زوجي وأولاده
***
فتح الباب والسعادة مش سيعاه، كان متحمس لحياته الجديدة اللي داخل عليها، ابتسم وبص لعروسته وقالها:
ـ خشي برجلك اليمين يا عروسة
ابتسمت بكسوف ودخلت البيت وهو قفل الباب وبصلها بلهفة:
لو تعرفي انا فرحان قد إيه بوجودك هنا، كانت خطوة صعبة بس كل حاجة عدت وبقيتي في بيتك، نورتيه يا حبيبتي
بصت بخجل على الأرض وهي بترد عليه:
دا نورك يا هاني
قرب منها ورفع وشها وبص في عيونها وقالها:
هاني بس، مفيش حبيبي ولا عمري ولا الحاجات اللي فيها ياء ملكية دي؟
بصت تاني في الأرض وهي بتضحك وهمست:
ما أنت حبيبي هو أنا محتاجة أقول؟!
رفع وشها تاني وهو بيرد عليها بلهفة:
اه يا هند محتاجة تقولي أنا عندي حرمان عاطفي يا حبيبتي، عايزك كل ما عيونك الحلوين دول يلمحوني تقوليلي أشعار وتدلعي عليا وليا وكل اللي ينفع يتعمل ويتقال تعمليه وتقوليه
ضحكت بصوت عالي وقالت:
للدرجة دي؟
رد عليها بصوت عالي:
للدرجة دي ونص يا حبيبتي، وبعدين كفاية كلام بقى يلا ندخل نغير عشان الأفعال عليها الدور
غمز لها بعيونه وسبب لها الإحراج، وشها احمر وبصت في الأرض تاني وهو معجبوش خجلها منه المستمر فقالها:
لأ انا عايزك تاخدي عليا بسرعه مش عايز الكسوف دا يضيع مننا وقت إحنا اصلا منملكوش
مسك ايدها وكمل كلامه:
يلا يا حبيبتي ندخل جوا
وقبل ما يتحركوا سمعوا خبط على على باب الشقة، بصوا لبعض باستغراب وهند سألته بفضول:
مين جاي لنا متأخر كدا؟
هاني قلب عيونه وهو بينفخ بضيق وعدل على كلامها:
قصدك مين جاي لنا الساعة دي، دا وقته برده ناس معندهاش دم
مشى ناحية الباب وفتحته واتفاجئ ببنته اللي في بتجري عليه تحضنه وبتقول:
بابا
بص لجدتهم الواقفة وجنبها إبنه الأكبر وهو مش فاهم ايه اللي بيحصل، جدتهم كانت واقفة بتبصله بتحدي وغيط، هاني اتنهد وسألها آخر ما فشل إنه يستوعب اللي بيحصل:
هو فيه حاجة يا أم إيمان؟
بنبرة جامدة ردت:
هيكون في إيه يعني؟ عيالك وجيباهم لابوهم إيه الغريب في كدا..
هاني خرج برا البيت وقرب منها عشان كلامه ميوصلش لأولاده:
مش إحنا اتفقنا أسبوع واحد بس وهاخدهم منك، إيه اللي حصل؟
اللي حصل إن الشيلة بقت تقيلة عليا وأنا ست كبيرة ومش حِمل تعب وشقاوة العيال، وأنت أبوهم وما شاء الله صحتك كويسة..
سكتت وبصت على هند اللي واقفة بتابع الحوار ورجعت كملت كلامها:
وبتتجوز كمان..
هاني ضغط على أسنانه بعصبية وحاول يتماسك قدام أولاده، وبص لهند وقالها:
لو سمحتي يا هند خدي الأولاد جوا
