ما كان في الحسبان يقوى الهجر أعز انسان//للكاتبة:بنت بلادي

6

البارت السادس:

&
:
&
بسم الله..استغفرالله.. لاحول ولاقوة الا بالله..سبحان الله
_____

أقتنعت برحيلك لكني لا اعلم
لماذا أنتظرك إلى الأن ؟

....
اصوات بعيده جدا
كانت عباره عن ضحك اطفال وسوالف نسوان
دب ارجلهم على الارضيات وصرخاتهم الخافته
هذا الي كانت تسمعه ريم حبيست غرفتها
بعد الي صار والهجوم الي عاشته قفلو عليها مقررين حبسها لجل تتأدب
كملت أسبوع من ذاك اليوم الرضوض بجسمها مكان الضربات خفت
لكن الألم الي بداخلها وش الي يخفيه
تنهدت بضيق وهي توقف وتسحب منشفتها مقرره انها تاخذ شور بارد وسريع يمكن يهدي شوي من حرقت قلبها
بعد الي عاشته ذاك اليوم كرهتهم زود عن قبل
مانتظرو تبرير منها ماسمحو لها تنطق حتى
من قفلو عليها الغرفه وقتها وهم يصعدون لها اكلها على مدار اليوم
ولا من دخل وسأل او حتى استفسر اذا كذب او لا ..محد اهتم
خلال السنتين والنص الي طافو بعد الي عاشته بالمستشفى
وعدت نفسها تكون اقوى واحسن لكن ذاك اليوم كسرها وكثير
تحس انها رجعت لنقطة الصفر...
بعد مده قصيره
طلعت من الحمام وهي تنشف شعرها ثم رمت المنشفه وجلست بهدوء
على اطراف سريرها تناظر بسرحان بزاويه
تعبانه وكثير الافكار الي براسها تألمها مالها حل او جواب
تعودت على ذا الشعور الضياع والتشتت لدرجة التبلد

لكن كل الي متأكده منه هو ساس البلا كله
من لمار وقمر
تنهدت بضيق وهي ترمي نفسها على سرير وتناظر للسقف
متاكده صحيح مالمحت صورت الولد كويس
لكن كان هو نفسه الي قمر راحت معه قبل شهر
لما كانو بيدخلون للجامعه وشافت قمر الي انتظرت السواق والشغاله يمشون ثم طلعت تصعد معه هو نفسه
لكن كل الي ببالها هو ليه
لي سوت فيها كذا..؟
....
ابيك تعرف ان الناس اجناس
ولا كل من نطق كلمة احبك يحبك!

