Punto de Vista ng May-akda (A Collection of Poems and Poetry)

BAHAY NA BATO

Ako'y bubuo ng bahay na bato
Sisikapin kong ito'y magiging pulido
Bawat parte ay bubusisiin ko
Nang 'di matinag, sa anumang bagyo

Ako'y bubuo ng bahay na bato
Matatag at mananatiling nakatayo
Sa bawat unos ay 'di paaapekto
Kahit kailan ay 'di susuko

Ako'y bubuo ng bahay na bato
Matibay na pundasyon ang sangkap nito
Walang butas na bubong ang magsisilbing payong ko
Sandigan at proteksiyon ang pader na sementado

Bahay na bato na pinapangarap ng kahit sino
Lalo na ng mga taong madalas binabagyo
Unos at pagsubok na nagnanais lumusob 
Ang bahay na bato sa kanila'y magtataob

Bawat tao ay inaasam-asam
Bahay na bato'y kanila ring makamtan
Ako'y 'di nagpahuli't nakiayon din
Dahil sa mga pagsubok na kahaharapin

Ngunit sa dulo ay may napagtanto
Hindi pala sapat ang bahay na bato 
Dahil kapag naglaon ay bibigay rin ito
At sa dulo, ikaw rin ay matatalo

Ang pasuko ay 'di nangangahulugang ika'y talo
At 'di porke ikaw ay natalo, ay siya ring pagsuko
Simulan mo ulit tumayo, o kung nais mo'y,
bumuo muli ng bahay na bato...

01/13/2024
-AloraAyarih