(اسكربيت: أحببت خاطفي)
بقلم/ تسنيم المرشدي
***
خلصت لبسها وكان جيب جلد لونها أسود قصيرة جداً وعليها قميص أوف وايت وتعمدت تسيب بعض الزراير مفتوحة، حطت لمساتها الأخيرة في الميك أب قبل ما تخرج من أوضتها، نزلت على سلم الفيلا ولمحت طيف بابها بيتكلم في الموبايل.
راحت ناحيته وباسته في خده وقالت:
داد أنا خارجة
شاور لها تستنى وخلص المكالمة بتاعته وبص لها:
راحة فين في الوقت دا؟
ردت عليه وهي بتقلب عيونها بإسيتاء:
هسهر مع الشلة يا داد المفروض تكون حفظت!
اتنهد بضيق قبل ما يردد:
بس أنا مبقاش عاجبني الوضع بتاعك دا يا ساندرا، خروج كل يوم بعد الساعة ١٢، مش معقول كدا يابنتي
ساندرا قربت منه وباسته تاني في خده وسألته:
أنت بتثق في بنتك ولا لأ؟
من غير تفكير جاوبها:
أكيد طبعاً واثق فيكي ودا إيه علاقته باللي بقوله؟
ساندرا وضحت له قصدها:
علاقته إنك طلاما واثق فيا يعني أنا مش بعمل حاجة غلط، وطلاما مش بعمل حاجة غلط يبقى سيبني براحتي بليز، أنا حابة حياتي كدا وصدقني مش هعمل حاجة تضايقك أبداً
أخد نفس وخرجه ببطئ وقالها:
والله مش عارف أقولك إيه، كل مرة تضحكي عليا بكلمتين وتعملي اللي في دماغك
ضحكت بميوعة وقالتله:
بحبك يا سنسن والله، يلا باي
مشت بسرعة من قدامه وردت على موبايلها اللي مبطلش رن:
خلاص أنا جاية أهو بطلي زن بقى
نهت المكالمة وركبت العربية واتحركت بيها برا الفيلا، وبعد ما قطعت نص الطريق اتفاجئت بظهور شخص قدامها حاولت تتفداه بس سرعتها منعتها، وفجأة وقع من طوله قدام العربية، صرخت بصوت عالي ونزلت من العربية وهي مخضوضة.
جرت عليه والدموع في عيونها مش مصدقة اللي حصل، قعدت قدامه واتكلمت بنبرة مهزوزة:
أنت كويس؟ حصلك حاجة، بليز رد عليا، طيب أوديك المستشفى؟
مكنش فيه صوت طالع منه يطمنها، وفي ثواني اتفاجئت بأشخاص كتير كانوا ملثمين حاوطوها وكانوا ماسكين سلاح في أيديهم، من هول المنظر مقدرتش تنطق ولا تصرخ بحد تستنجد بيه، مررت عيونها عليهم برعب واضح وفجأة واحد منهم خبطها على راسها خلاها تفقد الوعي.
***
صحت وهي حاسة بدوخة شديدة، حاولت تفتح عيونها بس رؤيتها كانت مشوشة جداً، فضلت تحاول لغاية ما نجحت ورؤيتها وضحت تدريجياً، كانت في مكان غريب عليها، فاضي مفيهوش غير كراسي مكسرة وسلاسل متعلقة في السقف، حست بوجع في ايديها، حاولت تعرف السبب بس فشلت واتفاجئت أن ايديها مربوطة ورا الكرسي اللي هي قاعدة عليه.