بعض البشر يغرك بصدق الاحساس
وبعض البشر ساكت وقلبه يحبك

الحلا يمر بينهم و ريحة القهوة منتشره بالمجلس مندمجين بسوالف
اخذت ام عادل فجانها وهي تصب لنفسها وتناظر لسوالف ام ثامر وام سعد
بينما بالجهه الثانيه بنتها سعاد الحامل والي جالسه وتسولف
مع نور بنت ام سعد
لفت ام ثامر لبنتها اسراء والي تحاول تنيم بنتها الصغيره:ما نامت؟
اسراء بانزعاج وهي تهز فيها بهدوء:عيت تنام يا يمه
مدت ام ثامر يدها لها:هاتيها الحين انيمها لك
مدت اسراء بنتها لامها:اي والله وانا بعد بروح للبنات بسولف
ام ثامر وهي تمد يدها تاخذ فنجانها:اييه روحي ياعمري عمرك
قامت اسراء لجهة سعاد ونور وهي تجلس عندهم:ايوا وش تسولفون فيه
ابتسمت لها نور وهي ترفع جزمتها:ثواني بس
حذفت جزمتها بقوه لجهة ولدها سالم الي يضرب في اخته لمى:سالممممممم
وقف سالم ضرب وهو يمسح مكان الضربه:اخخ وشو يا ماما لي تسوي كذاا
نور بعصبيه:ابعد عن اختك يالله و روح اللعب برا
وقف سالم بزعل وقهر وهو يناظر اخته بحقد
نور بعصبيه:سلووووم انا وش قلت؟؟ وجيب جزمتي وانت طالع
اخذ سالم الجزمه بزعل وهو يمشي لجهة امه ويحطها :ماما ماحبك
سحبت نور الفصفص وهي تناظر لسعاد واسراء بدون اهتمام:طيب..
ضحكت اسراء بهدوء:هههه حرام عليك راح زعلان
نور بضيق وهي ترشف من الشاهي:خليه يزعل اذاني مغير يكفخ بالمسكينه
مسكت سعاد بطنها بضيق وهي تعدل جلستها:الله يصلحهم
على صوت ام عادل الي لفت انتباهم: يا بنت الحلال نصيب
ام ثامر بضيق وهي تهز بحفيدتها الشبه نايمه:تو ماصار له سنتين من اعرس وطلق اتعبني هالولد والله العظيم مدري وين اودي وجهي عن الناس
ام عادل وهي تاخذ من الحلا:طيب ماسالتي ثامر يمكن ماجازت له
ام ثامر بنرفزه:وش الي ماجازت له حلاو هي الا مايستحي على وجهه فشلنا قدام الناس
ام سعد وهي تحاول تهديها:ماعلي ان شاءالله انه يعقل ويجيك يقول بردها على ذمتي
ام ثامر ضحكت باستخفاف:اي خير ان شاءالله
تنهدت ام عادل وهي توقف:بروح اشوف العشا
لفت لبنتها قمر الي جالسه مع لمار ويسولفون:قمر تعالي معي بعطيك عشا لريم صعدي لها
قمر ناظرت لها بضيق:يمههه مالي خلق خلي الشغاله
ناظرت لها ام عادل بعصبيه:اقوول قومي تدرين خالك قال القفل مايمسك مفتاحه غيركم الشغالات ان راحن بيطلعونها قوميي اخلصيي
قامت قمر بضيق وهي تسحب لمار معها:تعالي معي نسولف بطريق
وقفت معها لمار وهم يمشون ورا ام عادل
ووقفو قريب من المطبخ على ما ام عادل تجهز مع الشغاله للعشا
ناظرت قمر للمار بهمس:تصدقين احس تحسفت على الي سوينا فيها
ناظرت لها لمار بصدمه بهمس:على وش ماوراها اهل يذبحونها
لو صورك الي كانت مع الولد لما هددك انه يوصلهم لبيتنا كان ذبحك ابوك واخوانك هي منو بيهتم لها ضربوها وهذي هي تاكل وتمسح يدها بالجدار
قمر بضيق:اييه بس اخاف يعرف اني اكذب تدرين لما طلعت معه شك اني مو الي بصور
لمار عقدت حواجبها باستغراب:ليش نزلتي نقابك؟
قمر ردت بسرعه: لا طبعا بس اخذنا فره بسياره لكن شك من العيون
لمار وهي تتراكها وتناظر لام عادل الي قربت تخلص:ايي ماعليك دام انه جاب الصور وفبركهم يعني ماشك انك مو هي
قمر عدلت وقفتها برتباك وهي تاخذ الصحن من امها
مدت ام عادل المفتاح للمار:هذا مفتاح الغرفه حطو العشا وقفلو الباب يويلكم اذا ماقفلتوه عدل
لمار مدت يدها تاخذ المفتاح بهدوء:ان شاءالله
صعدو قمر ولمار عند غرفة ريم
دخلت لمار المفتاح وفكت الباب
وبجنبها قمر والصحن بيدها
رفعت ريم نفسها بعد ماكانت متمدده على سريرها وهي تناظر لهم
تقدمت قمر بهدوء وهي تحط الصحن على الطاوله:هذا العشا
لفت بتطلع لكن وقفتها كلمة ريم:ليش سويتي كذا فيني؟
