هائمًا في بحور الدُجًى(جاري تعديل السرد)

الفصل 5

بسمة بإستغراب : إنتي بتقولي إيه ياجوري مين دي اللي عروسة ..

جوري حكتلها كل اللي حصل
بسمة : إنتي بتتكلمي جد ولا بتهزري ..

جوري : لازم تنبسطي ياحبيبتي إنتي هتتجوزي حبيب القلب ..

بسمة : بس ياجوري إنتي فاكره إنه بيحبني هو عمل كدا علشان يساعدني ..

جوري : أنا همشي دلوقتي أتأخرت وبابا هيتعصب عليا ..
هبقى أكلمك علشان أعرف عملتوا إيه
خرجوا من الأوضة بسمة ودعت جوري

بسمة : أنا آسفة مكنش في داعي إنك تدخل نفسك في المشاكل ..

علي : ماتقوليش كدا كان لازم أساعدكم ..

كريم قاطع كلامهم لما دخل وهو والمأذون
كريم : علي إنت واثق من قرارك ..

علي : أيوه ياكريم هي محتاجه مساعدتنا ..
تم كتب كتاب علي وبسمة
بسمة كانت مبسوطه لأنها اتجوزت من الإنسان اللي بتحبه ولكن فرحتها مكنتش كامله لأنها عارفه إنه هيتجوزها علشان يساعدها وبس

علي : طنط جميلة بسمة هتعيش معايا في بيتي رجالة جدها حوالين البيت آنسة بسمة جهزي  نفسك لازم نمشي ..

كريم : أنا همشي وإنت مراتك هتجيبك سلام ..
كريم خرج يجري لبرا من غير مايستنى رد علي

جميلة : يلا يابسمة خذي جوزك وروحوا على بيتكم ..

وقفت بسمة مش عارفه تعمل إيه بين ليلة وضحها اتقلبت حياتها
علي : ست جميلة إنتي هتيجي معانا ..

جميلة : لا يابني روحوا إنتوا أنا هجيلكم الصبح ..
_____________________

بسمة وعلي وصلوا قدام البيت ساعدته بسمة إنه يدخل استقبلهم كريم
كريم : أهلاً بيكي في بيتك يامرات أخويا هحضر لكم العشى ..

بسمة : لا ماتتعبش نفسك أنا هعمله ..
 
كريم : النهاردة إنتي ضيفتنا ومن بكره تقدري تدخلي المطبخ جوزك تعبني وأنا بحضرله الأكل كل يوم
أخيراً هرتاح منه ساعديه علشان يغير هدومه وتعالوا علشان تتعشوا ..

ساعدته يدخل أوضته ويغير هدومه لآخرى مريحة
علي : البيت مافيهوش غير أوضتين هنام في أوضة واحدة أنا هنام على الأرض وإنتي نامي على السرير علشان تكوني على راحتك ..

بسمة برفض : لا إنت نام على سريرك وأنا هنام على الأرض مافيش مشكله ..
 
علي : أنا شايف إننا مش هنتفق ..

بسمة : أنا شايفه إن السرير كبير هنعمل حاجز في النص وكل واحد ينام في ناحية ..

علي : فكرة كويسه ..

بسمة : متشكرة أتمنى إن وجودي هنا الفترة دي مايسببلكش إزعاج ..

علي : مافيش إزعاج ولاحاجة أهلاً بيكي إعتبري البيت بيتك ..

سمعوا صوت كريم بيناديهم
كريم : ماتناموش العشى جاهز ..

قعدوا على السفرة بسمة كانت مكسوفه وهي قاعده معاهم مش قادره تاكل
كريم : مرات أخويا أنا شايفك مش بتاكلي الأكل مش عاجبك ..

بسمة بنفي : لا بالعكس الأكل حلو أوي تسلم ايديك ..

كريم : متتكسفيش مني اعتبريني أخوكي ..

بسمة : أنا مش عارفه اشكركم إزاي أنا مش هنسى معروفكم دا أبداً ..

كريم : ساعدي جوزك علشان ينام وماتنسيش الدوا بتاعه ..

بسمة : هنظف الأطباق الأول روح إنت ..
 
كريم : إحنا قولنا إيه بكرة المطبخ هيكون ليكي ..

بسمه زقت الكرسي لجنب السرير ساعدته يقعد على السرير وشربته الدوا
علي: أنا متشكر تعبتك معايا كريم كان دائما بيساعدني مش عارف ماله النهاردة هيتعود على كدا ..

بسمة بإبتسامة : مافيش شكر بيننا ..

طفت النور ونامت جنبه
بسمة بتكلم نفسها : اه لو تعرف أنا مستعدة إني اخدمك طول حياتي حبك كان حب من أول نظره