نيران الغراب

البارت الثامن

البارحة من الوجع
غوّشت عيني وشفت
طيفك گبالي يجي
وبسرعة يتلاشى
وشلت الهدايا بحرص
مثل ام توه ابنها غفه
وشالته لفراشه

.......................................
.......................................

غسق: كلشي حلو تلاشى بلحظه كلشي نطفه بالنسبه الي  هاي اني صارلي شهرين على غيابه عني ولحد الان ما مصدكه اني فقدته اي فقدته للابد حبيب وسند وكلشي بالنسبه الي غرفته ما طلعت منها جنت انام وسط ذكريات حلو ويا سوالفه عطره ملابسه والهدايه الي يجيبها الي لساني أحسه ثگيل وما اكدر انطق بس كل الكلام جان يصير داخلي واتمنى لو يطلع سمعت الباب اندكت وما اهتميت لأحد ندك أكثر من مره وما رديت انفتح على كيف وشفتها مرام عيونها مورمه من البجي
مرام:حبيبي غسوقه اكدر ادخل
أشرت الها براسي اي
دخلت وسدت الباب بقت تباوع بكل اركان الغرفه ودموعها تنزل على خدها
مرام: حبيبي ليش تسوين بنفسج هيج تره موزين وحتى هيثم راح يزعل لان يشوفج تركتي دراستج هو مو كال اريدج دكتوره غير تحققين حلمه ؟لازم تدرسين بعد شهر على الامتحانات كومي حبيبي هاي ملازمج وهذا الايباد شحنته الج ونزلت الج كم محاضره
حجيت ولاول مره بس بصعوبه شويه
غسق: ممالحكك
مرام: لا عمري تلحكين بابا كال خلي تمتحن الرياضيات والاحياء والكيمياء بالدور الاول والدور الثاني بقيه الكتب وراح يدخلج دوره بالعربي والإنكليزي شكلتي عمري ها تدرسين؟
غسق:هو يدرسني ومنه افتهم وهسه عافني وراح شون بيه
جنت كل كلمه انطقها اتعب
اجت مرام يمي حضنتني تمسد على شعري وتحجي بغصه
مرام: البيت صار مابي طعم ما اسمع بي صوت ضحكه الكل تعبانين لو شوفين الولد شون كاعدين ولا جن ذولي الي ثانيه ما يسكتون ويشاقون هسه كلمن يكعد صافن وخاله كلش تعبانه قبل شويه شفتها كوه تمشي وبس تذكره
بابا وعمو كلهم تعبانين وخاصه عمو الغراب من يوم الفاتحه لليوم هو بغرفته حتى الاكل ما نشوفه ويانه ومسكينات سمر وملاك ما تهنن بزواجهن
احس بيتنا طفت فرحته وغابت ضحكته بس لازم نرجع لحياتنا لازم نتقبل الواقع
لازم نرجع نعيش حياتنا وما نوقفها لان هي هاي الدنيا تأخذ اعز شخص علينا ورب العالمين يختبرنا بالفقدان يشوفنا نحمده ونشكره لو نعترض
وانتي يا روحي وعمري هيثم وصيته تصيرين دكتوره تردين تزعلي منج؟
هزيت راسي ب لا
مرام:جا كومي يالله دخلي سبحي وغيري ملابسج وتعاي بغرفتي ادرسي
غسق: لاااا ما اريد اطلع عوفيني هنا ابقه
مرام:خوش براحتج لا تصيحين موزين عليج هسه راح اجيبلج ملابسج واجي
لزمت بأيدها وحجيت: اكو بوكس تحت السرير مالتي جيبي الي وكل أغراضي وملابسي جيبيهن اريد اخليهن بهاي الغرفه
مرام: تمام عمري براحتج
راحت مرام جابت ملابس الي وجانت غرفة هيثم الوحيده بيها حمام دخلت سبحت وبقيت جوه ألمي ابجي اسمع منار تجيب الاغراض وكل شويه تجي تدك الباب تطمأن عليه
بقيت هواي جوه ألمي لمن تعبت سديت المي ونشفت وطلعت لكيتها جايبه أغراضي كلها
مرام: ها عمري محتاجه شي اعزلهن الج؟
غسق: لا روحي براحتج
اجت قريب عليه حضنتني وباستني بخدي وطلعت رحت وراها سديت الباب وقفلته
طلعت من بين الاغراض مكص ووكفت كدام المرايه ضفرت شعري الي جان كلش طويل وكصيته اي كصيت أكثر شي احبه تنازلت عن كلشي لخاطر يرجع شعري صار كلش قصير واصل لرگبتي مشطته وبديت اسفط ملابسي بخانه من خانات الكنتور
فتحت وحده من الخانات وهاي جانت اول مره اتقرب لكنتوره فتحتها ونزلت دموعي واني اشوف الخانه عباره عن قاط وعلب حمر اثنين وبوكيه ورد ذبلان فتحت العلب جانن حلقه فضيه واربع حلقات ذهب ضحكت واني دموعي تنزل
غسق: ككتليي اي انت كتلي انتي الاولى والثانية والثالثة والرابعة وعفتني ورحت كعدت يم الكنتور بجيت بصوت عالي واني انطق اسمه البيت محد يجي يمي لان يعرفوني ابجي هواي عليه ضميت أغراضي ولميت الكتب والايباد بعدتهن ما اريد ادرس ولا اريد مدرسه كلشي ما اريد وقررت من هذا اليوم ابقه بهذا العالم ما اطلع منه لمن اموت
ضميت روحي بفراشه وحضنت المخده وغمضت عيوني بتعب وكسرة روح
فتحتها واني اشوفه كدامي بنفس الملابس الي نقتل بيهن وجهه حلو وبشوش منصي وكاعد مقابيلي يمسد شعري
هيثم: شونج بويا اشتاقيتلج
غسق: يا حبيب روحي انت اني موزينه بدونك تعبت أخذني وياك
هيثم : لا ما اخذج بس وعد كل يوم اشوفج وكل يوم اسأل عنج كالو تعبانه وبس تبجين ليش
غسق: وحيده بقيت بدونك كلشي ما اريد بس شوفتك باسني بكصتي وغمض عيوني بأيده وهو يردد ويكلي رددي وياي ""اللهي لقد مسني الضر وانت ارحم الراحمين "" بقيت أردد إلى سمعت صوت صايح صار ببيتنا فزيت ادوره بالغرفه جانت ضلمه فتحت الاضويه وطلعت وهاي جانت اول طلعه الي من بعد وفاته وكفت يم الدرج شفتهم ملتمين على خالتي ام هيثم ويصيحون شفت عمتي مروج وسمر دخلن وصاحن شكو وسمر من شافت امها بقت تصيح شبيها نزل أياد من يمي  بسرعه وراح الهم شالوها واخذوها للمستشفى