لفت لها قمر برتباك بينما لمار متراكيا وتناظر:وش
وقفت ريم بهدوء قدام قمر:ترى ادري انه انتي الي تكلمين الولد الي بصور ومتاكده بعد ماشفتك ذاك اليوم طلعتي معه بالجامعة
ناظرت لها قمر برجفهه:وش
ريم وهي تناظر لها بحده:ليش استخدمتي صوريي واساسا كيف تجرأتي تتهميني بشي انا ماسويتهه تحسبين اني راح اسكت؟
قمر برتباك ناظرت لها:يويلك اذ...
تقدمت لمار بسرعه وهي تضغط على يد قمر وتسحبها على ورا:انتي هيي تسوين البلاوي وتحذفينها على غيرك
ريم بتفاجئ:بلاوي؟
لمار تكتفت وهي تناظر لها بخبث:ايي ولا نسيتي طول ماجيتي عندنا وانتي تتكلمين بالجوال مع العيال وتخليني انا وقمر نغطي عنك
ناظرت لها ريم بصدمه:انتي هيه وش جالسه تخربطين
لمار ناظرت لها بتحدي:الي سمعتيه يا ريم كل شي ينقلب ضدك ولا عندك شي يثبت صحة كلامك وكلامي انا هو الي بينسمع وبيصير الصح وقتها واتوقع وصلت لك القرصه
سحبت قمر وطلعت وهي تصفق الباب وتقفله
لفت لقمر وبقهر همست:خبله لاتأيدين كلامها انكري وكملي التهم عليها
قمر بتوتر:بس هي تعرف
لمار بعدم اهتمام:اقول تعرف بس ماعندها شي يثبت كلامها خايفه على شنو عاد يليت في احد بيصدقها ولا يسمعها من الاساس
سحبت قمر معها وهي تنزل لتحت:مشينا ناكل بس
.....
بمجلس الرجال
كان المكان اهدى بكثير من مجلس الحريم
الي جالسين ويسولفون والي يتابع الاخبار
والي مستكن على بيالة الشاهي ويهوجس بسرحان والي على جواله
ابو ثامر ناظر لولده:يا ثامر اخوك عمر وينهه
ثامر الي كان يسمع الاخبار لف لابوه:هلاا...والله اخر خبري فيه اليوم الظهر قايل انه بيروح لاخوياه
ابو سعد:ولدك شفيه مغير طالع مع ذا الاخويا وجايب لنا المصايب
تنهد ابو ثامر بضيق:انا ادري جنني وصل عمره ٢٤ولا هو راضي يعقل
قاطعهم سعد:اقول فارس
عدل فارس جلسته والي كان متمدد ويناظر جواله وهو يناظر اخوه:هلا
سعد وهو يحرك بفنجاله:الا زواجك كم باقي عليه قلت لي
ناظر فارس التاريخ بجواله ثم لسعد:ثلاث اسابيع
سعد بتفهم:ايييه طيب ناقصك شي ودك نعاونك فيه
ابتسم فارس:ابد ماتقصر ياخوي كل شي جاهز
....
في الليل الساعه١
ببيت ابو ثامر
نزلت ام ثامر صينية الشاهي الي سوته بعد ماصبت لنفسها
وجلست ترشف منه بسرحان وهي تتنهد بضيق على ولدها ثامر
قاطع حبل افكارها عمر ولدها الي دخل بهدوء راجع من برا
نزلت الشاهي بنرفزه:لا اليوم مو داخل متاخر غريبه كان جيت الصباح
سكر عمر الباب بضيق:استغفرالله
تقدم عند امه وهو يجلس مقابلها:افا مين مزعل الغاليه
ناظرت له ام ثامر بنص عين:مسوي ماتدري
عمر:افا ليش
ام ثامر تنهدت بزعل:ابي اشوفك معرس متى تطيعني وتخليني املك لك
عمر بجديه:يمه تدرين اني ما ابي العرس هالحين
ام ثامر وهي تحاول تقنع فيه:اسمعني وانا امك وش رايك اخطب لك ريم بنت عمك فهد
عمر باستغراب:وشوو ريم..؟ مين ذي بعد مابيها
تنهدت ام ثامر بملل من راس ولدها اليابس:يا الخبل خلك ذكي ريم بنت عمك فهد مغيرها الي سكنت معنا قبل كم سنه عندها خير فلووس تغطيك من فوق لتحت ماعندها اهل غيركم اخذها وخل عيالك بكرا اذا كبرو الخير يغطيهم ويغطيك معهم
ناظر لها عمر بشبه اقتناع:هي كم عمرها؟
ام ثامر وهي استبشرت خير:اصغر منك حول الخمس سنين يعني١٩ هاه وش قلت؟ قبل ياخذها غيرك ويتهنى
عمر عض باطراف شفايفه بتفكير وهو يمسح بيده على شنبه:هممم..
ناظر امه وبجديه: بس تم اخطبيها لي
ابتسمت ام ثامر بفرح:الله يبشرك بالخير اجل من بكرا بخطبها وماعليك باذن الله انها لك بنت العم ماتطلع الا لولد عمها
ابتسم عمر لامه:زين اللي شفنه ضحكتك يا ام ثامر
ابتسمت له امه:اييه دام انك تسوي الي ابيه اكيد بفرح
....