيه شي الحمدلله. شويه امي اشرتلهم طلعوا بره. امي:ماما حبيبتي شسوولج هالجلاب؟ شسووا بيج؟اذوج؟اتقربوا منج؟اتدنولج؟ امي تحجي وتبجي اني هم بجيت اباوع لزيد بره يشوفني ابجي ظل يبجي حيل وقيس هم ظل يبجي. مريم:لا مسوولي شي الحمدلله والشكر متدنولي متت من الخوف خاف يسوولي شي لدرجه فكره بيني وبين نفسي اذا سووها اكللهم اكتلوني وراها لتخلوني عايشه. بجيت حيل بكل قوتي امي حضنتني وتبجي وعيني على زيد وقيس بره يبجون عبالهم ابجي لان سوولي شي واعتدوا على شرفي. امي:حبيبتي ماما لتخافين اذا سوولج شي كولي اني امج حتى اخوانج البره مااكللهم والله بس احجي لتموتيني. مريم:والله مسوولي شي والله كالوا احنه نريد بس فلوس لانكتل ولا نخرب بنات الناس والله لتخافين اذا متصدكين صيحي الدكتوره اصلا لو سووها حتى لو مكتلوني وراها اني اكتل نفسي وماارجعلكم. امي طلعت للولد بره حجتلهم شويه ودخل قيس كلي: مريومه حبيبتي اكيد مسوولج شي والله منسويلج شي بس احجي اذا مسويلج شي كولي والله اطلع حقج بيدي. مريم:لتخاف مسوولي شي الحمدلله اكو كم واحد بيهم بعد بيهم شرف مقبلوا وكلولهم لحد يتدنالها ومو هي الي نريدها. حجيت لقيس القصه من الاول للاخير. دخلت امي قيس طلع يحجي لزيد اكيد. حسيتهم خايفين خاف اجذب عليهم من خوفي. رجعنه للبيت وبيبي من شافتني ظلت تدك وتلطم وتبجي وتبوس بيه ونفس الاسئله بس بيبي كلامها دايركت مو مهم الولد موجودين. بيبي:ولج خوما خربوج؟احجي كولي حتى اموت اذا مخربينج يماااي يمه شهالمصيبه شهالفضيحه ياربي. استحيت كتلها: مسوولي شي بيبي الحمدلله هاي كل من دعائج ودعاء امي اكيد. بيبي صح جبيره بس قويه كجسم وكشخصيه. حجيتلها القصه كولها يالله خلتني اروح ارتاح.صعدوني الولد فوك لبيتنه سبحتني امي ونورس صبتلي غدا وامي كعدت يمي اتمددت اريد انام بس مااكدر كلما اتذكر دموعي تصب وهي احسها تخاف. كتلها تحضني حتى انام اخاف. نمت شويه وكعدتني امي كلتلي دنيا المغرب ميجوز تبقين نايمه مو زين. كعدت ساكته وافكر باللي صار عبالك حلم او كابوس ممصدكه خلص على خير الحمدلله. الموضوع الي صار محد يعرف بي غير امي وبيبي ونورس اختي وقيس وزيد ولد عمي. بالليل امي ونورس سووا عشا ونزلوا جوه لبيبي والولد. وره شويه صعدت نورس كالت بيبي تكول نزلوا كلكم تعشتوا جوه. نزلنه جوه اتعشينه اني اكلت شويه احس روحي من الخوف مبهوته لحد هسه خايفه وممصدكه اني هسه بوسط اهلي. خلصنه عشا بيبي كعدت يمي تبوس بيه كلتلي: شلون راح تداومين؟ مريم:خل ارتاح كم يوم بيبي وبعدين هسه مااكدر اخاف. نورس راحت تسوي جاي بيبي دارت على الولد وامي كلتلهم: الي صار مااريد احد يعرف بي بالبيت لو شنو يصير افتهمتوا؟تره بس يطلع هالحجي بره هالبيت معناها الناس تظل تألف على اختكم وميصدكون رجعت سالمه وشرفها سالم. كلولها اكيد طبعا محد راح يعرف. بيبي:بس يبقى بالدوام شلون شافوج مو من اخذوج. بجيت وهزيت راسي اي. بيبي:الله ينتقم منهم ويفضحهم ان شاءالله. هسه ارتاحي كم يوم وراها من تداومين كولي انخطبت لابن عمي. امي ساكته محجت شي شويه وكامت يم نورس جابت الجاي واجت. بيبي:زيد بعد انت هسه لازم تخطب بت عمك حتى لحد يحجي عليها بكليتها. باوعت لزيد ضجت من حجي بيبي بس كلامها صحيح اكيد هسه اكو نفوس ضعيفه يظلون يألفون قصص واصلا اني احبه وهو يحبني هذا الشي بصالحنه. زيد محجه شي ولاعلق وقيس ساكت يشرب جاي ضجت من سكوت زيد وصحت لنورس تساعدني اصعد لان مااكدر وحدي ايدي اليسرى ورجلي اليسرى اثنينهم متضررات. صعدت وكعدت بالسطح شقتنه كدامها مثل الحوش سطح يعني وحاطين بي سنادين مال ورد وزرع وبلوكات مصفطيهم نكعد عليهم ساعات. شويه وصعد زيد كعد يمي كلي: شرايج بحجي بيبي؟ مريم:خطوبتنه وزواجنه تقصد؟يعني بس نقدم الموعد بدل ما بعد التخرج ننخطب هسه ويبقى الزواج بعدين عادي. سكت محجه شي اني حسيته ضايج ضجت. زيد:اني مااريد اخطب هسه بالوقت الحالي بالي مشغول بأمور اهم من الخطوبه والزواج. باوعتله صدمني كلامه كتله: ليش شنو الفرق هسه لو بعد 3 او 4 شهور؟وشنو الامور الي اهم من خطوبتنه وزواجنه؟شكو زيد شبيك؟ دار علي كلي: مريم احبج صحيح بس مااريد اجذب عليج بعد الي صار مااكدر. درت عليه عبالي ماسمعته عدل كتله: شنو؟شنو الي صار؟شنو بعد الي صار؟
