Punto de Vista ng May-akda (A Collection of Poems and Poetry)

BOLANG APOY

Isang higanteng bituing nakakasilaw
Ang sa kalangita'y pilit kong tinatanaw 
Mula sa malayo ako'y dumudungaw
Masilayan lamang ang sa aki'y nagbibigay tanglaw

Ikaw, na sa umaga'y masayang bumabati 
Sa lahat ng tao ay laging ngumingiti
Tuwang namumutawi sa iyong mga labi
Ang sa akin ay unti-unting bumibighani 

Katumbas mo ay araw sa kalangitan 
Kahit anong gawin ay 'di ko malapitan
Kausapin pa kaya'y 'di ko susubukan 
'Pagkat nauunahan nang pangangatog ng kalamnan 

Hiya, takot at saya ang aking nararamdaman 
Sa tuwing nakikita kong ika'y dumaraan 
'Di maipagkakailang ako'y kinakabahan
'Pagkat bigla nalang nawawala sa katinuan 

Ika'y araw na maraming nagmamay-ari 
Tila ba sa mundo ako'y nakikihati
Sa dami ng babaeng sayo ay pumupuri 
At bawat isa'y nais kang maging hari 

Habang sayo'y lumalapit lalong napapaso
Ngunit damdamin ko parin sayo ay nag-iibayo 
Kahit pa ako'y mahulog nang 'di mo sinasalo 
'Pagkat puso't isip mo'y nakatuon sa ibang tao 

Ika'y tatanawin nalang mula sa malayo 
Masilayan lamang ang mukha mong maamo 
Labis na kasiyahan na ang hatid nito 
At masasabi kong, 'kuntento na ako'.

01/05/2024
-AloraAyarih