اصبحت اما قبل ان ابقى اما

11

الصباح قلتة لي مروان يعني م ح تمشي الشغل قال لي لا قلتة ليهو معناها انت ح تمسك الأولاد انا ونضال عايزين نمشي الكوفير قال لي كوفير شنو قلتة ليهو الكوفير بتاع البنات عايزين نعمل حجات بتاعت بنات قال لي خلاص بس انتو

م تتاخرو قلتة ليهو حاضر عملتة ليهو الشاي وجهزتة الفطور فطرنا بعدها جاتني نضال عشان نطلع طلعنا

مشينا وجينا راجعين عشان ح نجهز لأننا ح نمشي مروان قال لي يالنا تعالي اكوي لي مشيت كويت ليهو

وبديت البس في إياد وزياد عشان انا البس براحتي جهزتهم واديتهم لمروان وبديت البس جاتني نضال عشان

تعمل لي ميك اب هي خطيرة في الميك اب عملت لي المكياج طلع رهيب لاني كنتا لابسة توب اخدر زيتي اول

م لبستة وطلعتة الصالة برة مروان قبل م نطلع شغال يجوط انتو بتعملو في شنو دا كلو يلا اطلعو والا والله

امشي اخليكم لما وقفتة في وشو قلتة ليهو انا جاهزة اديني إياد اشيلو قال لي ماشاءالله دي منو دي المزة

الحلوة قلتة ليهو مروان قال لي زياد واياد شوفو امكم الليلة طالعة قمر قلتة ليهو ح نمشي ولا انت ح تفضل

تتكلم كتير نضال جات طالعة قالت ليهو القمر دي انا مكيجتها ح اشيل منك مليون يامروان قال ليها يازولة بطلي

الهرج بتاعك دا اصلا لنووو م محتاجة لمكياجك من يومة ماشاءالله قالت ليهو ألقى تاني زول يمكيج ليك مرتك

قلتة ليهم بطلو كلام كتير خلونا نمشي ماما مريم بتكون منتظرانا قال لي امي قالت ح تمشي مع مصطفى قلتة

ليهو غيرت رأيها قالت ح تمشي معانا قال لي يلا شلتة إياد ونزلنا لقينا ماما مريم منتظرانا شافتنة قالت لينا ماشاءالله

اريتة العين البتشوفك وم تذكر الله بالحجر طلعنا مشينا وصلنا اول مرة امشي ناس عمهم لقينا الضيوف قاعدين سلمنا وقعدنا

مروان مشى مكان الرجال وانحنا قعدنا مع نضال وماما مريم كل الناس بتبارك لي وبتقول ماشاءالله بدت الحفلة

م شفتة مروان إلا لما جى بارك للعروس خلصت الحفلة رجعنا بيتنا انا ومروان فوق بنتونس في الحنة والحفلة

اصلا الأولاد من في الشارع نامو نومتهم وبقيت أتكلم مع مروان قطع لي كلامي قال لي أنا م عملتة ليك حنة

قلتة ليهو م مشكلة قال لي فرحتك كانت ناقصة م فرحتي زيك زي البنات الفي عمرك سامحيني وانا شايلة

ملابسي ماشة على الحمام قلتة ليهو انا كدة فرحتي كاملة اتحممتة وجيت رقدتة قال لي ح تنومي قلتة ليهو

ايوة قال لي طيب بعدها جراني عليهو قال لي تعالي هنا قلتة ليهو في حاجة قال لي انتي مالك بقيتي

في نظري كل يوم بتكوني أحلى قلتة ليهو الساعة واحدة صباحاً وعندك مزاج للهظار قال لي جادي حتى عايني

لي في عيوني قلتة ليهو شوف زياد واياد ح يصحو من النوم عشان كدة اسكت قال لي م ح يصحو بعدها حصلت

الحاجة البتحصل ك العادة الصباح صحيت خليتهم نايمين جهزتة الفطور والشاي بعدها التلاتة صحو في وقت واحد

الأولاد اديتهم وجبتهم وانا ومروان فطرنا قال م ماشي الشغل عدة اليوم كان أحلى يوم بالنسبة لي ضحك وونسة

وتعاليق ومواقف حصلت في الحفلة يوم المناسبة انا ونضال نطير ونقع قلنا م عايزين نمشي الغدا ح نمشي بس

الصالة مروان وماما مريم مشو وجو راجعين انا ونضال جهزنا حجاتنا مروان قال لي بعد المغرب مباشراً انتي ونضال

تلبسو لأنكم م بتطلعو بسرعة المغرب اذن بدينا انا ونضال نجهز كنتا لابسة اسود التوب كلو اسود مع ملحقاتو

نضال لبست فستان كحلي الساعة كانت 8ونص مروان قال لينا يلا اطلعو طقمتة لي إياد وزياد معي مروان قال لي

بسحروكم لي قلتة ليهو م ح يحصل طلعنا مشينا اول م جينا داخلين على الصالة الناس كانت بتعاين لينا ومركزة

مروان قال لي نقعد في الطربيزة دي قعدنا الحفلة بدت والعروس جات كانت رهيبة اتذكرتة انو انا حتى الفستان

الأبيض البتحلم بيهو أي بت م لبستو وقتها مروان جا جنبي قال لي انتي أحلى من العروس ضحكتة قلتة ليهو

حرام عليك هي أحلى قال لي لا ماف مقارنة شايل إياد قال لي إياد قول لي أمك أنها أحلى خلصت الحفلة

رجعنا البيت مروان قال لي يالنا ح نسافر وانا بطلع في توبي قلتة ليهو ح نسافر وين قال لي المكان الانتي

ح تختاريهو

يتبع......