نيشان
البارت الثالث والعشرون
باوعتله خزرته ومسحت دموعي كتله:
والله اذا باوعت هناك عالبنات قيس متلوم الا نفسك.
قيس:صدك ناقصات عقل توج تبجين علي خاف اموت وترديني انسجن ولا اروح وهسه تهدديني خاف اباوع لعد وين الحب قبل شويه والبواجي والسجن.
مريم:زين انت اذا رحت هناك شمدريني متروح تتزوج هناك وحده ثانيه وتبقى 14 عدها وتجيني هنا 14يوم؟
قيس:لا ويكلج المصلاويات حلوات وحده احلى من الثانيه.
مريم:😭.
قيس:لج اششش اش الناس نايمه فضحتينه اضحك وياج هههههه خرب يومج اتشاقى والله العظيم صدك ناقصات عقل ودين ههههه.
ظلينه كاعدين للصبح على فد بجيه اني ومرت عمي بيبي محد كللها بعد الصلاه جهزتله جنطته ماادري شخليت ماادري شحطيت لو شما حطيت.
اسوء 14 يوم مرت علي بحياتي جنت اتخبل من اتصل عليه وميرد جنت اكول لو مات لو اتصوب مابيها مجال.
اول يومين حتى للدوام مارحت بس ميس لحت علي وامي ومرت عمي وعمي حتى التهي بس خلصت عيوني من البجي.
جنت اتوقع بأي لحظه يتصلون ويكولون استشهد.
بالليل جنت اصعد انام يم امي ميقبلون انام وحدي بالغرفه وجنت اخلص الليل احجي وياه عالواتساب ومن اخلص استلم البجي.
نورس:تره الرجال مابي شي لتفاولين عليه وتبجين.
مريم:من تتزوجين تحسين😢
نورس:تره هو هم ابن عمي واحبه مو بس انتي.
مريم:سكتي نورس مالي خلكج.
نورس:كون اصورج فيديو وادزه لزيد حتى يشوف شكد تحبين قيس.
باوعتلها اتعجبت كتلها:
شنو زيد؟شجاب زيد عالسالفه؟شتحجين؟
نورس:اعرف بموضوعج انتي وزيد سابقا😏.
مريم:شنو؟شتعرفين؟😨
نورس:زيد حجالي.
مريم:شحجالج😨؟
نورس:كل شي.
مريم:احجي شحجالج؟شوكت حجالج؟
نورس:من اجه اخر مره اتصل بيه وحجه وياي حتى اقنعج تعوفين قيس لان هو يحبج وميتحمل يشوفج وياه.
مريم:خل ياكل نع.....
نورس:واني هم هيج رأيي.
مريم:وشكلتيله؟
نورس:كتله انت عوفهم بحالهم خليهم عايشين حياتهم ومرتاحين وسعيدين هي تحبه وهو يحبها وانت بطل انانيه وتفكر بس بنفسك.
مريم:حقير ماادري شلون جنت احبه.
نورس:متحبيه بس لان هو كلج احبج حبيتي هالشعور انتي من الاول تحبين قيسان بس لان متزوج ممفكره بالموضوع وممنتبهه على نفسج وهو هم يحبج بس ميتجرأ يكول وخصوصا هو متزوج وعنده 3بنات وانتي زغيره وممتزوجه ودكتوره ممتوقع تقبلين بي بس هو اهتمامه بيج واضح.
