نيشان
البارت الثاني والعشرون
وميهمني موضوع زواجه الاول ولابناته لان اني من اتزوجته اعرف ومتعوده على الموضوع وعلى بناته واحبهم الي يهمني هو لان شخص استثنائي كافي الحنان الي عنده كافي رجولته بنظري ماكو رجال مثله.
ميس:هو بصراحه ميتفوت😆.
اجه قيس ورحنه للبيت بالطريق ردت اكوله وافرحه بس كلت لا خل نوصل للبيت.
وصلنه وبعد العشا صعدت لاهلي فوك فرحت امي بالخبر امي اتحمست حتى تبدي تسوي جهاز الطفل مدام عرفت جنسه شنو.
نزلت كعدت شويه يمهم بعدين رحت لبيبي قبل متنام كلت افرحها.
دخلت كتلها:
بيبي نايمه؟
بيبي نايمه؟
بيبي:ها حبيبتي شنو تردين؟
مريم:مرايده شي سلامتج بس ردت اكولج شي قبل الكل انتي اول وحده راح تعرفين لان البقيه باجر اكوللهم ان شاءالله.
بيبي:خير يمه كولي.
مريم:بيبي انتي مو جنتي تردين قيس يصير عنده ولد؟
بيبي:اي والله امنيتي قبل مااموت اشوف بحضنه ولد.
مريم:اسم الله عليج لتكولين هيج.
بيبي:قابل ناخذ زمنه وزمن غيرنه يايمه يالله حسن الخاتمه.
مريم:عمرج طويل ان شاءالله.وقريبا راح يصير الي تتمنيه ان شاءالله.
بيبي:اخذتي سونر؟
مريم:ههههه اي اخذت سونر.
بيبي:وشطلع؟
مريم:ولد.
بيبي:احمدك واشكر فضلك الهي.
باستني وظلت تبجي وتدعيلي ووصيتها متحجي اليوم لاحد لان بعده قيس ميعرف.
رحت لغرفتنه اتمددت ورفعت رجليه تعبانه ياريت لو اخلص من الدوام مال المستشفى الصبح لان هلكت الصبح والعصر وكله وكفه بس شسوي اهلي هسه مسؤولين مني واحتاج مصرف الي وهسه للطفل ولازم اجمع مبلغ زين حتى بلكي اصير شريكه بالعياده ويه ميس.
انتظرت قيس يجي حتى ابشره بس طول بالديوانيه يم عمي ومرت عمي شهالموضوع المهم الي يسولفون بي نص الليل.
خفت اغفى قبل لا اكوله ومن فرحتي مااريد انام لحدما يعرف.
دخل قيس نام يمي حضني كلي:
مريومتي شلونج اليوم؟
مريم:الحمدلله.
قيس:شلون ابني؟
مريم:ههه زين الحمدلله.
قيس:ان شاءالله.
مريم:زين اختاريتله اسم؟
قيس:لا
