عريس صالونات
***
_ يا بنتي اسمعي الكلام وقابلي الشاب، مش يمكن يعجبك؟
نفخت بضيق ورفضت طلب والدتها:
يا ماما انسي إني اتجوز بالطريقة دي، أنا عايز أحب واتحب لكن مش اروح اقعد مع واحد معرفوش واتجوزه
والدتها زهقت من تفكيرها العقيم وحاولت تعدل لها شوية في أفكارها واعتقدادتها:
دا الصح يا حبيبتي، تقعدي معاه وبعدين تتعرفوا على بعض وقت الخطوبة والحب هيجي بعد كدا، لكن حب ومرقعة وقلة ادب أنا مش عندي الكلام دا، وهتقعدي مع الشاب يا أية يعني هتقعدي، انا اصلا خلاص اديتهم معاد وهنخرج نقابلهم بكرة
خرجت وسابتها بعد ماحطتها قدام الأمر الواقع، مش مصدقة إنها بجد عملت كدا ومن غير ما تاخد رأيها، أية قعدت على السرير وبصت قدامها بتحاول تستوعب اللي هي مجبرة تعمله.
هزت راسها باستنكار تام وقامت تشوف حاجة تشغل نفسها بيها عشان متتجننش.
***
تاني يوم
_ يا بنتي متنهيش قلبي، انا زهقت من الصبح وانا بتحايل عليكي تقومي تجهزي نفسك
نفخت بصوت عالي وبتمرد واضح قالتلها:
أنا مش عايزة اروح، اعمل ايه عشان تصدقي أن مرواحي زي عدمه، كدا كدا مش هتجوز بالطريقة دي
والدتها جابت آخرها منها وجربت معاها اخر محاولة:
طيب على الأقل متصغرنيش قدام الناس وروحي المقابلة، الله أعلم يمكن ترتاحي
بعناد واضح:
لا مش هرتاح
والدتها قلبت عيونها وهي بتقولها:
وانتي دخلتي في علم الغيب عشان تعرفي يعني، ياستي بلاش ترتاحي قومي البسي عشان منتأخرش وصورتنا تكون وحشة قدام الناس وابقي ارفضي براحتك بعدين..
ـ اوف اوف بجد، مش عارفة انتي بتجبريني على حاجة أنا عايزاها ليه، ليه تقعديني من ناس غريبة، وراجل معرفوش هقوله إيه؟
ـ جاري امورك معاه يا أية، انتي يعني هتغلبي؟ انتي مش بتبطلي كلام جت على المرة دي ومش هتعرفي تقولي ايه؟
محدش فيهم ضاف كلمة، والدتها اتنهدت وقالت لها قبل ما تخرج:
الله يهديكي يا أية البسي خلينا نمشي
سابتها وخرجت وكانت أية في وضع متحسدش عليه، وقفت تبص على نفسها في المرايا وهي في قمة غضبها، ومكنش قدامها غير انها تلبس وتروح المقابلة لأن مفيش اختيار تاني.
***
وصلوا المكان اللي اتفقوا عليه، أية كان الشاب موجود مع والدته، قام وقف وابتسم اول ما شافها ومد يسلم عليها، أية ضيقت عيونها على أيده وبضيق قالتله:
سوري مش بسلم
الشاب اتحرج لكن كان مبسوط باللي قالته، قعدوا والأمهات انسحبت وسابوهم لوحدهم، كان الصمت سيد الموقف، محدش فيهم بيتكلم، أية كانت بتحاول تهرب من نظراته وبتتفرج على المكان حواليها، هو استغرب من تصرفاتها وسكوتها وحب يبدأ الكلام:
في حاجة واقعة منك؟
